Read lugbara ’Yeta 28 Bible Online

’Yeta 28 - lugbara bible

’Yeta 28

¹Amani ama paria ’boria, ama isu angu nde i lipi miriari ma ru ovu Melita.

²Juru yi ko ama aza onyiru tu ekile ’bani ’yele zuzu kurile, edu aci ra, a’i ama dria, a’disiku ozooni ’dile angu ambiza berisi.

³Te Paulo ka eja owu ’bo, ’ba aci dria, ’boroa efu acisi, ombe i drinia, ga eri ra.

⁴juru ’diyi ka ndre mini i ’iria eri ma dria keleru, yi ’yo yi ma eselia, nzo yo agu ’diri, di ’bani ada. Erini i pazu miri alia rari ti, e’yo liza kililiruri a’ini eri ma ovu idriru ku.

⁵Te eri ya uri nderi acia, ’yeni eri onzi ku.

⁶Yi te eri ruani piria, kani erini e’dezu va drazu mbele; ka te izu ti, ka ne e’yo ’yeni eri onzi ku, yi oja yi asisile, ’yo ra eri ovu Mungu azini yani.

⁷’Ba amboru angu i lipi miria nderiari, runi Pubulio’i, angu erini ovu ogogo pari nderia. Eri a’i ama wa’diru asi ndrizasi, lazu o’du na.

⁸Eri ovu ’dinile, Pubulio ati ovu azo be arika suzu ariru rua driza be; Paulo fi vunia, zi Mungu tia, ’ba dri drinia, ati eri ra.

⁹E’yo ’diri ka i ’ye ’bo, ’ba azini azo be angu i lipi miria ndeari ’diyi emu ra, eri ati yi ra.

¹⁰Yi fe ama dri inzita tu; ama ka dri ko zozu, yi o’ba afa amani lele ’diyi oguru alia kakau.

¹¹Mba na ka aga ra, ama fi oguru Alegezandariani alia zozu; isu de oguru nderi te angu i lipi miria nderia mba egbeni ’diyisi; eceta erini ovu Agupianzi Ejoru.

¹²Ama ca Surakusaa, la ’daa o’du na.

¹³Engazu ’dale ama zo goligoliru cazu Regioa; o’du alu ka aga ra, oli onyiru enga alazaru, o’du iririsi ama ca Puteolia.

¹⁴’Dale ama isu adripi, yi omi ama ovuzu yi be o’du aziri. ’Dini ama ca Rumia ndo.

¹⁵Adripi nde ka ama e’yo eri ’bo, yi nga ’dale emuzu dri fuzu ama be, ecazu kpere pari Apioni ’bani afa jezuria, azini Omujo Na ’Diyia. Paulo ka yi ndre ’bo, eri fe awa’difo Mungu dri, asini isu okpo.

¹⁶Ama ka fi Rumia, yi fe Pauloni la a’dule, asikari eri ma agei tepiri be.

¹⁷Eri eca ’dini, o’du na ka aga ra, eri omve ’ba ambo ’ba Yahudini drilia ’diyi yi okuzu tualu; yi ka yi oku ’bo, ’yo yi tia, Ma adripi, ma ’yeni ndra onzi ’ba Yahudini vu kani azita ama a’bipini vu ku, te ti, engazu Yerusalemua fe ma aruru ’ba Rumia ’diyi dri.

¹⁸Yi ka ndra e’yo mani li ra, le ma tru ra, a’disiku yi isuni e’yo onzi mani drazuri ku.

¹⁹Te ’ba Yahudini ka ga si, e’yo ’di fe mani muzu Kaisari vu e’yo mani lizuni-te ma ovuni e’yo be suru mani esuzu ku.

²⁰E’yo ’disi ma omve emi mani emi nezu, e’yo ’yozu emi be, a’disiku asi teza Israelinisi ma ovu ombezaru anziriku ’dorisi.

²¹Yi ’yo eri tia, Ama isuni waraga engapi Yudiaa mi ma e’yo ecezuri aluni ku, azini adripi ecani ’doa aluni ku e’yo ’yozu onzi mi ma e’yosi.

²²Te ama le te e’yo mini egaleri eri mi tia; te ama ni ra suruti ’dori ovu o’dazaru pari dri dria.

²³Yi ka o’du pe eri dri ra, yi eca karakarau jo erini lazuria. Engazu o’bitisi cazu anguni biria ndrima ndrima ’dia ’di, eri ece yi dri suru Munguni ma e’yo, eri imba yi e’yo Yesunisi, iri tro azita Musani ma aliarisi, azini e’yo nabini silerisi.

²⁴’Ba azini ’diyi a’i e’yo erini ’yoleri ra, ’ba azi ’diyi a’ini ku.

²⁵’Dini yini agata garia yi eselia ceni ceni, yi ko dri muzu, Pauloni e’yo alu ’di ’yoria ’boria: Orindi Alatararu ’yo ’yeke emi a’bipi vu nabi Isaya ma tiarisi, kini:

²⁶ Mi mu ’ba mani ’diyi vu, mi ’yo ’dini, Erizaruni emi nga eri ra, te emi ngani va aluni ku, nezaruni emi nga ne ra, te emi ngani ama kilili ku.

²⁷A’disiku asi ’ba ’diyini eca osoru tu, bile yini ovu dirinyaru, obi yi mile ’bo; yi kazu nezu yi milesi ku, yi kazu erizu yi bilesi ku, yi kazu e’yo nizu yi asisi ku, yi kazu yi ojazu dika mani yi atizu ku.

²⁸E’yo ’disi emi ma ni ra, Mungu pe pata ini ’dori ma ti ’ba Jururu ’diyi dri; yi’i yi nga eri ra.

²⁹Eri ka e’yo ’diyi ’yo ’bo, ’ba Yahudini nga mvi yi vile, ri e’yo ozi yi ma eselia ceni ceni kakau.

³⁰Eri la ’dale eli pi pi iri, i vile jo ini jeleniri ma alia, a’i ’ba dria ecapi eri vu ’diyi,

³¹suru Munguni ma e’yo oluzu, azini Opi Yesu Kristo ma e’yo imbazu uri kokoru, te ’ba aluni ogani eri ku.