Read lugbara ’Yeta 16 Bible Online

’Yeta 16 - lugbara bible

’Yeta 16

¹Te eri eca Derebea azini Lusiteraa indi. Emi ne, ’ba Yesu vuti bipiri alu ’daa, runi Timoteo’i. Eri ovu oku Yahudiniru a’ipiri ma mvi, te ata erini eri ’ba Girikini.

²Adripi Lusiteraa ’diyi Ikoniaa ’diyi be, yi eri ma ru idu idu.

³Paulo le eri ma mu i be; eri ’du eri, li ageleni ’ba Yahudini ovupi angu nderi ma alia ’diyi ma e’yosi, a’disiku yi dria ni ata erini ovu ’ba Girikini.

⁴Yini agaria aku amboru ’diyi ma aliasi, yi fe azita ’ba ti opele ’ba ’wara Yerusalemua ’diyini azileri, yi ma mba yi ma ta ani.

⁵’Dini ’ba kanisani ’diyi yi omba okporu a’itasi, kalafe yini ezu etuzu indi.

⁶Orindi Alatararuni ogale yi dri e’yo olukokoru Asiaa sirisi, yi aga ’angu Ferugia pia Galatia be.

⁷Yi ka ca ogogo Musiaa, yi o’bi fi Bituniaa, te Orindi Yesuni oga yi fiko si;

⁸’dini yini agaria Musiaa yi ca Troaa.

⁹Paulo ndre eceta inisi: agu Makedoniaari so pa matu ’bazu eri vu ’yozu kini, Mi ezo Makedoniaa ama aza kozu!

¹⁰Erini eceta nderi ndreria ’boria, coti ama nda leti fuzu muzu Makedoniaa, amani varia ndi ndi Mungu omve ama e’yo bari oluzu yi tia ’bo.

¹¹Ama zo ogurusi engazu Troaa muzu kilili cazu Samotrakea, drusi ’dini ama ca Neapolia.

¹²Engazu ’dale ama ca Filipia, eri ovu aku ambo aku Makedoniaa azini ’diyi agapi rari, eri angu ’ba Romani sileri. Ama nga ovu aku nderi ma alia o’du were.

¹³O’du sabatonisi ama fu aku tia muzu yi raza tia, pari amani egale ’ba adri Mungu zi aleniaria; ama ri va e’yo ’yozu oku yi okupi tualu ’diyi be.

¹⁴Oku alu runi Ludia’i, eri enga aku amboru Tuatiraa, eri ovu ’ba rangi bongo wura ojazuri ozipiri, eri ’bi Mungu rupiri indi, eri eri ama ra. Opi zi asi erini e’yo Pauloni oluleri a’izu.

¹⁵Eri ka baputizi bi ’bo, ’ba ovupi eri vile joa ’diyi be dria, eri ’ba matu ama vu kini, Emi ka ega ma ovu ’ba Opini adadaru, emi emu jo mania ovuzu wa’di maniru fo! Eri omi ama okposi.

¹⁶Eri eca ’dini, amani muria pari ’bani adrizu Mungu zizuria, ama fu dri zamva alu ati’boru be. Eri ovu orindi e’yo ondripiri be, eri eji ’orodri amboru opi ini dri erini andri Idrilerisi.

¹⁷Eri bi Paulo pi ma vuti ama be, oyuzu uru kini, Agu ’diyi yi ovu ati’ba Mungu Uru Turini, yi olu emi dri geri patani.

¹⁸Eri ’ye ’dini o’du kakau. Te Paulo ma asi ande e’yo nderisi, eri oja i, ’yo orindi tia kini, Ma dro mi ru Yesu Kristonisi, mi fu eri ma aliasi ra! Eri fu coti.

¹⁹Te ’ba eri jepi ’diyi ka ndre geri yini orodri isuzuri avi ra, yi obi Paulo pi Sila be, yi ose yi pari ’bani afa jezuria, ’ba ’ba dri cepi ’diyi ma drilia.

²⁰Yi ka ca ’ba e’yo lipi ’diyi vu ’bo, yi ’yo kini, ’Ba ’diyi yi osa aku amani tu, yi Yahudini.

²¹Yi olu ama dri adriza ana’i ’ba Ruminiru ’diyini ecole a’ile kani ’yele ku ’diyi.

²²’Ba ongulumuru yi enga yi ruaa tualu; azini ’ba e’yo lipi ’diyi yi osi bongo yi ma ruaa ra, azi yi cozu kalisi.

²³Yi ka yi co kalisi kakau, yi o’be yi arujoa, yi azi ’ba arujo agei tepiri eri ma te yi agei okporu.

²⁴’Ba nderi yini e’yo ’diri aziria eri tia ’boria, eri ’be yi jo alialeruria, azini eri osu yi ma pa pati okaliru ’ba ma pa ecizuri ma alia.

²⁵Iniayii Paulo pini Mungu ziria Sila be, yi ri ongo ngo Mungu vu, ’ba azini arujoa ’diyi yi co bile yi erizu.

²⁶Coti oyakia amboru eca, arujo ma eti ’ba ya ya ani; coti jotile dria ovu zizaru mgbo, azini anziriku ’ba driani ovu ayuzaru.

²⁷’Ba arujo ma agei tepirini oruria o’duarisi, erini neria arujotile ovu ozizaru, eri enze sei ini, eri ’ye i fu ani, erini osule ’ba aruru apa ’borisi.

²⁸Te Paulo oyu o’duko urusi kini, mi ’ye mi onzi ku, te ama dria do

²⁹Eri omve ad, eri mbu arujo alia; eri roani yaria urisi eri eco i va Paulo pi ma drilia Sila be,

³⁰eri ji yi amve, eri ’yo yi tia ’dini kini, Opi la! ma ma ’ye sini ya ovuzu pazaru?

³¹Yi ’yo eri tia, Mi a’i Opi Yesuni, mi nga mi pa ra, mi’i, ori’ba mini pie dria.

³²Yi olu e’yo Opini eri tia ’ba ovupi eri vile joa ’diyi be dria.

³³Eri ji yi ini nderisi coti, eri oji bile yi cozuri indi; eri bi baputizi coti, ’ba erini ’diyi be dria.

³⁴Eri ji yi uru i vile jo alia, fe nyaka yi dri; eri ovu ayikosi tu erini Mungu a’ile ’bo ’ba i vile joa ’diyi be driarisi.

³⁵Angu ka ati ’bo, ’ba e’yo lipi ’diyi pe asikari ti ’yozu, Mi otru ’ba ajeka ’dayi.

³⁶’Ba arujo agei tepiri ’yo e’yo ’diri Paulo ma tia ’dini, kini, ’Ba e’yo lipi ’diyi epe ’ba ti emi otruzu; e’yo ’disi emi fu di mu asi anzuru be.

³⁷Te Paulo ’yo yi tia kini, Yi co ama ’ba ma milia ayii, ama e’yo likokoru, de ama ’ba Rumini, o’be ama arujoa; le curu’do ama ose o’be amve ndindiru ya? ’Dini ngoa ya Onyiru yi ma ngulupi ma emu ama ofuni.

³⁸Asikari ece e’yo ’diyi ’ba e’yo lipi ’diyi dri, te yi ovu urisi ka eri kini yi ’ba Rumini;

³⁹yi emu ani, yi ka yi ma asi omi ’bo, ofu yi amve, le yi ma mu, ma ku aku nde ’diri ra,

⁴⁰Yi fu di arujoasi ra, yi mu fi Ludia vile joa; yi ka adripi ndre ’bo, ka yi asi omi ’bo, yi mu ra.