Read lugbara ’Yeta 18 Bible Online

’Yeta 18 - lugbara bible

’Yeta 18

¹Vilerisi eri fu Ateneasi, ca Korintoa.

²Eri isu ’ba Yahudini alu engapi Pontoari runi Akula’i, eri eca nga 0’diru oku erini Pirisila be engazu Italiaa, a’disiku Kilaudioni azita fele ’ba Yahudini dri dria yi ma fu Rumiasi rarisi, Paulo mu yi vu;

³eri ovu yi be azi yinini ovule alurisi, yi nga azi tualu yini ovule iri tro ’ba hema edepi’diyirurisi.

⁴Eri imba sabato vusi dria jo ’ba Yahudini yi okuzuria, ’ba Yahudini ma dri esezu ’ba Girikini be, yi ma a’i beni.

⁵Sila pi ka eca engazu Makedoniaasi Timoteo be, e’yo ti Paule i ma asia tre e’yo oluzu, e’yo eti nzezu ’ba Yahudini dri kini Yesuni i Kristo’i,

⁶Yi ka e’yo erini onze ra, ka o’da indi, eri oya bongo ini ’yo yi tia kini, Ari emini ma on emi ngulupi dria! Ma’i, ma alaru Engazu curu’do ma nga mu ’ba Jururu ’diyi vu.

⁷Eri nga, eri ma fi Tito Yusito vile joa, eri ’ba Mungu inzipiri; jo erini ovu pari ’ba Yahudini yi okuzuri vu ogogo

⁸Te Kirisipo ambo jo ’bani yi okuzuri ma driliari a’i Opini, ’ba eri vile joa ’diyi be dria; azini ’ba Korintoa ’diyi kakau, yini e’ye eriria yi a’i ra, bi baputizi indi

⁹Opi ’yo Paulo tia inisi ecetasi kini, Mi ru ku, te mi olu ’dani, mi ovu ciri ku;

¹⁰a’disiku ma on mi be, ’ba aluni ecopi a’di ’dipi be mi ’yepi onzini yo; te ’ba mani aku ’dori ma alia ’diyi kakau

¹¹Eri ovu ’dale eli alu drinia mba azia, e’yo Munguni imbaria yi eselia.

¹²Ewu Galioni ’ba Akayaa ’diyi ma dri cezurisi, ’ba Yahudini enga Paulo ruaa asi alusi, ji eri oguna e’yo lizuri ma drilia,

¹³’yozu kini, ’Ba ’diri eri ’ba obe Mungu inzizu lekile azitani a’ile kurile.

¹⁴Te Paulo ka ’ye le tile ini zi e’yo ’yozu, Galio ’yo ’ba Yahudini ’diyi ma tia kini, Ka te ovu ezatani kani e’yo onzi turi, emi ’ba Yahudini, te’do leri onyiru mani emi erizu;

¹⁵te ka ovu agata gaza e’yo tokonisi, e’yo ’runisi azini azita emi ngulupini ma e’yosi, emi ma ngulupi ma ne e’yo ’diri emi’i; ma leni ovu ’ba e’yo ’diyi lipiriru ku.

¹⁶Eri dro yi oguna e’yo lizuriasi ra.

¹⁷’Ba dria bi Sositene, ambo jo ’bani yi okuzuri ma driliari, co eri oguga e’yo lizuri ma drilia. Te Galio ’bani asi e’yo nderi ma dria ku.

¹⁸’Di ma vutia Paulo ovu ’dale o’du kakau, vutinia eri zi di adripi ci ci, mu ra, eri fi oguru alia zozu Suriaa tualu Pirisila azini Akula be. Eri fa dribi ini Kenkereaa, erini oyo solerisi.

¹⁹Yi ka ca Efesoa eri ku yi ’dale; te eri ma ngulupi fi jo ’ba Yahudini yi okuzuria e’yo oluzu ’ba Yahudini be.

²⁰Te yi ka eri zi ovuzu nga yi be dika, eri leni ku;

²¹te eri zi yi ci ci, mu ra, kini, Mungu ka le ra ma nga emvi emi vu dika. Eri fi oguru alia engazu Efesoa.

²²Eri ka ca Kaisariaa ’bo, eri tu ’ba kanisani zi ci ci, nga di si Antiokiaa.

²³Erini ovuria ’dale o’du izu were ’boria, eri enga acizu pari dri dria angu Galatiaari pi ma eselia Ferugiaari be, eri fe okpo ’ba Yesu vuti bipi ’diyi dri dria.

²⁴’Ba Yahudini engapi Alegezandariaari, runi Apolo, eca Efesoa. Eri ’ba e’yo nipi turi, eri okporu e’yo sizasi indi.

²⁵Eri ovu ’ba imbale geri Opinirisiri; orindi erini di di eri ma asia, eri ’yo e’yo Yesuni imbazu kililiru, te eri ni kiri baputizi Yohanani.

²⁶Eri ’ba e’yo olu uri kokoru jo ’ba Yahudini yi okuzuria; te Pirisila pi ka e’yo erini ’yoleri eri Akula be ra, yi ’du eri, imba eri geri Mungunirisi kililiru aga okori ra.

²⁷Erini leria zozu Akayaa, adripi omi eri ma asi ’yezu ’dinile, yi si waraga ’ba Yesu vuti bipi ’dayi dri eri a’izu. Eri ka ca ’bo, eri ko ’ba a’ipi ’yeta anzutiri Mungunisi ’diyi ma aza tu,

²⁸a’disiku eri nde ’ba Yahudini teketeke agata gazasi ’ba dria ma milia ayii, ecezu geri e’yo siza ma aliarisi Yesuni Kristo’i.