Read lugbara ’Yeta 25 Bible Online

’Yeta 25 - lugbara bible

’Yeta 25

¹Te Fesito ka fi angu ini nyaleri ma alia ’bo, o’du na ka aga ra, eri enga Kaisariaa muzu Yerusalemua,

²Kuhani amboru ’diyi pi ambo Yahudini ’diyi be, yi esu Pauloni eri vu, zi eri tia matusi,

³a’izu eri dri asi ndriza erinisi eri ma pe Paulo ma ti Yerusalemua, a’disiku yi le eri mba geria eri fuzu.

⁴Te Fesito omvi yi tia yi Paulo ma agei te ’dale Kaisariaa, te ace were i ngulupini nga mu ’dale.

⁵’Dini, eri ’yo ra, ’ba ’wara emi eselia ’diyi ma si mu ma be, agu nde ka ovu e’yo onzi be, yi ma esu eri.

⁶Eri ka ovu yi ma eselia o’du agani aro kani mudri ku, eri si Kaisariaa; dru ’dini eri ri va oguna e’yo lizuri dria, azi Pauloni ejizu.

⁷Eri ka eca ra, ’ba Yahudini ibipi esipi Yerusalemua ’diyi oso pa eri ageia eri esuzu e’yo onzi kakau nzizaru ’diyisi, te yi econi e’yo nde ’diyi ma adani ecezaru ku.

⁸Pauloni e’yo i ma ngulupini nzeria, kini, Ma ’yeni onzi azita ’ba Yahudiniri vu, kani hekalu vu, kani Kaisari vu aluani ku.

⁹Te Fesito, erini lezu ayiko fezu ’ba Yahudini dri, eri omvi e’yo Paulo tia kini, Mi le mu Yerusalemua, ’dale mani e’yo mini lizu ra ya?

¹⁰Te Paulo kini, Ma pa so oguna e’yo lizu Kaisariniria; onyironi eri ma li e’yo manini; ma ’yeni e’yo onzi ’ba Yahudini vu aluni ku, ekile mini nile onyirurile.

¹¹Ma ka re ovu ’ba onzi ’yepiri, kani ma ka e’yo mani ecozu drawi: rari ’ye, ma gani dra ku; te e’yo yini ma esuzuri ka ovu toko, ’ba aluni ecopi ma fepi yi ma driani yo, Ma le mani mu drile Kaisari vu.

¹²Te Fesito ka e’yo ’yo ’ba e’yo lipi eri vutia ’diyi be tualu ’bo, eri omvi e’yo kini, Mi le mini mu Kaisari vu ’bo; mi nga mu Kaisarii vu ra.

¹³Te o’du azini ka aga ’bo, opi ambo Agiripa eca Kaisariaa Berinike be, Fesitoni zizu ci ci.

¹⁴Yini ovuria ’dale o’du kakau, Fesito olu e’yo Pauloni opi nderi tia kini, ’Ba alu Felikeni kule ’doa arururi indi;

¹⁵maniovuria Yerusalemua, kuhani amboru azini ’ba ’wara ’ba Yahudinini yi esu eri ma vu, yi zi ma tia e’yo erini lizu eri ndezu.

¹⁶Ma omvi e’yo yi tia ’dini, ama ’ba Rumini adrini ’ba aluni fe ku, de nga ’ba nde yini esuleri otuni pa ’ba eri esupi ’diyi be milia milia ku, de nga eri isuni pari asu ’bani sule eri ruaari ma e’yo omvizu ku.

¹⁷E’yo ’disi yi ka yi oku ’doa tualu, ma teni ku, te dru ma ri va oguna e’yo lizuri dria, ma azi agu nderi ejizu.

¹⁸’Ba eri esupi ’diyi ka pa oso ra, esuni eri aluni ekile mani egale yi nga esurile ku;

¹⁹te yi ga agata eri be e’yo ndu ndusi geri yini adrou yini nzizu ri ma e’yosi, azini e’yo ’ba alu Yesu drapi ’bo Pauloni ’yole eri idriruri ma e’yosi indi.

²⁰Te e’yo ’diyi ma efi ndazurini ma ndelerisi, ma zi eri ma tia ka le mu Yerusalemua yi nga e’yo erini li ’dale.

²¹Te Pauloni zizu ma tia ’ba ma mba i ma ta, i le ini muzu e’yo ini lizu Opi inzile tu agapi rari vurisi, ma fe azita yini eri ta mbazu ecazu o’du mani ecozu eri ti pezu Kaisari vuria.

²²Agiripa ’yo Fesito tia, Ma’i ma le te agu nderi eri alu indi. Kini, Dru mi nga eri eri ra.

²³’Dini dru Agiripa pi Berinike be eca inzita amboru be, fizu pari e’yo erizuria opi ambo asikarini ’diyi be, azini ’ba amboru aku ambo ndea ’diyi be indi. Te Fesito fe azita Pauloni ejizu.

²⁴Fesito eri ’yo ra, Opi ambo Agiripa, azini emi ’ba dria ovupi ama be tualu ’doa ’diyi, emi ne agu ’dori; ’ba ongulumuru Yahudini dria ’ba matu ma vu eri ma e’yosi, Yerusalemua azini ’doa, otrezu kini sini erini ovuzu idriru dika ku.

²⁵Te ma isu eri ’yeni e’yo onzi erini drazu aluni ku. Eri ngulupi zi muzu opi inzile tu agapi rari vu e’yo erini lizuni, ma li eri ma ti pezu ani.

²⁶Te e’yo erinisi ma ovuni e’yo ada be sizu opi mani vu ku. E’yo ’disi ma eji eri emi drilia, te agapiri mi drilia, Opi ambo Agiripa, ’dini ka eri ozi ’bo ma nga eco e’yo azini si beni.

²⁷Te ma milia eri efi kokoru ’ba aruru ma ti pezu e’yo onzi erini ecekokoru.