Read lugbara ’Yeta 20 Bible Online

’Yeta 20 - lugbara bible

’Yeta 20

¹Omba nde ka i de ra, Paulo omve ’ba Yesu vuti bipi ’diyi, omi yi asi, zi yi ci ci, fu muzu Makedoniaa.

²Eri ka aci kala ’dasi eri omi yi asi e’yo kakausi, ca Girikia.

³Eri ka ovu ’dale mba na ’bo, eri ’ye zo ogurusi Suriaa, te ’ba Yahudini yi otu e’yo eri ruaa eri bizu, e’yo ’disi eri ovu onyiru eri ma milia mvizu geri Makedoniaarisi.

⁴’Ba mupi eri be cazu kpere Asiaa ’diyi yi ’di: ’ba Beroyaari Sopatero Puro mvi’i, ’ba Tesalonikia ’diyi Arisitariko pi Sekundo be, ’ba Derebea ’diyi Gayo pi Timoteo be, ’ba Asiaa ’diyi Tukiko pi Turofimo be.

⁵Te ’ba ’diyi mu ama drilia, yi te ama Troaa;

⁶te ama’i, ama enga Filipia o’du omu Mikate Akufi Kokorurini ’diyi ma vutia, fizu oguru alia zozu; 0’du towi ka yi de ra ama ca yi vu Troaa, ama ovu ’daa o’du aziri.

⁷O’du alu sabato ma vutiarisi, amani ama okuria tualu mikate nyoria, Pauloni leria dri kozu dru, eri ’yo yi be, oluzu izu jizu kuzu iniaayii.

⁸Tala kakau ovu jo uru-leru nde amani ama okuzu aleniari ma alia.

⁹Karilau alu runi Eutiko eri ri derisaa. De Pauloni e’yo oluria izuru, o’du ’be eri dii; o’du ka eri aga ra, eri e’de va engazu jo na uruleruria, ’ba eri e’dupi ’diyi isu eri dra ’bo.

¹⁰Te Paulo eri esi va eri vu, a’bu i eri dria, amvu eri, ’yozu kini, Emi ga lulu ku, re eri nga idriru,

¹¹Paulo ka tu uru eri onyo mikate, nya ra, vutinia eri nze e’yo yi be izu cazu kpere anguni atiria, ’dini eri mu ra.

¹²Yi eji karilau nderi idriru, isu asi omiza, amboru tu ani.

¹³Te ama’i, ama mu drile ogurua, ama zo muzu Asoa, pari: amani ngale Paulo ’duzuria; erini e’yo edele ’dinilerisi, kini i ngulupini nga mu pasi.

¹⁴Eri ka dri fu ama be Asoa, ama ofi eri ogurua, ama zo cazu Mitulenea.

¹⁵Engazu ’dale, drusi ama zo cazu Kio vu ogogo; drozi ama ca Samoa; drozi azi ’dasi ama ca Miletoa.

¹⁶Te Paulo ega i asia i ma aga Efesoni ra, i kazu ecezu Asiaa ku; a’disiku erini lele cale Yerusalemua mbele eri ka eco ra, ovuzu ’dale o’du Pentekositonisirisi.

¹⁷Miletoarisi eri pe ’ba ti Efesoa, omve ’ba ’wara kanisani ’diyi i vu,

¹⁸Yi ka eca eri vu, eri ’yo yi tia kini: Emi ngulupi ni adriza mani ovuzu emi eseliari ma e’yo engazu mani ndra ma pa ’bazu Asiaa o’du dria ecazu kpere curu’do,

¹⁹mani azi Opini ngazu asi e’yere be dria, mindresi, obeta ecapi ma vu e’yo ’ba Yahudini ’diyini otule ma ruaa diyisiri ma alia;

²⁰emi ni kini ma runi e’yo ecopi emi aza kopi ’diyi oluzu emi tia aluani ku, emi imbazu ’ba dria ma milia azini jo vusi jo vusi indi,

²¹asi ojaza Mungu vuri ma e’yo eti nzezu ’ba Yahudini pi vu, ’ba Girikini be, azini a’ita Opi amani Yesu Kristo a’izuri ma eti nzezu indi.

²²Te curu’do emi ne, ma mu Yerusalemua, orindi mani ovu ombezaru, ma nini e’yo ngapi ecapi ma vu ’daleri ku;

²³pe ’di, Orindi Alatararu nze e’yo ma dri aku amboru dria ma alia, ’yozu anziriku candi be yi ma re teo

²⁴Te ma milia idri mani ovuni e’yo amboru ku, azini ma lani eri ekile afa ajeambosi ma ngulupiniri ku, te ma le aga dria acita mani dezu ayikosi, azini azi Opi Yesuni fele ma dri e’yo bari ’yeta anzutiri Munguniri ma eti nzezuri dezu indi.

²⁵Curu’do emi lu, ma ni ra emi dria mani acizu suru Munguni oluzu emi eselia ’diyi, emi ngani ma mile ndre dika ku.

²⁶E’yo ’disi ma e’yo eti nze emi tia andru ’do, ma mani alaru, ’ba aluni ma ari ovuni ma dria ku,

²⁷ma runi ndra e’yo dria Munguni eceleri oluzu emi dri ku.

²⁸Emi te emi ngulupi pi ma agei, kabilo o’biru Orindi Alatararurini emi ’bale yi drilia yi andrizu ’diyi be dria, ’dini emi ma oce kanisa Munguni erini jele i dri ari i ma ngulupinisiri.

²⁹Ma ni ra, ma ka emi ku ra nguru onzi ’diyi nga efi emi eselia, ngani ovu yikisi kabilo longulumuru ’diyi vu ku;

³⁰te i emi ma ngulopi ma eselia ’ba nga enga e’yo goligoliru ’yozu, ’ba Yesu vuti bipi ’diyi obezu sezu yi ma vuti bizu.

³¹E’yo ’disi emi ma ovu mile be, emi ma ega ’dani kini eli na ma alia etu be ini be rra ma kuru emi alu alu ma asi imbazu mindre be ku.

³²Curu’do ma ku emi Mungu dri, azini ’yeta anzutiri eriniri ma e’yo ecopi emi sizaru uru awuafa fezu emi dri ’ba alatararu dria ’diyi ma eseliari dri indi.

³³Ma ’bani ’ba azini ma afa ma li ku, kani dahabuni, kani meleni, kani bongoni.

³⁴Emi ngulupi ni ra ma ’ye azi mani ma drisi, afa fezu ma dri azini ’ba ovupi ma be ’diyi dri indi.

³⁵E’yo dria ma alia ma ece emi dri geri, ’dini emi eca azi ngazaru okporu ’dinile ’ba okpo kokoru ’diyi ma aza kozu, emini e’ye Opi Yesuni ’yoleri egaria; eri ’ye e’yo nde kini, Drileba ’ba afa fepirini aga ’ba afa a’ipiriniri ra.

³⁶Eri ka ’yo ’dini ’bo, eri osi kumuti va, eri zi Mungu tia yi be dria.

³⁷Yi dria owu tu, o’de Pauloni ombelea, ndru eri ma o’bole avasi,

³⁸te candi agapiri ovu yi dri e’yo erini ’yole kini yi ngani i mile ne dika kurisi. Yi ji eri ku ogurua.