Read lugbara ’Yeta 17 Bible Online

’Yeta 17 - lugbara bible

’Yeta 17

¹Yi ka aga Amfipoliasi azini Apoloniaasi ’bo, yi ca Tesalonikia, ’daa pari ’ba Yahudini yi okuzuri indi.

²Paulo ’ye ekile erini adrile ’yelerile, fi ’ba ’diyi vu, te o’du sabatoni pi pi na ’diyisi eri ga agata yi be e’yo sizasi,

³erini efini nzeria azini operia eceria adaru yi dri kini eco ndra Kristo ma nya candi, ma enga ’ba draza ma eseliarisi ra, ’yozu indi, Yesu ’diri mani olule emi tiari eri Kristo’i.

⁴’Ba azini yi eselia a’i ra, eci yi Paulo pi vu Sila be; ’ba Girikini Mungu rupi ’diyi kakau ’ye ’dini indi, azini oku ’wara oku dri cepi ’diyi yi were yo.

⁵Te ’ba Yahudini yi ovu ma’yalasi tu, yi ’du ’ba onzi ’ba toko toko ’diyi ma eselia, yi oku ’ba ongulumuru amboru, yi ’ba otrena ambo aku nderi ezazu, yi mu ombasi Yasoni vile joa, yi ndazu ofuzu ’ba ongulumuru vu.

⁶Yi ka eco yi isuzaru ku, ’yi se Yasoni pi adripi azini ’diyi be, jizu ’ba amboru aku nde alia--’diyi drilia, yini oyuria kini, ’Ba wudrikuru ezapi ’diyi yi ecea vuni ’doa indi,

⁷te Yasoni a’i yi ra yi dria eza azita Kaisarini, ’yozu kini opi amboru azini indi, runi Yesu’i.

⁸’Ba ongulumuru azini ’ba amboru aku nde alia ’diyi ma asi ’ba oti oti yi ka e’yo nderi eri ra.

⁹Yi ka afa Yasoni pini bi arunaru ’ba jolokoru ’diyi be ’bo, yi tru yi ra.

¹⁰Coti adripi yi pe Paulo pi ma ti Sila be inisi muzu Beroyaa; yi ka ca ’dale ra yi mu fi jo ’ba Yahudini yi okuzuria.

¹¹’Ba ’doyi yi ovu onyiru aga ’ba ovupi Tesalonikia ’dayi ra, a’disiku yi a’i e’yo nderi avasi e’yo siza ndazu etuzu, ndruzu nizu kani e’yo ’diyi ovu ’dinile yani.

¹²E’yo ’dirisi ’ba kakau yi eselia a’i ani, oku ’wara ’ba Girikini agupi be yi were yo.

¹³Te ’ba Yahudini ovupi Tesalonikia ’diyi ka e’yo Pauloni e’yo Munguni oluzu Beroyaa indiri eri ra, yi ecea ’dale indi ’ba ongulumuru ma asi ezazu asukolosi.

¹⁴Coti adripi yi pe Paulo ti muzu miri tia, te Sila pi awu nga ’dale Timoteo be.

¹⁵’Ba Paulo dri cepi ’diyi yi ji eri cazu kpere Atenea; Paulo ka yi azi yi ma ’yo Sila pi tia Timoteo be emuzu i vu mbele yini ecolerile ’bo, yi da dri mvizu.

¹⁶Pauloni yi teria Atenea, orindi erini ovu matusi erini ndrele aku ambo nderi ga tre wura toko ’bani inzile ’diyisirisi.

¹⁷E’yo ’disi eri ga agata ’ba Yahudini be jo yini yi okuzuri ma alia, ’ba engapi suru azinia Mungu inzipi ’diyi be indi, imba ’ba erini dri fuzu yi be pari ’bani aje jezuria ’diyi etuzu indi.

¹⁸’Ba azini ondua imbapi ’diyi, ’ba Epikurioni azini Sitoikini, yi fu dri eri be. ’Ba azini yi eselia ’yo ra kini, Agu e’imania be ’diri le e’yo ngoni ’yo ya? ’Ba azini kini, Eri ekile eri adrou o’diru ma e’yo olu ’ile-erini e’yo Yesuni olule engata erini berisi.

¹⁹Yi bi eri, yi ji Areopagoa, yi ’yo ra, Eco amani e’yo o’diru mini imbale ’dori nizaru ya?

²⁰Te mi eji e’yo o’diru ama bilia; e’yo ’disi ama le e’yo ’diyi ma efi ngoni yari nizaru

²¹Te ’ba dria Atenea ’diyi, azini ’ba ani’baru ovupi ’daa ’diyi be, yi ’yeni e’yo azini ku, le lu yini yi ma ’yo kani yi ma eri e’yo o’diru.

²²Te Pauloni pa soria Areopago ma agaduaria, eri ’yo kini: Emi ’ba Atenea ’diyi, e’yo driasi ma ndre emi ovu ’ba adrou emini inzipi tu ’diyi.

²³Te mani agaria geria ma one afa emini inzile ’diyi, ma isu orijo ’bani sile drinia, Mungu NILE KURI DRI-ri indi. Afa emini inzile nikokoruri ma olu emi tia’i.

²⁴Te Mungu nyaku ’bapi afa dria alenia ’diyi beri, eri Opi ’buni nyakuni indi, eri adrini adroujo ’bani sile drisi ’diyi ma alia ku;

²⁵’ba ma dri koni eri ma aza ku, wuni afasi ku, a’disiku eri ma ngulupi fe ’ba dri dria idri pi, ava ’yaza pie, afa dria beni.

²⁶Te eri ’ba ndra ’ba alu, eri ofu eri ma alia suru ’bani dria adrizu nyaku dria, eri pe ewu yini ekile erini egalerile, osi lokiri angu yini adrizurini indi;

²⁷’dini yi ma nda Mungu, kani yi eco o’bizu eri isuzu yani. Te di ovuni ama alu alu be ziri ku,

²⁸te Eri ma alia ama idriru, ama aci, ama ovu; ekile ’ba azini ’ba ongo ngopi emi eselia ’diyini ’yolerile, Te ama’i, ama ovu a’bianzi erini.

²⁹Ama ka ovu a’bianzi Munguni, eri onyiru yo ama ka ega Mungu ovu wura be melele, kani dahabule, kani oni onduouni opale ondua ’banisirile,

³⁰Te Mungu asini ndra ewu ’bani e’yo nizu kuri ma e’yosi ku, te curu’do eri azi ’ba dria dri pari dri dria asi ojazu,

³¹a’disiku eri pe o’du alu erini ngazu ’ba wudrikuru ’diyi ma e’yo lizu onyi alia, ’ba nde erini pele azi ndesirisi. Eri ece e’yo nde ma ada ’ba cina dri, erini ’ba nderi engale dra ma eseliarisi.

³²Te yi ka engata ’ba draza eseliari ma e’yo eri ra, ’ba azini yi gu gu, te azini yi ’yo ra, Ama nga e’yo ’diri eri mi vu dika,

³³’Dini Paulo fu yi eseliasi ra.

³⁴Te ’ba azini ’diyi eci yi eri be, yi a’i ra; ’ba ’diyi ma eselia Dionisio ’ba Areopagoni pi, oku runi Damari’iri pie, ’ba azini ’diyi pie.