Read lugbara Yohana 4 Bible Online

Yohana 4 - lugbara bible

Yohana 4

¹Te Opi ka ni ra kini ’ba Farisaini eri kini Yesu oja ’ba kakau ’ba ini imbale ’diyiru aga Yohanani ra’i fe vini baputizi indi

²(te Yesu ma ngulupi adrini baputizi fe ku, te ’ba erini imbale ’diyi feni),

³eri ku Yudia, fu mu Galilia dika.

⁴Le eri ma aga trei Samariaasi.

⁵’Dini eri mu aku Samariaa omvele Sikari, ovupi angu Yakoboni mira fele i mvi Yusufu driri vu ogogoria.

⁶Yi a’di Yakoboniri ’daa indi; ’dini Yesuni andele tu erini acilerisi, ri di yi a’di ma tia. Isu de etu eca aziale.

⁷Oku Samariaari nga emu yi ku. Yesu nga ’yo eri tia, Mi fe ma dri yi mvu.

⁸De ’ba erini imbale ’diyi mu akua nyaka jezu ’bo.

⁹Oku Samariaari nga ’yo tinia ani, Mi’i, mi ’ba Yahudini, mi zi yi mvuza ma’i oku Samariouru ma tia ngoni ngoni ya? Te ’ba Yahudini piyi iyi adrini yi eci ’ba Samariaa ’diyi be ku.

¹⁰Yesu nga e’yo omvi, ’yo eri tia kini, Mi ka te feta Munguni pi ni, ’ba ’yopi mi tia, Mi fe ma dri yi mvu ’diniri eri a’di’i yari be ra, te’do mi zi eri tia azini eri fe mi dri yi idriniri ’bo.

¹¹Oku nga ’yo eri tia, Opi, afa mi dri yi ekozuni yo, yi a’di ovu ’bile alirua; mi di ani yi idriniri isu ngoa ya?

¹²Mi aga ama a’bi Yakobo, ndra yi a’di ’diri fepi ama dri, eri ma ngulupi yi mvupi alenia, anzi pie, anyapa erini pieri ra ya?

¹³Yesu nga e’yo omvi ’yo tinia, ’Ba dria alu alu yi ’diri mvupiri, yi avijoni nga eri fu dika,

¹⁴te ’ba ka yi mani ngale fele eri driri mvu ra, yi avijo ngani eri fu ’dani ’dani ku; te yi mani ngale fele eri driri nga eca eri alia yi a’di egapi ega kpere idri ’dani ’daniri vuriru.

¹⁵Oku nga ’yo eri tia, Opi, mi fe ma dri yi ’diri, yi avijo kazu ma fuzu ku, ma kazu emuzu yi kozu kpere ’doa ku.

¹⁶Yesu nga ’yo eri tia, Mi mu agupi mini omve, mi emvi ’doa ndo.

¹⁷Oku nga e’yo omvi, ’yo eri tia, Ma agupi yo. Yesu nga ’yo eri tia, Mi ’yo, Ma agupi yo-ri ’yeke;

¹⁸a’disiku mi ale ndra agupi towi ’bo, mini ovuzu eri be curu’dori eri agupi mini yo; e’yo ’diri mi ’yo te adaru.

¹⁹Oku nga ’yo eri tia, Opi, ma va ra mi nabini.

²⁰A’bi amani adri ndra Mungu inzi oni ’doria; te emi ’yo kini pari ecopi onyiru ’bani Mungu inzizuri eri Yerusalemu’i.

²¹Yesu nga ’yo eri tia, Oku, mi a’i ma, etuni nga eca Ira, etu ndesi emi ngani Atani inzi oni ’diria ku, kani Yerusalemua ku indi.

²²Emi inzi afa emini nile kuri’i; ama inzi afa amani nile rari, te pata enga ’ba Yahudini vu.

²³Te etuni nga emu ra, eca di curu’do ’bo, etu ndesi ’ba inzipi asi adarusi ’diyi nga Atani inzi orindisi azini asi adarusi; te Atani ’ba eri inzipi ’dinile ’diyi ndru.

²⁴Mungu eri Orindini; ’ba eri inzipi ’diyi ma inzi eri orindisi azini asi adarusi.

²⁵Oku nga ’yo eri tia, Ma ni ra Mesiani emu ra (yini omvele Kristo’iri); eri ka emu ra, eri nga afa dria ma e’yo olu ama tia.

²⁶Yesu nga ’yo eri tia, Ma e’yo ’yopi mi tiari, ma eri’i.

