Read lugbara Yohana 5 Bible Online

Yohana 5 - lugbara bible

Yohana 5

¹E’yo ’diyi ma vutia omu ’ba Yahudini nga ovu indi; Yesu nga tu mu Yerusalemua ani.

²Isu de ’bile yini egazu aleniari lindi Yerusalemua kabilo vile kalitilia, yini omvele ’ba Yahudini ma tisi Betesida’iri, eri ovo jobileko eti be towi.

³’Ba azoru karakarau yi adri la jobileko eti ’diyia, ’ba mile odraza piyi, ’ba acozaru ’diyi pie, ’ba rua ondripi ondri ’diyi pie, yini osaza yini teria.

⁴Te ewu alu alu azinisi malaika Opiniri adri esi fi ’bile yini egazuria, fezu yini adizu; ka’dini ’ba fipi yia adiza ma vutia okori ma ruani nga eca alaru ra, azo ka ovu ngoni ti.

⁵Agu azini ’daa indi ovupi dra erini be eli kali na drini arori.

⁶Yesu ka ndre erini laria, erini niria ewu aga drinia izuru, eri ’yo eri tia, Mi le mi rua ma eca alaru ra ya?

⁷Agu rua azo beri nga e’yo omvi eri ria, Opi, yi ka adi ra, ’ba mani ma ’bepi yi egaza ma aliani yo, te mani nga emuria, ’ba azini nga si va mani oko.

⁸Yesu nga ’yo erini ria, Mi enga uru, mi ’du pari mini, mi aci.

⁹Perepere agu nde ma rua nga eca alaru ra, eri ’du pari erini, eri ’ba ad aci. De o’du ’dari sabatoni.

¹⁰E’yo ’disi ’ba Yahudini nga ’yo ’ba rua atizari ma ria, Andru o’du sabatoni, azita a’ini mini pari ’duzu ku.

¹¹Te eri nga e’yo omvi yi ria, ’Ba ma rua atipi alaruri ’yo ma ria, Mi ’du pari mini, mi acirini.

¹²Yi zi eri ria, Agu ’yopi mi tia, Mi ’du pari mini, mi aciri a’di’i ya?

¹³Te ’ba ruanini atileri nini eri a’di’i yari ku; isu de Yesu nga ’daarisi ra, ’ba karakarauni ovule ’daa cirisi.

¹⁴Vilerisi Yesu nga eri isu hekalua, nga ’yo eri ria, Mi ndre, mi rua ati alaru ’di! Mi ma ’ye onzi dika ku, afa onzi agapiri kazu i ’yezu mi ruaa ku.

¹⁵Agu ’diri nga mu ’yo ’ba Yahudini ma ria kini ’ba i rua atipi alaruri eri Yesu’i.

¹⁶E’yo ’disi ’ba Yahudini e’do Yesuni inza, erini afa ’diri ’yele o’du sabatonisirisi,

¹⁷Te Yesu nga e’yo omvi yi ria, Ma Atini azi nga kpere curu’do, ma azi nga alu indi.

¹⁸E’yo ’disi ’ba Yahudini ndru eri fuzu aga okori ra, a’disiku erini e’yo sabatoni ezale a’dule kurisi, erini vini Mungu omvele i Ati’i, i ’bazu Mungu be trotrorisi.

¹⁹E’yo ’disi Yesu nga e’yo omvi ’yo yi tia, Ma ’yo emi tia ndi ndi, Mvi econi afa aluni ’yezaru i drisiku, te kiri afa erini ndrele Atani ’yeleri’i; te afa dria erini ’yele ’diyi, Mvini ’ye alu indi.

²⁰Te Ata le Mvini, eri ece eri dri afa dria eri ma ngulupini ’yele ’diyi ra; eri nga eri dri azi ambo azi nde agapi ra ’diyi ece indi, emi asi ma osu ani.

²¹Ekile Atani ’ba draza engale idri fezu yi dririle, ’dinile indi Mvini, idri fe ’ba eri ma asini lele ’diyi ’dri,

²²Te Ata lini e’yo ’ba aluni ma dria ku, te eri fe e’yo liza dria Mvi dri ’bo,

²³’dini ’ba dria ma inzi Mvini ani, yini Atani inzilerile. ’Ba Mvini inzipi kuri inzini Ata eri ma ti epepiri ku.

