Read lugbara ’Yeta 26 Bible Online

’Yeta 26 - lugbara bible

’Yeta 26

¹Agiripa ’yo Paulo tia, Mi eco e’yo mi ma ngulupini nzezu. Paulo eju i ma dri, ’ba e’yo ini nze kini:

²Ma drileba, mani emule e’yo nzele andru mi drilia, Opi ambo Agiripa, e’yo dria ’ba Yahudiniri ma esulerisi,

³agapiri mini adriza ’ba Yahudini zita yini ’diyi be nile rarisi; e’yo ’disi ma matu ’ba mi vu mi eri nga ma asi e’yeresi.

⁴Adriza mani engazu trua mvaasi Isuru mani eselia Yerusalemuari, ’ba Yahudini dria ni ra.

⁵Yi ni e’yo mani gbudrio, yi ka le e’yo mani ma eti nze, kini, ma Farisaiouni, suru inzita amani Mungu inzizuri ma vuti dropi asi driasiri’i.

⁶Curu’do ma pa so ’doa emini e’yo mani lizu, mani ovule asi teza be e’yo Munguni azile ama a’bipi vuri a’ile rarisi.

⁷Suru amani mudri drini iri yi ovu asi teza be aziza ’diri tezu, azi ngazu Mungu dri inisi etusi dria okposi. Opi la, ’ba Yahudini yi esu ma curu’do asi teza nderisi!

⁸E’yo Munguni ’ba draza engazuri ovu emi dri ewaru a’izu a’di e’yosi ya?

⁹ Adaru, ma ngulupi ega ndra ma ma ’ye e’yo kakau Yesu Nazaretiari ma ru ezazu.

¹⁰Ma ’ye ’dini indi Yerusalemua; ma obi ’ba alatararu I’diyi ma azi kakau ofizu arujoa, ’ba kuhani amboru ’diyini ma dri okpo felerisi, te ’bani yi o’diria ma a’i yi o’dizu indi.

¹¹Ma inza yi pale kakau jo ’ba Yahudiniri yi okuzu ’diyia dria, ma omi yi okposi Munguni o’dazu; azini mani yi ngule onzi asi drazasirisi ma inza yi cazu kpere aku ambo ambo amve ’diyia indi.

¹²’Dini ma mu ndra Damasikia kuhani amboruni okpo fele ma dririsi, azini yini azi nde kule ma dririsi.

¹³Opi la, mani ovuria geria etu agaa, ma ne diza etu agapiri dizu ma ageia, azini ’ba acipi ma be ’diyi ma ageia indi.

¹⁴Amani ama ecoria dria va nyakua ’bo, ma eri o’duko ’yozu ma be Ebrania tisi ’dini kini, Saulo, Saulo, mi ma inza a’disi ya? Eri ewaru mini afa pa osopiri ma si otuzu mi pasi.

¹⁵Ma ’yo ra, Opi, mi a’di’i ya? Opi ’yo ra, Ma Yesu mini inzaleri’i.

¹⁶Te mi nga, mi so pa uru; te ma ece ma ngulupi mi dri a’disiku ma pe mi azi ngazu ma dri, azini ojiou maniru e’yo mini nele azini e’yo mani ngale ecele mi dri ’diyi ma eti nzezu.

¹⁷Ma nga mi pa ’ba Yahudini dri, azini ’ba Jururu mani mi ti pele vunia ’diyi dri indi.

¹⁸Ma pe mi ma ti yi ma mile zizu, ’dini yi ma enga ini aliasi ma oja yi diza vu, azini engazu okpo Satanini ma alia cazu Mungu vu, yi ma isu ani e’yo onzi wuza, azini awuafa ma nyaza ’ba ovupi alatararu yini ma a’ilerisi ’diyi ma eselia.

¹⁹’Dini, Opi ambo Agiripa, ma: gani eceta nde engapi ’bua efupi ma: miliari ku,

²⁰te ma e’do e’yo eluzu Damasikia, azini Yerusalemua vutinia angu Yudiaaria dria, azini ’ba Jururu ’diyi vu indi, kini, yi ma ku e’yo onzi yi ojazu Mungu vu, ma ’ye ’yeta yi sipi ’ba asi ojapi ’bo ’diyisi ’diyi.

²¹E’yo ’disi ’ba Yahudini yi bi ma hekalua, o’bi ma ’dizu indi.

²²Mani aza koza engapi Mungu vuri isule rarisi, ma pa so ani ecazu kpere andru ’do, e’yo mani ma eti nzezu ’ba were ’diyi dri azini ’ba ambo ’diyi dri indi, Ma ’yoni e’yo aluni ku pe e’yo nde nabi pini ndra ’yole Musa be, eri nga eca rari:

²³kini Kristo ma nya candi, azini eri’i engapi ’ba draza ma eselia okori nga e’yo dizani olu suru nde dri, azini ’ba Jururu dri indi.

²⁴Erini e’yo i ma ngulupini nzeria ’dini, Fesito ’yo o’duko urusi, Paulo, mi aza aza; e’yo mini onile kakau ’diyi fe mi dri azani!

²⁵Te Paulo kini, Ma azani ku fo, Fesito inzile turi, te ma ’yo e’yo adadaru ovupi ondua kililiru beri’i.

²⁶Opi ambo mani e’yo ’yozu drilenia uri kokoruri ci e’yo ’diyi ra; a’disiku ma ni ra e’yo ’diyi dria e’da yi eri ma milia ’bo peni aluni ku, e’yo ’diyini ovule ’yezaru zizaru kurisi.

²⁷Opi ambo Agiripa, mi a’i e’yo nabini sileri ra ya? Ma ni ra mi a’i ra.

²⁸Te Agiripa ’yo Paulo tia, E’yo weresi mi le ma ojazu ’ba Kristoniru ka!

²⁹Te Paulo ’yo, Ka ovu e’yo wereasi kani kakausi ti, ma Munguni zi kini mi’i a’dule ku, te ’ba e’yo mani eripi andru ’diyi dria, ma ovu tro tro male-kuni bani anziriku, diyi kokoru.

³⁰Opi ambo nderi nga di enga ra, gavena pi, Berinike pie, ’ba dria ripi tualu yi be ’diyi pie;

³¹yi ka fu ’bo, yi ’yo yi ma eselia kini, ’Ba ’dori ’yeni e’yo erini ecozu drazu, kani eri ’izu ku.

³²Te Agiripa ’yo Fesito tia, Agu ’dori ka ndra ’yo i le mu Kaisari vu kuni, te’do ama tru eri ’bo.