Read lugbara ’Yeta 27 Bible Online

’Yeta 27 - lugbara bible

’Yeta 27

¹Yi ka e’yo amani fizu ogurua zozu taliaari li ’bo, yi fe Pauloni, ’ba aruru azini ’diyi be, ’ba asikari turu alu enyati Augusitoni driliari dri, runi Yulio’i.

²Ama fi oguru Adramutioni ’yepi zopi aku miri tia Asiaa ’diyiari ma alia, ama ko dri zozu miri alia. Arisitariko ’ba Makedoniani Tesalonikiari mu ama be.

³Dru ’dini ama ca Sidonia; te Yulio ovu asi ndriza be Paulo vii, fe geri eri dri sizu muzu agyi erini ’diyi vu ande lizu.

⁴Engazu ’dale ama ko dri zozo miri alia, ama aga zoro Kuporo ma kalaa andralerurisi, a’disiku olini engale ama drilialerurisi.

⁵Ama ka zo miri aliasi Kilikia pi ma eseliasi Pamfulia be ’bo, ama ca Mura aku Lukiaaria.

⁶’Dale ’ba asikari turo alu driliari isu oguru Alegezandariani muzu Italia, te eri ofi ama alenia.

⁷Ama ka mu e’yere o’du kakausi, amani zoria ewaru ama ca ogogo Kinidoa, te olini geri amani ogalerisi, ama aga zozu Kirete ma kalaa andralerurisi ogogo Salimonea.

⁸Amani zoria eri ma kalaasi ewaru tu, ama ca pari ’bani omvele Kuti Onyiruri, ogogo aku Lasearia.

⁹O’du kakau ka aga ra, zoza amanini ovule ewaru turisi, o’du nyaka ’dazurini agale ’borisi, Paulo imba yi

¹⁰kini, Ma agupi, acita ogurusi ’dori nga eca onzi tu, oguru pi afa alenia ’diyi pie ezazu toko, ama ngulupi ma idri be.

¹¹Te ’ba asikari turu alu driliari eri e’yo ’ba oguru ti opipiri pini ’yole oguru e’i beri, aga Pauloni ’yoleri ra.

¹²Kuti nderini ovule onyiru oguru dri ewu anguni ambizurisi kurisi, tuni ’ba kakau ega yini eri onyiru fuzu ’dia, yi nga te ca ani Foenikia ovuzu ’dale ewu anguni ambizurisi; eri kuti Kireteni, pari oli lipi a bararurini lizu kuri.

¹³Oli engapi alazarurini liria e’yere, yi ega yi eco ’yezu yini lelerile, yi ’du afa oguru otizu, yi aga Kiretea ogogo kutiasi.

¹⁴Ace were akuluku amboru engapi amveri li yi ra, runi Eurakulo.

¹⁵Oli nderi ka oguru bi ’bo, ama econi tini opizu olivuleru ku, ’dini ama ku ma dro ama ceni.

¹⁶Amani agaria angu i lipi miri ma alia were omvele Kauda’iri ma kuti vu ogogo, ama nga di ca o’bo bizu ewasi ka;

¹⁷te ka eri ese uru ’bo, yi ayu baka azakomaru fezu agazu oguru ma etiasi, ruani ombezu ci; te yini ruria kani yi nga ovu ’bezaru Suritisaa yapi, yi tru bongo olini oguru drezuri va, oli nga di ama dro tokoru.

¹⁸Akuluku nderini ama drole okposirisi, dru ’dini yi ’ba afa oguruni lile ’diyi o’be miria;

¹⁹drozi o’du nasi yi ngulupi ofu afa oguruni ’diyi, o’be yi drisi ceni.

²⁰Etu pi ’bi’bio be ka asi di o’du kakau ku, yi ombupi olisirini oguru oyaria tu, vilerisi ama ega ama ngani di ama pa aluni ku.

²¹O’du kakau yi ka nyaka nya ku, Paulo so pa yi eselia, kini, Ma agupi, emi ka ndra e’yo mani ’yoleri eri ra, ka ndra angu Kireteari ku ku, te’do emi isuni e’yo onzi ’dori, afa ezazu toko ’doni ku.

