Read lugbara Yohana 7 Bible Online

Yohana 7 - lugbara bible

Yohana 7

¹E’yo ’diyi ma vutia Yesu ad Galilia; te eri leni aci Yudiaa ku, ’ba Yahudini yini ndrule eri fuzurisi.

²Isu omu ’ba Yahudini, omu ’bani nyale borokoari, eri eca ogogo,

³Adripi erini nga di ’yo eri ma tia ani, Mi ku angu ’dori, mi mu Yudiaa, ’ba mini imbale ’diyi ma ndre ’yeta mini mini ’yele ’diyi indi beni.

⁴Te ’ba lepi i e’dapi mgboruri ma aluni ’yeni e’yo ndindiru ku. Mi ka e’yo ’diyi ’ye, mi ece mi ngulupi nyaku dri.

⁵Te ka adripi erini ti, yi a’ini eri ku.

⁶Yesu nga ’yo yi tia ani, O’du mani ecani nga ku, te o’du emini eri ’dere ’dani.

⁷Nyaku econi emi nguzaru onzi ku, te erii ngu ma’i, mani e’yoni ma eti nzele kini ’yeta erini onzirisi.

⁸Emi tu mu omua; ma ngani tu omu ’diria nga ku, o’du manini ecale nga parinia kurisi.

⁹Eri ka e’yo ’diyi ’yo yi tia ’bo, eri ovu ’dani Galilia.

¹⁰Te adripi erini ka tu mu omua ’bo, eri nga di tu mu alu indi, muni mgboru ku, te ndindirule.

¹¹’Ba Yahudini nga di eri ndru omu ma alia ani, kini, Agu nderi ngoa ya?

¹²’Ba ongulumuru ono yi eselia erisi tu. ’Ba azini ’diyi kini, Eri ’ba onyiruni; azini kini, ’Dini yo, te eri ’ba ongulumuru ici.

¹³Te ’ba aluni ’yoni eri ma e’yo mgboru ku, yini ’ba Yahudini rulerisi.

¹⁴Te o’du omuni ’diyi ka ca agadua ’bo, Yesu tu fi hekalua ’ba imbazu.

¹⁵’Ba Yahudini yi osu tu kini, ’Ba ’diri ni buku lazu ngoni ngoni ya, de imbani ndra nga eri ku?

¹⁶Yesu nga di e’yo omvi yi tia kini, Imbata mani eri maniri ku, te ’ba ma ti epepiriniri’i;

¹⁷te ’ba azini ka le e’yo erini leleri ’ye, eri nga imbatani ni ra, kani eri ibi enga Mungu vu, kani ma e’yo ’yo ma drisi yani.

¹⁸’Ba e’yo ’yopi i drisiri eri i ma ngulupi ma diza ndru’i; te ’ba ’ba eri ma ti epepiri ma diza ndrupiri, eri ’ba adani, e’yo onzi vini eri ma alia yo.

¹⁹Musa feni ndra azita emi dri ku ya? Te ’ba alu emi eselia azita nde ’yepini yo. Emi geri ndru ma fuzu a’disi ya?

²⁰’Ba ongulumuru omvi e’yo, Mi orindi onzi be! A’dini geri ndru mi fuzuni ya?

²¹Yesu nga e’yo omvi ’yo yi tia, Ma ’ye azi alu ’bo, emi dria osu tu ani.

²²Musa fe emi dri agele lizani (te di, engani Musa vu ku, te a’bipi vu); o’du sabatonisi emi di adri ’ba ma agele li.

²³Te ’ba ka agele liza a’i o’du sabatonisi, azita Musani kazu ovuzu ezazaru ku beni, emi di ovu adrasi ma vu mani ’ba pi ma rua atile dria alaru o’du sabatonisirisi ya?

²⁴Emi ma li e’yo ’ba ndrezu milesi ku, te emi li e’yo kililiru.

²⁵’Ba Yerusalemua ’diyi ma azi nga di ’yo ani, ’Dori agu ’bani gerini ndrule eri fuzuri’i ku ya?

²⁶Te mi ndre, eri e’yo olu mgboru te ’ba ’yoni e’yo azini eri tia ku! Kani ’ba ’wara ni di ada ada ’ba ’diri eri Kristo’i ya?

²⁷Te di ama ni pari ’ba ’dirini ibizu engazuri ra; te Kristo ka emu ra, ’ba aluni ngani pari erini ibizu engazuri ni ku.

