Read lugbara Yohana 21 Bible Online

Yohana 21 - lugbara bible

Yohana 21

¹E’yo ’diyi ma vutia Yesu nga i ece ’ba erini imbale ’diyi dri dika miri Tiberiani ma tia; eri ece i ’dini.

²Simoni Petero pi, Toma yini omvele Ejoruri pie, Natanieli Kana Galiliariniri pie, anzi Zebedayoni pie, ’ba azini iri erini imbale ’diyi pie yi ovu tualu.

³Simoni Petero nga ’yo yi tia, Ma mu mani e’bi oku. Yi nga ’yo eri tia, Ama mu mi be indi. Yi ko dri ra, tu o’bo ma alia ra; te ini ’darisi yi isuni afa aluni ku.

⁴Te angu ka ’ba ati curu’do ’bo, Yesu eri so pa yi kutia; te ti ’ba erini imbale ’diyi nini eri Yesu’iri ku.

⁵Yesu nga di ’yo yi ria, Anzi la, afa nyaza emi dri indi ya? Yi nga e’yo omvi eri ria, Yo.

⁶Eri ’yo yi tia, Emi ’be emba o’bo ma kala dri ndialeruria, emi nga isu ra. Yi ’be ani, te curu’do okpo yini funi dri emba esuzu ku, e’bini ovule karakaraurisi.

⁷’Ba Yesuni imbale erini leleri nga ’yo Petero ma tia ani, ’Di Opi’i! Simoni Petero ka di eri kini eri Opi’i, eri nga afa suza ini anzu i ruaa erini ovule pililirurisi, nga i ’be miri alia.

⁸Te ’ba erini imbale ’diyi ma azi yi nga emu o’bo wererisi, de yi kuti aceni re ku, te ekile wuale turu iri ’dipile; o’bo vutia yi se emba ovupi e’bi be alenia treri se se.

⁹Yi ka fu amve nyaku dria ’bo, yi ndre aci eduzaru aciolusi ’daa, drinia e’bi pi mikate be.

¹⁰Yesu nga ’yo yi tia, Emi eji e’bi emini okule curu’do ’diyi ma azi.

¹¹Simoni Petero tu di ani o’bo alia, nga emba ese nyaku dria. Emba nde ga tre e’bi ’wara ’wara turu alu drini kali towi drini na ’diyisi; te ka tro e’bi eri alia kakau ti, emba ceni i ku.

¹²Yesu nga ’yo yi tia, Emi emu nyaka o’bitiniri nya. ’Ba erini mbale ’diyi ma azi aluni i asi imbapi zizu eri tia, Mi a’di’i ya?-ni yo, yini nile eri Opi’irisi.

¹³Yesu nga di emu mikate ’du, fe yi dri, e’bi be ’dinile indi.

¹⁴’Diri eceta pale na Yesuni i ecezu ’ba erini imbale ’diyi dri, erini engazu ’ba draza ma eselia ’bori ma vutiari’i.

¹⁵Yi ka di nya ’bo, Yesu nga ’yo Simoni Petero ma tia, Simoni, Yohana mvi la, mi le ma avasi aga ’diyi ra ya? Eri ’yo eri tia, E, opi; mi ni ra ma le mi ra. Eri ’yo eri tia, Mi fe nyaka kabiloanzi mani dri.

¹⁶Eri ’yo eri tia dika pale iririsi, Simoni, Yohana mvi la, mi le ma avasi ra ya? Eri ’yo eri tia, E, Opi; mi ni ra ma le mi ra. Eri ’yo eri tia, Mi oce kabilo mani.

¹⁷Eri ’yo eri tia pale narisi, Simoni, Yohana mvi la, mi le ma ra ya? Petero eri ovu ani candisi erini ’yole eri tia pale na, Mi le ma ra ya?-risi. Eri ’yo eri tia, Opi, mi ni e’yo dria; mi ni ra ma le mi ra. Yesu ’yo eri tia, Mi fe nyaka kabilo mani dri,

¹⁸Ma ’yo mi tia ndi ndi, mini ovuria karilaururia mi adri ndra mi opile a’di mi ngulupi ma drisi, mi adri aci pari mini leleria; te mi ka nga ca mbazauru mi nga mi dri eju, te ’ba azini nga mi opile a’dini, nga mi ji pari mini lele kuria.

¹⁹(Eri ’yo e’yo ’diri, dra erini ngazu drazu diza fezu Mungu driri ecezu.) Eri ka e’yo ’diri ’yo ’bo, eri ’yo eri tia. Mi bima vuti.

²⁰Petero nga i oja, nga ’ba Yesuni imbale erini leleri ndre erini yi vuti biria, eri ’ba i atipi Yesu agatia yini nyaka ondre beri nyaria, ’yopi, Opi, ’ba mi o’di nyapiri eri a’di’i ya? -ri’i.

²¹Peteroni ’ba ’diri ndreria eri nga di ’yo Yesu tia, Opi, ’ba ’diri driri te ngoni ya?

²²Yesu nga ’yo eri tia, Ma ka le eri ma ovu ’dani kpere mani emviria, e’yoni mini ya? Mi bi mini ma vuti’i!

²³E’yo ’diri nga ku adripi nde ’diyi ma eselia ani, kini ’ba erini imbale ’diri ngani dra ku; te Yesu ’yoni eri tia kini eri ngani dra ku, ’dini ku, te kini, Ma ka le eri ma ovu ’dani kpere mani emviria, e’yoni mini ya?

²⁴’Diri ’ba erini imbale e’yo ’diyi ma eti nzepi, e’yo ’diyi sipiri’i; te ama ni ra e’yo eti erini nzeleri eri adaru.,

²⁵Afa azini karakarau Yesuni ’yele ’diyi yi indi, te yi ka te yi ma e’Yo si alu alu dria, ma ega wudrikuru ma ngulupi ngani te dri fu buku nde yini ngale sile ’diyisi ku.