Read lugbara ’Yeta 11 Bible Online

’Yeta 11 - lugbara bible

’Yeta 11

¹’Ba ti opele azini adripi ovupi Yudiaa ’diyi, yi eri e’yo ’ba Jururu ’diyini e’yo Munguni a’izu indiri.

²Te Petero ka tu Yerusalemua, ’ba azini ’ba liza ’diyi ma eselia ga agata eri be,

³’yozu kini, A’di e’yosi mi fi ’ba lile ku ’diyi ma eselia nyaka nyazu tualu yi be?

⁴Te Petero ’ba e’yo ece yi dri alu alu kini:

⁵Ma ovu ndra aku amboru Yoparia Mungu zizu; ma avani otiria ma ndre eceta alia afazu ekile bongo walarule, o’izaru oji kalania su ’diyia, osile va engazu ’buari; eri esi va ma vu.

⁶Mani mile suria ruania okposi, ma dro asisile drinia, ma ndre anyapa pa su be ’diyi dria, anyapa asea ’diyi be, afa acipi agatisi ’diyi, aria ’bua ’diyi be indi.

⁷Te ma eri o’dukoni ’yoria ma tia kini, Mi enga, Petero; mi li, mi nya,

⁸Te ma ’yo, ’Dini yo, Opi; te afa saaru azini alatara kokoru fini nga drio ma tilia aluni ku.

⁹O’duko omvi e’yoni pale iririsi engazu ’bua kini, Afa Munguni ’bale alatararu ’diyi mi ma omve yi saaru ku.

¹⁰E’yo ’diri ovu ’yezaru ’dini pale na, vutinia afa dria ovu ’duzaru dika ’bua.

¹¹Mi ne, coti ’ba na tini epele ma vu engapi Kaisariaa ’diyi yi oso pa jo amani ovuzuri ma drilialeru.

¹²Orindi nga ’yo ma tia kini, Mi mu yi be ’ba ma esele cozu ku. Adripi azia ’diyi nga mu ma be tualu, ama fi ’ba nderi ma joa.

¹³Eri nga ece ama dri e’yo erini malaika nezu pa soria jo ini ma aliari, ’yo eri tia kini, Mi pe ’ba ti Yopaa Simoni yini omvele Peterori omvezu;

¹⁴eri nga mi dri e’yo olu mini ngazu mi pazu ani, mi’i tualu ’ba mi vile joa ’diyi be dria beni.

¹⁵Mani ’baria ’yoria, Orindi Alatararuri nga esi va yi dria ekile ama dria okorile,

¹⁶Ma nga di e’yo Opini ndra ’yoleri ega, kini, Yohana fe ndra ini baputizi yisi, te emi’i, emi nga baputizi bi Orindi Alatararusi.

¹⁷Awa’dini Mungu ka feta fe yi dri trotro erini fele ama dri amani Opi Yesu Kristo a’izurisirile, ma a’di’i ya ecozu Mungu ogazu ’dini?

¹⁸Yi ka e’yo nderi eri ’bo, yi ovu ciri, azini yi inzi Mungu ’yozu kini, Ka’dini Mungu fe luru dri asi ojazu fizu idria indi.

¹⁹Te ’ba ovupi erezaru inzata engapi Setefano ma e’yosirisi ’diyi, yi ca kpere Foenikia azini Kuporoa azini Antiokiaa, yi olu e’yo kiri ’ba Yahudini dri a’dule.

²⁰Te ’ba azini yi eselia, ’ba engapi Kuporoa azini Kurenea ’diyi, yini ecaria Antiokiaa yi ’ba e’yo ’yo ’ba Girikiru ’diyi tia indi, Opi Yesuni oluzu.

²¹Dri Opini ovu yi be, ’ba ongulumuru kakau a’ipi ’diyi yi oja yi Opi vu.

²²E’yo yini ku cazu kpere kanisa ovupi Yerusalemuari ma bilia, yi pe Baranaba ma ti Antiokiaa.

²³Erini ecaria, erini asi ndriza Munguni ndreria, eri ovu ayikosi;eri omi asi yini dria yi ma ’ba asi yini okporu yi ebizu Opi vu ’dani;

²⁴erini ovule ’ba onyi be, gazaru Orindi Alatararusi azini a’itasi trerisi. Te ’ba kakau lo’ba yi Opi vu.

²⁵Te Baranaba fu muzu Tarisoa Sauioni ndazu;

²⁶ka eri isu ’bo, eri ji eri Antiokiaa. Eri eca ’dini, eli alu pi ma alia yi eci yi ti tualu ’ba kanisani be, yi imba,’ba karakarau; ’ba e’do ’ba Yesu vuti bipi ’diyi ma ru omve ’ba Kristoniru okoni Antiokiaa.

²⁷Ewu nderisi nabi esi engazu Yerusalemua ecazu Antiokiaa.

²⁸’Ba alu yi eselia eri ma ru Agabo, eri so pa uru e’yo ondrizu Orindisi kini tiki amboruni nga ’de angu wudrikuru dria ma alia; eri eca ’dinile ewu Kilaudionisi.

²⁹’Ba Yesu vuti bipi ’diyi ’ba asi yini afa feza ti pezu adripi Yudiaa ’diyi vu ekile yi alu aluni ecolerile;

³⁰yi ’ye ’dini indi, tini pezu ’ba ’wara vu Baranaba pi ma dria Saulo be.