Read lugbara ’Yeta 24 Bible Online

’Yeta 24 - lugbara bible

’Yeta 24

¹O’du towi ka aga ’bo, kuhani agapiri runi Anania, eca tualu ’ba wara ’diyi be, azini Teritulo ’ba e’yo nzepi ti alasiri. Yi nze e’yo Pauloni esuzu gavena drilia;

²yi ’ka Pauloni omve ra, Teritulo ’ba eri lesu kini: Te misi, Felike inzile tori, ama ovu asi ambiza be tu, azini milemba minirisi e’yo onzi dria ovu edezaru onyiru suru ’dori dri,

³amani e’yo ’diyi isule o’du dria pari dri driarisi, ama ovu awa’difo be tu.

⁴Te di ma leni mi andezu e’yo azinisi ku, te ma mazu ’ba mi vu, mi eri e’yo amani were asi onyiru minirisi.

⁵Te ama isu agu ’dori ovu ’ba onzini ekile dra onzi ndindiarule, eri ’ba fepi ’ba Yahudini ombuzu amve wudrikuru dria ma eseliari, eri ovu ’ba ambo suru Nazaretini fupi amveri ma driliari.

⁶Eri ’ye ndra o’bi hekalu ezazo e’yo onzisi indi, te ama bi eri, ama le ndra e’yo erini li ekile azita amanini vusi.

⁷Te opi amboru Lusia eca ra, eri pa eri ama dria okpo amborusi,

⁸eri azi ’ba eri esupi ’diyi ma mu mi drilia. Eco mini e’yo amani eri esuzuri nizaru dria, mi ngulupini eri oziria.

⁹’Ba Yahudini yi efi ti tualu e’yo yini eri esuzurisi, yi a’i e’yo ’diyi dria ovu ’dini.

¹⁰Gavena ka Pauloni aku drisi e’yo ’yozu, Paulo omvi e’yo tinia kini: Mani e’yo mini ovuzu ’ba e’yo lipi suru ’diri drilia eli kakausiri nile rarisi, ma e’yo mani ma eti nze uri kokoru ayikosi.

¹¹Mi eco nizaru o’du agani nga mudri drini iri ku, mani tuzu uru Yerusalemua Mungu inzizuri na vutia;

¹²yi isuni ma agata garia ’ba azini be aluni ku, kani awata feria ’ba ongulumuru eselia ku, kani hekalu alia, kani jo ’ba Yahudiniri yi okuzuri ma alia, kani aku amborua ku.

¹³Te e’yo yini curu’do ma esuzuri yi econi efini ecezaru mi dri adaru ku.

¹⁴Te ma e’yo ’diri e’da mi vu, Geri yini omvele suru mbupi amve nderisi, ma Mungu ama a’bipini inzi’i, te ma a’i e’yo azitani dria azini e’yo nabini sileri dria;

¹⁵ma ovu asi tezasi Mungu alia ’dini, ’ba kililiru ’diyi azini ’ba kililiru ku ’diyi iri tro yi nga enga ra, ekile ’ba nde ’diyi ngulupini a’ile dini indirile,

¹⁶E’yo ’disi ma o’bi ma agei te ’dani, ovuzu asi otiza kokoru Mungu ma milia, ’ba ma milia indi.

¹⁷Elini agale kakau ’borisi, ma eca afa feza fezu suru mani dri, edeta edezu indi.

¹⁸Mani e’yo ’diri ’yeria, yi isu ma hekalua de ma ovu edezaru alaru, ’ba ongulumuru kokoru, otrena kokoru indi. Te ’ba Yahudini azini engapi Asiaa ’diyi-

¹⁹eco onyiru ’ba ’diyi ma ovu ’doa ma esuzu mi drilia yi’i, yi ka ovu e’yo be ma vu.

²⁰Ka ’dini yo, ’ba ’doyi ma ngulupi ma ece e’yo onzi yini isule ma vu mani pa soria ’ba e’yo amapi ’diyi ma driliari.

²¹Te kiri o’duko alu mani ’yole ’dori, mani oyule mani pa soria yi eseliari kini, Engata ’ba draza eseliari ma e’yosi emi e’yo mani li andru.

²²Te Felikeni Geri nderi ma e’yo nile fudri cirisi, eri ici yi ma dri, kini, Lusia opi ambo asikarini ka eca ra, ma nga e’yo emini li ndo.

²³Eri azi ’ba asikari turu alu driliari ageini tezu, kani bani ma ku erini geri were indi, azini ma oga agyi erini ’diyi ma aluni emuzu azi ngazu eri dri ku.

²⁴Te o’du azini ka aga ’bo, Felike eca oku erini Drusila be, eri Yahudi ezoni; omve Pauloni, eri eri ma tia e’yo ’bani Kristo Yesuni a’izuri.

²⁵Pauloni onyi pi ma e’yo eti nzeria, ava ruani dri sizuri pie, e’yo liza emupiri pie, Felike ma asi i nga oti urisi oti oti, ’yo ra kini, Curu’do mi mu nga andru; ayuna ka ovu ma drilia yo, ma nga mi omve ndo.

²⁶Eri ega kani Pauloni nga i dri afa fe yani. E’yo ’disi eri omve eri pale kakau ti ecizu eri be.

²⁷Te eli iriri ka aga ’bo, Porikio Fesito nga eca angu nyazu Felike ma paria; te Felike ku Pauloni aruru, erini lele ayiko fezu ’ba Yahudini dririsi.