²⁸Yesu nga di tre o’duko urusi hekalua, erini ’ba imbaria, ’yo kini, Emi ni ma ra, emi ni pari mani engazuri indi. Ma emuni ma drisi ku, te ’ba ma ti epepiri eri adaru, emini nile kuri’i.

²⁹Ma ni eri ra, mani enga ale eri vurisi, eri pe ma tini.

³⁰Yi ndru eri bizu; te ’ba aluni dri ’bapi ruaniani yo, eri ma etuni ecale nga kurisi.

³¹Te ’ba kakau ’ba ongulumuru ma eselia a’i eri ra; yi ’yo kini, Kristo ka emu ra, eri nga eceta ’ye kakau aga ’ba ’dirini ’yele ’diyi ra ya?

³²’Ba Farisaini eri ’ba ongulumuruni e’yo ’diyi onoria eri ma e’yosi, kuhani ambo piyi ’ba Farisaini be nga di asikari yini ti pe eri bizu.

³³Yesu nga di ’yo ani kini, Ace nga were ma ovu emi eselia, ma nga di mu ’ba ma ti epepiri vu ndo;

³⁴emi nga ma ndru ra, te emi ngani ma isu ku; emi econi muzaru pari mani ovuzuria ku.

³⁵’Ba Yahudini nga ’yo yi eselia ani kini, ’Ba ’diri nga mu ngoaru, amani ngazu ani eri isuzu ku? Eri nga mu ’Ba yi Erepi ’ba Girikiru ’diyi ma eselia ’diyi vu, ’ba Girikini imbazu indi?

³⁶E’yo erini ’yole kini, Emi nga ma ndru ra, te emi ngani ma isu ku; azini, Emi econi muzaru pari mani ovuzuria ku, ’diri a’di e’yoni ya?

³⁷O’du omuni i dezurisi, o’du nde o’du amboni, Yesu nga pa so, nga tre o’duko urusi kini, Yi avijo ka ’ba fu ra, eri ma emu ma vu, ma mvu beni.

³⁸’Ba ma a’ipiri, yi ara yi idriruni ’diyi nga era eri ma aliarisi, ekile e’yo sizani ’yolerile.

³⁹Te eri ’yo e’yo ’diri Orindi ’ba eri a’ipi ’diyini ’yele a’ileri ma e’yosi; te Orindi ovuni nga fezaru ku, de nga Yesu fini diza erini ma alia ku,

⁴⁰’Ba azini ’ba ongulumuru ma eselia ka e’yo ’diyi eri ra, nga di ’yo ra, ’Ba ’diri nabi nderi’i adaruri’i.

⁴¹’Ba azini kini, ’Ba ’diri eri Kristo’i. Te ’ba azini kini, Kristoni nga enga Galilia ra ya?

⁴²E’yo siza ’yoni Kristoni nga efu ori Daudini ma alia, engazu aku Betelehemua pari Daudini ovuzu ndra okori ma alia ku ya?

⁴³Agata nga efu ’ba ongulumuru ma eselia ani erisi,

⁴⁴’Ba azini yi eselia le eri bi, te ’ba aluni ’bani yi dri ruania ku.

⁴⁵Asikari emvi emu ani kuhani amboru ’diyi pi vu ’ba Farisaini be; ’ba ’dayi ’yo yi tia, Emi ejini eri ku a’disi ya?

⁴⁶Asikari yini nga e’yo omvi ani kini, Engazu drio ’ba aluni ’yoni ekile agu ’dirini ’yolerile ku

⁴⁷’Ba Farisaini nga e’yo omvi yi tia, Fe vini emini abazu alu indi ya?

⁴⁸’Ba ’wara ’diyi ma azi ’ba Farisaini be a’i eri ra ya?

⁴⁹Te ’ba ongulumuru azita nipi ku ’diyi yi ovu trita be yi ma dria.

⁵⁰Nikodemu ’ba ndra emupi Yesu vu oko, ovupi yi ma eseliari, ’yo yi tia,

⁵¹Azita amani adri e’yo ’bani li de nga ’ba erini e’yo agu nderi ma tia, e’yo erini ’yeleri nizu oko raka ku ya?

⁵²Yi nga e’yo omvi, ’yo eri tia, Mi alu indi mi Galiliouni ya? Mi ndru, mi ndre indi kini nabi aluni engani Galilia ku.

⁵³’Ba dria alu alu mu yi akua,