Read lugbara Yohana 3 Bible Online

Yohana 3 - lugbara bible

Yohana 3

¹Isu agu alu ’ba Farisaini ma eselia, runi Nikodemu’i, eri ’ba amboru ’ba Yahudini ma dri cepiri.

²’Ba ’diri emu Yesu vu inisi, ’yo eri tia, Rabi, ama ni ra mi ’ba ’ba imbapi engapi Mungu vuri; te ’ba aluni ecopi tali mini ’yele ’diyi ’yepi, Mungu ka ovu eri be kuni yo.

³Yesu nga e’yo omvi, ’yo eri tia, Ma ’yo mi tia ndi ndi, ’ba ka ovu osizaru o’diru ku, econi erini suru Munguni ndrezaru ku.

⁴Nikodemu nga ’yo eri tia, ’Ba eco ovu osizaru ’ba ka de ra ngoni ngoni ya? Eco erini fizaru andri ma opoa paleko iri, eri ma ovu osizaru ani beni ya?

⁵Yesu nga e’yo omvi, Ma ’yo mi tia ndi ndi, ’ba ka ovu osizaru yisi azini Orindisi ku, econi erini fizaru suru Munguni ma alia ku.

⁶Afa osile ruasiri eri ruani, afa osile Orindisiri eri Orindini,

⁷Mi osu mani ’yole mi tia kini, Mi ma ovu osizaru o’diru-risi ku.

⁸Olini angu li pari erini lezuria, mi o’duko erini eri ra, te mi nini pari erini engazuri ku, mi nini vini pari erini muzuri ku indi; ’ba dria alu alu osile Orindisiri ovu ’dini.

⁹Nikodemu nga e’yo omvi ’yo tinia, E’yo ’diyi eco yi ’yezaru ngoni ngoni ya?

¹⁰Yesu nga e’yo omvi ’yo eri tia, Mi’i mi ’ba Israelini imbapiri, de mi nini e’yo ’diyi ku ya?

¹¹Ma ’yo mi tia ndi ndi, ama e’yo amani nile rari ’yo’i, ama vini afa amani ndrele ’bori ma e’yo eti nze’i; te emi a’ini e’yo amani etini nzeleri ku.

¹²Ma ka afa nyakuni ma e’yo olu emi tia, emi a’ini ku ’di; ma ka afa ’buari ma e’yo olu emi tia’i, emi nga a’i ngoni ngoni ya?

¹³’Ba aluni tupi ’buani nga yo, pe kiri ’ba esipi ’buarisi va, Mvi ’bani, ovupi ’buari’i.

¹⁴Ekile Musani uri ’dule uru roko driarile, yi ma nga Mvi ’bani ’du uru ’dinile indi,

¹⁵’dini ’ba dria ale alu eri a’ipiri ma ovu idri ’dani ’dani be ani.

¹⁶Munguni ’ba nyakua ’diyi lele turisi, eri fe Mvi erini tile aluri, ’dini ’ba dria alu alu eri a’ipiri ma ja dri ku, te ma ovu idri ’dani ’dani be.

¹⁷Te Mungu epeni Mvi erini ri nyakua e’yo nyakuni lizu ku, te nyaku ma ovu pazaru erisi beni.

¹⁸’Ba eri a’ipiri, e’yo lizaru drinia yo; te yi li ’ba a’ipi kuri ma e’yo ’bo, erini Mvi Munguni tile aluri ma ru a’ile kurisi.

¹⁹E’yo lizani eri ’di, diza emu nyakua ’bo, te ’ba le ini aga diza ra, azi yinini ovule onzirisi.

²⁰’Ba dria alu alu e’yo dri fupi kuri ’yepiri ngu diza onzi, eri emuni diza vu ku, kazu azi erini ma e’yo a’dazu ku.

²¹’Ba e’yo adaru ’yepiri emu diza vu, ’yeta ini ma ece yi ani kini yi ovu ’yezaru Mungusi beni.

²²E’yo ’diyi ma vutia Yesu nga remu ’ba erini imbale ’diyi be angu Yudiaria; eri ovu yi be ’daa, fe baputizi indi.

²³Yohana alu indi, eri ovu baputizi feria Ainonia Salimu vu ogogo, yini egale ’dale trerisi; ’ba emu vunia, a’i baputizi ra.

²⁴Isu de yi ’beni nga Yohanani arujoa ku.

²⁵’Ba Yohanani imbale ’diyi nga ’ba e’yo ozi yi ma eselia ’ba Yahudini alu be, rua ’baza alaruri ma e’yosi.

²⁶Yi emu Yohana vu, ’yo eri tia kini, Rabi, ’ba mini ovuzu eri be Yoridania ’aa’dasi, mini e’yo erini ma eti nzeleri, mi ndre, ’ba ’diri eri baputizi fe, azini ’ba dria yi mu eri vu.

²⁷Yohana nga e’yo omvi, ’yo kini, Afa ka ovu fezaru agu dri ibizu ’bua ku, econi isuzaru iniru aluni ku.

²⁸Emi ma ngulupiri e’yo eti nze masi kini ma ’yo ndra, Ma Kristo’i yo, te kini, Yi pe bani ma ti eri ma drilia.

²⁹’Ba aliria bipiri eri izioni; te izio ma agyi, pa sopi e’yo erini eripiri, eri ovu ayikosi tu erini izio ma o’duko erilerisi; te ayiko mani ’diri eca i paria ’bo.

³⁰’Ba ’dari ma e’yo ma zo uru, te maniri ma emvi ele.

³¹’Ba ibipi engapi ururi eri afa dria ma drilia; ’ba nyakuari eri ’ba nyakuni, eri nyaku ma e’yo ’yo’i; ’ba ibipi engapi ’buari eri afa dria ma drilia.

³²Eri nze e’yo erini ndrele ’bori pi ma eti e’yo erini erileri be, te ’ba aluni a’ini eri ma e’ya eri nzeza ’di ku;

³³’ba eri ma e’yo eti nzeza a’ipiri ti i dri afa ecetaru inisi, kini Munguni adaruni.

³⁴Te ’ba Munguni tini epeleniri eri e’yo ’yoza Munguni ’diyi ’yo’i, te Mungu feni Orindi o’bizaru afa o’bizasi ku;

³⁵Ata le Mvini ra, fe afa dria dria eri dri.

³⁶’Ba Mvi a’ipiri ovu idri ’dani ’dani be; te ’ba Mvini gapi siri ngani idri ndre ku, te adra Munguni ovu eri ruaa ’dani.