Read lugbara ’Yeta 3 Bible Online

’Yeta 3 - lugbara bible

’Yeta 3

¹Te Petero pini turia hekalua Yohana be etu oromi ’bani adrizu Mungu zizurisi,

²isu de ’ba yi agu andrini osile acozaruri eji, yini adrile ’bale jotile hekaluni ’bani omvele Ndrizaruria, ara a’izu ’ba fipi hekalua ’diyi driri’i.

³Eri ka Petero ne Yohana be yini ’yeria firia hekalua, eri a’i afa yi dri.

⁴Te Petero ndre eri okposi tualu Yohana be, eri ’yo ra, Mi lu ama vu,

⁵Eri ’ba mile ini yi vu, ega i nga afa isu yi dri ra.

⁶Te Petero ’yo, Dahabu kani mele ma dri yo, te afa ovupi ma vuri ma fe mi dri; ru Yesu Kristo Nazaretiarinisi, mi nga, mi aci.

⁷Eri bi dri ndi erini, enga eri uru; coti pa erini pi isu okpo kirima ma fala be.

⁸Eri enga mbelekocici, eri so pa, ’ba aci ad; eri fi tualu yi be hekalua, acizu azini ombuzu aziru Mungu inzizu.

⁹’Ba dria ndre eri, erini aciria azini Mungu inziria;

¹⁰yi ni eri ra, eri ’ba adripi afa a’ipi jotile Ndrizaru hekaluni ma aliari; yi adri titi azini osuta be tu e’yo i ’yepi eri ruaarisi.

¹¹Erini Petero pi biria Yohana be, ’ba dria yi nzu tua yi vu jobileko ’bani omvele Sulemaniniri ma etia, yi osu tu.

¹²Te Petero ka e’yo ’di ndre, eri omvi e’yo ’ba nde ’diyi vu kini, Emi agupi Israelini, emi ovu osuta be ’dini a’disi ya? Emi ama mire okposi a’disi ya, emini osuria okpo amani kani onyi amani fe acizu agu ’diri drini ya?

¹³Mungu Iburahimuni azini Isakani azini Yakoboni, Mungu ama a’bipiniri fe diza Mva erini Yesu dri; eri’i emini fele, emini gale Pilato ma miliasi etu erini ’yezu eri truzurisiri.

¹⁴Te emi ga ’Ba Alatararu Kililiru Onyi beri si, emi a’i okposi Pilato ma tru ’ba ’ba fupiri ra,

¹⁵emi fu idri E’ini ra, Munguni engale ’ba draza ma eselia, amani ovuzu ’ba eri ma e’yo eti nzepi ’diyiruri’i.

¹⁶Ru erini a’ilerisi, ru eriniri fe okpo ’ba nde emini nele azini nile ’dori drini; la’ita Yesu a’izuri fe ’ba ’diri dri rua lalaru tu emi dria ma milia.

¹⁷Te eli, ma adripi, ma ni ra emi ’ye e’yo ’diri aniakosi, opi emini ’ye ’dini indi.

¹⁸Te e’yo Munguni mira ondrile nabi dria ma tisi kini Kristo erini ma nya candiri, Mungu fe e’yo nde ma eca ’dinile ’yeke.

¹⁹E’yo ’disi emi ma oja emi asi ovuzu ’ba nduru, ’dini emi nga ojita isu e’yo onzi eminisi, azini ewu emi asi omvizu engapi Opi ma driliari ma nga eca beni;

²⁰’dini indi eri ma pe Kristo ndra erini pele okokele emi driri ma ti, eri Yesu’i.

²¹Eco ’bu ma a’i eri cazu ewu afa driani yi ’yezu ’yeke ekile ndra Munguni ’yole ’ba alatararu erini nabiru ’diyi dria ma tisi engazu nyaku eti ’bazuriarile.

²²Musa ’yo ada, Opi Munguni nga nabi ofu emi eselia ekile erini ma ofulerile; emi ma eri eri ma ti e’yo dria erini ngale ’yole emi tia ’diyisi.

²³Te ’ba dria e’yo nabi nderini ’yoleri eripi ku ’diyi nga ovu dri jazaru ’ba ma eseliarisi ra.

²⁴Adaru nabi dria e’dozu Samuelisi azini eri ma vutia ’diyi ’yo ’dinile, yi ece e’yo yi ’yepi ewu dorisi ’diyi.

²⁵Emi ovu anzi nabini aziru azizani, aziza nde Munguni azile emi a’bipi tia, erini ’yoria Iburahimu tia kini, A’bianzi mini alia ori’ba dria wudrikuruni ’diyi nga ovu drileba be.

²⁶Munguni Mvi ini engazu ira ma alia ’boria, eri pe eri ti emi vu okokele, emi dri drileba fezu, emini emi ojazu dria e’yo onzi emini kuzu.