Read lugbara ’Yeta 22 Bible Online

’Yeta 22 - lugbara bible

’Yeta 22

¹Ma adripi, ma atapi, emi eri e’yo eti nzeza mani nzele emi ma drilia curu’dori,

²Yi ka eri erini ’yoria Ebrania tisi, yi ovu ciri aga ra. Eri ’yo ra:

³Ma Yahudiouni, osi ma Tariso angu Kilikiaaria, ezo ma aku ’doria Gamalieli ma palaa, imba ma azita ama a’bipinisi kililiru, ma asi ovu ndra ma’yalasi Mungusi ekile emi driani ovule andrurile.

⁴Ma inza ndra ’ba Geri ’doria ’diyi onzi yi ofuzu, agupi okuyi be, ma ombe yi fezu arujoa;

⁵kuhani ambo agapiri ’ba ’wara be dria eco e’yo mani ma eti nzezaru ra. Te ma isu ndra waraga yini jizu adripi ’daa ’diyi vu, ma mu ani Damasikia ’ba ovupi ’dale ’diyi ejizu o’izaru Yerusalemua inzata fezu yi dri.

⁶Eri eca ’dinile, mani aciria geria mani ecaria Damasikia ogogo, ekile etu agaale, coti diza amboru engapi ’buari di ma ageia.

⁷Ma eco ma va nyakua, ma eri o’duko ’yozu ma be kini, Saulo, Saulo, mi ma inza a’disi ya?

⁸Ma omvi e’yo, Opi, mi a’di’i ya? Eri ’yo ma tia, Ma Yesu Nazaretia miru inzaleri’i.

⁹’Ba ovupi ma be ’diyi ndre diza nderi, te yi erini ’ba e’yo ’yopi ma beri ma o’duko ku.

¹⁰Ma ’yo ra, Ma nga ’ye ngoni ya, Opi la? Opi ’yo ma tia, Mi nga, mi mu Damasikia, yi nga e’yo dria ovupi pezaru mi dri ’yezu ’diyi ’yo mi tia ’dale.

¹¹Te ma ka eco angu ndrezu ku diza nderini dile turisi, ’ba ovupi ma be ’diyi yi se ma drisi, ma ca Damasikia.

¹²Agu alu runi Anania, eri ’ba Mungu inzipi ekile azitani ’yolerile, ’ba Yahudini dria ovupi ’dale ’diyini adrile runi dule duri,

¹³eri emu ma vu, erini pa soria ma ageia eri ’yo ma tia, Adripi mani Saulo, mi ma ndre angu. Etu nderisi mbelekoelei ma ndre angu, ma ndre eri.

¹⁴Eri ’yo ra, Mungu ama a’bipini pe mi e’yo ini leleri nizu, ’Ba Kililiru nde eriniri nezu, azini o’duko efupi eri tiliari erizu;

¹⁵te mi nga e’yo mini neleri azini erileri ma eti nze ’ba dria vu.

¹⁶Curu’do mi te ’doa a’disi ya? Mi enga, bi baputizi, mi oji e’yo onzi miniri, mini ru erini omveria.

¹⁷Eri eca ’dini, ma ka mvi Yerusalemua ’bo, mani Mungu ziria hekalua, ma ava oti ra,

¹⁸ma ne eri erini e’yo ’yoria ma tia kini, Mi nga mbelekocici, mi fu Yerusalemuasi, a’disiku yi ngani e’yo mini etini nzele masiri eri ku.

¹⁹Te ma, ’yo, Opi, yi ma ngulupi ni ra kini ma adri ndra ’ba mi a’ipi ’diyi obi ’ba jo arunia yi cozu, jo ’ba Yahudini yi okuzu ’diyi vusi dria.

²⁰Azini yini Setefano ’ba e’yo mini ma eti nzepiri ma ari adaria, ma’i ma ngulupi so de pa ’daa indi e’yoni a’izu, ’ba eri fupi ’diyi ma bongo ta mbazu.

²¹Eri ’yo ma tia, Mi mu, a’disiku ma nga mi ti pe ziri ’ba Jururu vu.

²²Yi eri e’yo erini ’yoleri ecazu e’yo ’diri tia; ’di ma vutia coti yi oyu o’duko urusi kini, Ma ja ’ba ’dini ’di ma dri nyakuasi ra! Econi erini ovuzu idriru ku!

²³Yi ka otre o’duko urusi, ka bongo yini otru o’be uru, ka irifura omvu uru indi,

²⁴opi asikarini azi yi ma ofi eri kali asikarinia, ’yozu ma zi eri kalisi, eri ma ni e’yo ’ba ongulumuruni otrezu eri dria ’diniri ma efi ani.

²⁵Yi ka eri ombe enyiriko baasi ’bo, Paulo ’yo ’ba asikari turu alu drilia pa sopi ogogori ma tia kini, Kani azita a’i emini ’ba Rumini cozu kalisi e’yo likokoru ra ya?

²⁶’Ba asikari turu alu driliari ka e’yo nderi eri ra, eri mu ’yo opi asikarini tia kini, Mi le a’di ’ye ya? ’Ba ’dori eri ’ba Rumini.

²⁷Te opi nderi mu eri vu, ’yo eri be, Mi ’yo ma tia, mi ’ba Rumini ya? Eri ’yo ra, E.

²⁸Opi asikarini omvi e’yo ’yozu, Mani ma ojazu ’ba Ruminiru, ma je aje ambosi. Te Paulo ’yo ra, Te ma’i, ti mani ma ti ti.

²⁹’Dini coti ’ba ’yepi Pauloni zipi ’diyi se yi vile, ku eri ra; opi asikarini indi eri ovu urisi, a’disiku eri ni Paulo ovu ’ba Rumini, azini erini eri ’ilerisi.

³⁰Drusi ’dini, erini leria e’yo ’ba Yahudini eri esuzu ma efi adari nizu, eri tru eri ra, azi kuhani amboru ’diyi ’ba ’wara e’yo amapi ’diyi be dria yi okuzu tualu. Eri eji Pauloni, ’ba eri yi drilia.