²²Te curu’do ma emi imba, emi ma ovu asi tezasi; a’disiku ’ba emi eselia aluni ngani dra ku, alu oguruni drani.

²³Te ini ’dorisi malaika Munguni so pa ma ageia, Mungu mani ovuzu erini mani inzile azisi indiri,

²⁴kini, Paulo, mi ru ku; mi ma so pa Kaisari drilia; mi ne, Mungu fe ’ba mupi mi be ’diyi dria mi dri ’bo.

²⁵’Dini, ma agupi, emi ovu di asi tezasi, a’disiku ma ovu a’itasi Mungu vu e’yoni nga i ’ye ekile te erini ’yole ma tia ’borile.

²⁶Te ama ma nga ovu ’bezari angu azini i lipi miri ma aliari ma dria.

²⁷Te ini mudri drini suri ka eca ra, olirikoni ama drole ’dale ’dole miri Adria ma alia, iniayii ’ba oguru ma azi ngapi ’diyi ega yi eca angu a’wi tia ogogo.

²⁸’Dini yi ’ba yi ali o’bi, yi isu yi ali ovu wu o’biza kali su; ka mu drile were yi ’ye dika, isu alini ovu wu o’biza kali na.

²⁹Yini ovuria urisi kani olirikoni nga ama o’be kata dria, yi o’be aya oguruni pa sozu ’diyi su tro oguru ma ndulea, angu atiza tezu.

³⁰’Ba oguru ma azi ngapi ’diyi o’bi apa oguru aliasi, isu yi osi o’bo yia ’bo, yi ’yo lokirisi yi nga aya oguruni pa sozu ’diyi ’be oguru ma drilialeru;

³¹Paulo ’yo ’ba asikari turu alu driliari pi ma tia asikari be, ’Ba ’diyi ka ovu oguru alia ku, emi econi emi opazaru ku.

³²Asikari yi nga di baka o’boni li, ku eri ’de yia.

³³Anguni ’baria atiria, Paulo ’ba matu yi vu dria nyaka nyazu, kini, Andru o’du mudri drini su emini tezu ovuzu nyaka nyakokoru, afa aji o’bikokoruri’i.

³⁴E’yo ’disi ma matu ’ba emi vu, emi nya nyaka fo; ’diri nga emi rua aza ko, a’disiku ’ba aluni ma dribiefi ngani avi aluni ku.

³⁵Erini ’yoria ’dini, eri ’du mikate, eri fe awa’difo Mungu dri ’ba dria milia, nye eri, e’do nya oko,

³⁶’Ba dria ma asi ovu ayikosi, nya yini nyaka indi.

³⁷Te ama dria ovupi oguru alia ’diyi, ama ’ba turu iri kali ami drini azia.

³⁸Yi ka tra nyakasi ’bo, yi ’be anya yia oguru ka mu nzi ku.

³⁹Te anguni atiria, yi nini angu nderi ku, te yi ne yioji azini cinya beri; yi eci ti tualu kani yi eco oguru nderi jizu ’dale yani.

⁴⁰Yi li aya oguruni pa sozu ’diyi ma baka, ku yi yia, yi ayu baka pati oguru ti opizu ’diyini; yi ’i bongo drilialeru olini oguru drozuri uru dika, oli dro yi cinya nderi vu.

⁴¹Te yini ecaria pari yi miri irini yi ecizuria, oguru su i ti cinya alia; oguru drile ebi i ci oyakokoru, te nduni e’do i nyo, yi ombuzani eri fule okposirisi.

⁴²Asikari yi le ’ba aruru ’diyi ofuzu, ’ba aluni kazu yi sazu apazu ku;

⁴³te ’ba asikari turu alu driliari, erini leria Pauloni paria, eri oga e’yo yini lele ’yeleri si. Eri azi ’ba ecopi yi sapi ’diyi ma mbu yia, ma ca amve okoni,

⁴⁴te ’ba joloko acepi ’diyi ma zo bau dria, kani afa oguru vile azini ’diyi ma dria. Eri nga di eca ’dini, yi nga yi opa dria ca nyakua.