²⁷’Di ma vutia coti ’ba erini imbale ’diyi eca ra. Yi nga osu osu erini e’yo ’yole oku berisi, te ’ba aluni ’yoni, Mi a’di ndru ya? kani, Mi e’yo ’yo eri be a’disi ya? ’dinini ku.

²⁸Oku nga imvu erini ku ani, nga fu mu aku amborua, nga ’yo ’ba nde ma tia,

²⁹Emi emu ’ba afa dria mani ’yele ra ’diyi ma e’yo olupi ma tiari ndre. ’Ba ’diri eri Kristo’i yani?

³⁰Yi efu akuasi, yi emu eri vu.

³¹E’yo ’diri ma eselia ’ba erini imbale ’diyi nga zi eri kini, Rabi, mi nya fo.

³²Te eri ’yo yi tia, Nyaka mani nyazaru emini nile kuri indi.

³³Te ’ba erini imbale ’diyi ’ba e’yo ’yo yi eselia, ’Ba azini eji nyaka eri dri ra ya?

³⁴Yesu nga ’yo yi tia, Mani e’yo ’ba ma ti pepirini leleri ’yezu, azi erini dezuri, eri nyaka mani.

³⁵Emi ’yoni kini, Ace mba su, ewu anya lozuri nga eca ra, ’dini ku ya? Te mi ndre, ma ’yo emi tia, Emi enga emi mile uru, emi ndre amvu, ’du drile ’wi curu’do lozaru ’bo.

³⁶’Ba anya lopiri adri oya ini isu ra, eri efi kaza oku cazu idri ’dani ’daniria, ’dini ’ba ori ripiri ’ba anya lopiri be ma ovu ayikosi tualu.

³⁷E’yo ’diri ma alia e’yo o’bezani eca adaru, kini, ’Ba aluri ori ri, ’ba aziniri anya lo.

³⁸Ma pe emi ti anya emini azini ngale emi’i kuri lozu; ’ba azini yi nga azini, te emi fi azi yini ngaleri ma alia ’bo.

³⁹’Ba Samariaa ’diyi ma azi kakau a’i eri e’yo eti okuni nzele eri ma e’yosi kini, Eri olu ma tia e’yo dria mani ’yele ’diyi rarisi.

⁴⁰’Ba samariaa ’diyi ka emu eri vu, yi nga di a’i tinia ovuzu yi be; eri nga di ovu ’daa o’du iri.

⁴¹’Ba azini karakarau yi a’i eri e’yo ’yoza erinisi,

⁴²Yi ’yo oku tia kini, Curu’do ama a’i ra e’yo mini ’yolerisi ku, te ama ngulupi eri amani ’bo, ama ni ra adaru ’ba ’diri eri ovu ’Ba ’ba nyakua ’diyi Opapiri’i ndi ndi.

⁴³O’du iri ma vutia eri fu ’daasi mu Galilia.

⁴⁴Te Yesu ma ngulupi nze e’yo eti kini, nabi ovuni inzizaru angu inia ku.

⁴⁵Eri ka eca Galilia ’bo, ’ba Galilia ’diyi a’i eri ra, yini afa dria erini ’yele Yerusalemua omu ma alia ’diyi ndrelerisi; te yi alu indi, yi mu ndra omu ndea.

⁴⁶Eri nga di ca dika Kana Galilia pari erini yi ojazu patiefi sururia. ’Ba alu ovupi meleki ageiari indi, mvi erini ovu azoru Kaperinaumua.

⁴⁷Eri ka eri kini Yesu enga Yudiaarisi fi Galilia ’bo, eri mu vunia nga matu ’ba eri vu eri ma si va i mvi ma rua atizu, erini ’yele ebile ebirisi.

⁴⁸Te Yesu nga ’yo eri tia ani, Emi ka eceta piyi ndre tali be ku, emi ngani a’i aluni ’de ku.

⁴⁹’Ba ovupi meleki ageiari nga ’yo eri tia, Opi, mi si mu de nga mva mani drani ku fo!

⁵⁰Yesu nga ’yo eri tia, Mi mu; mi mvini idriru. Agu nde a’i e’yo Yesuni ’yole i tiari ra, mu ra.

⁵¹Erini nga muria siria andraleru, ati’ba erini nga dri fu eri be, kini eri ma mvini idriru,

⁵²Eri nga etu mva ma ruani ’bazu atizuri zi yi ria, Yi ’yo eri tia, Aje etu aziri rua driza ku eri ra.

⁵³Atani nga ni ani etu nderi eri etu Yesuni ’yozu eri tia, Mi mvini idriruri’i; eri a’i eri ra, eri’i ’ba i vile joa ’diyi be dria.

⁵⁴’Di tali Yesuni iriri, erini engaria Yudiaasi efiria Galilia ’boria.