²⁴Ma ’yo emi tia ndi ndi, ’ba e’yo mani eripi, ’ba ma ti epepiri a’ipi indiri, ovu idri ’dani ’dani be, eri fini e’yo liza ma alia ku, te eri aga dra ma aliasi fi idri ma alia ’bo.

²⁵Ma ’yo emi ria ndi ndi, etuni emu emu, eca di curu’do ’bo, eri etu ’ba draza ’diyini ngazu Mungu Mvi ma o’duko erizuri’i, te ’ba eripi ’diyi nga ovu idri be.

²⁶Ekile Atani ovule idri be i ma ngulupisirile, ’dini eri fe vini Mvini ovuzu idri be i ma ngulupisi indi,

²⁷azini eri fe okpo eri dri e’yo lizu, erini ovule Mvi ’banirisi.

²⁸Emi asi ma osu e’yo ’dirisi ku; te etuni emu ra, etu ndesi ’ba dria ovupi nyadria ’diyi nga o’duko erini eri ra,

²⁹yi di nga efu ra, ’ba azi onyiru ’yepi ’diyi nga fi engata idriniria, te ’ba azi dri fupi kuri ’yepi ’diyi nga fi engata e’yo lizaniria.

³⁰Ma econi afa ’yezaru ma drisi aluni ku; ma e’yo li ekile mani erilerile; e’yo mani lileri eri kililiru, mani e’yo ma asini leleri ndrule ku te e’yo ’ba ma ti epepirini leleri ndrule’irisi.

³¹Te ma ka e’yo maniri ma eti nze, e’yo eti nzeza maniri ovuni adaru ku;

³²’ba e’yo mani ma eti nzepiri eri ’ba azini, ma ni ra e’yo eti nzeza erini nzele masiri eri adaru.

³³Emi pe ojiou ti Yohana vu, eri nze e’yo adaruri ma eti ’bo.

³⁴Te e’yo eti nzeza mani a’ileri engani ’ba vu ku; te di ma e’yo ’diyi ’yo, emi ma ovu pazaru ani beni.

³⁵Eri ovu tala ’izaru diza dipiri’i, emi asi le ndra ovuzu ayikosi ewu weresi diza erini ma alia.

³⁶Te e’yo eti nzeza mani ovuzu eri beri aga Yohananiri ra; te azi Atani fele ma dri mani yi dezu ani, azi nde mani ’yele ’diyi yi e’yo mani ma eti nzeni, kini Ata epe ma tini.

³⁷Ata ma ti epepiri eri nze e’yo mani ma eti ’boo Engazu drio emi erini nga eri ma o’duko ku, emi ndreni vini wura erini ku indi;

³⁸emi ovuni e’yo erini be emi alia ku, emini ’ba erini tini epeleniri a’ile kurisi.

³⁹Emi ndru e’yo siza ma alia, emini egale kini emi idri ’dani ’dani isu yi ma aliarisi; te e’yo siza nde ’diyi yi e’yo mani ma eti nzeni;

⁴⁰te emi leni emu ma vu emini idri isuzu ku.

⁴¹Ma a’ini inzita ’ba vu ku.

⁴²Te ma ni emi ra, kini emi ovuni leta Munguni be emi alia ku.

⁴³Ma emu ma Ati ma rusi ’bo, te emi a’ini ma ku; ’ba azini ka emu i ma ngulupi ma rusi, emi nga eri a’i ra.

⁴⁴Emi ’ba inzita a’ipi emi eselia ceni ceni ’diyi, emi eco ovuzaru a’ita be ngoni ngoni ya, de emi ndruni inzita engapi Mungu aluri vuri ku ya?

⁴⁵Emi ma ega ma nga asu su emi ruaa Ata vu ’dini ku; ’ba asu supi emi ruaari Musa emini asi ’bale driniari’i.

⁴⁶Te emi ka Musani a’i ra, emi te ma a’i indi, a’disiku eri si e’yo mani.

⁴⁷Te emi ka e’yo siza eriniri a’i ku, emi nga e’yoi ’yoza mani a’i ngoni ngoni ya?