Read lugbara ’Yeta 4 Bible Online

’Yeta 4 - lugbara bible

’Yeta 4

¹Yini nga e’yo ’yoria ’ba nde ’diyi tia, kuhani azini asikari ambo hekaluari nga eca yi vu ’ba Sadukayoni ’diyi be;

²yi ovu aokosi tu yini ’ba nde ’diyi imbalerisi, azini yini engata ’ba draza eselia Yesusiri ma eti nzelerisi,

³Yi obi yi ci, yi ofi yi arujoa cazu kpere o’bitisi, anguni ovule ondrerunirisi.

⁴Te ’ba karakarau e’yo eripi ’diyi yi a’i ra; kalafe agupini eca ekile alifu towile.

⁵Eri eca drusi ’dini, ’ba ’ba dri cepi ’diyi pi oku yi tualu Yerusalemua ’ba ’wara pie, ’ba waraga sipi ’diyi pie;

⁶Anasi kuhani amboruri pi indi, Kaifa pie, Yohana pie, Alegezanda pie, ’ba ovupi ori’ba kuhani amboruni ma alia ’diyi pie dria.

⁷Ka yi ’ba yi eselia ’boo yi zi yi tia, Emi ’ye e’yo ’diri okpo ngorisi ya, kani ru ngorisi ya?

⁸Etu ’dasi Petero gapi Orindi Alatararusi treri nga di ’yo yi tia, Emi’i ’ba ’ba dri cepi ’diyi azini ’ba i ’wara,

⁹emi ka ama ozi andru azi lonyiru ’ba acozaru ’diri vurisi, eri isu atiza ngoni ngoni ya,

¹⁰emi dria ma ni, azini ’ba Israelini ’diyi dria ma ni eri ovu Yesu Kristo ’ba Nazaretiari ma rusi, eri’i emini dile pati ruaa te Munguni engale ’ba draza eseliari; eri ma rusi ’ba ’dori so pa emi milia rua alaru be ’do.

¹¹’Ba ’diri ovu oni emi ’ba jo sipi ’diyini ’bele amve te eri eca curu’do jo kalati ma oni driruri’i.

¹²’Ba econi yi pazaru ’ba azini ma e’yosi ku, te ru andini ’bu etia ovupi fezaru ’ba eselia, amani ama pazu aniri aluni yo.

¹³Te yi ka Petero pi ndre Yohana be yini ovuria uri kokoru, ni ra yi ovu ’ba ’bani imbale tu ku, ’ba tokoni ’diyi, yi osu ani tu; yi va ani yi ovu ndra Yesu be ra.

¹⁴Yini ’ba ovupi atizaruri ndreria erini pa soria tualu yi be, yi econi e’yo ’yozaru agataru ku.

¹⁵Te yi fe yi dri azita yi ma fu nga amve were, yi ega e’yo tualu,

¹⁶’yozu, Ama nga ’ye ’ba ’diyisi ngoni ya? Adaru yi ’ye tali kuzaru yi ma drisi; ’ba dria adripi Yerusalemua ’diyi ni ra, te ama econi ’yozaru kini eri inzoni, ’dini ku.

¹⁷Ama ma ega yi dria, yi ma olu ru nderi dika ’ba aluni tia ku, e’yo nderi kazu kuzu ’ba ma eselia dika ku,

¹⁸Yi omve yi, yi azi yi ma tia yi ma olu kani imba ru Yesunisi dika ku.

¹⁹Te Petero pi Yohana be yi omvi e’yo yi tia kini, Emi ma li e’yo ’diri emi’i, kani eri onyiru Mungu ma milia ama ma eri emi aga Munguni ra ya;

²⁰te ama econi e’yo amani ndreleri azini erileri kuzaru ’yokokoru ku.

²¹Yi ka ega yi dria dika, yi fe geri yi dri, yi econi yi inzazaru dika ku ’ba ongulumuru ma e’yosi; ’ba driani Mungu inzile e’yo nderisirisi.

²²Te agu nde ovupi atizaru tali osuzaru ’dirisiri ma eli aga kali su ra.

²³Yini yi kuria, yi eca ’ba ongulumuru yini ’diyi vu, yi ece yi dri e’yo dria kuhani amboru ’diyini azini ’ba ’wara ’diyini ’yole yi tiari.

²⁴’Ba ’diyi ka e’yo ’diri eri ’bo, yi enga o’duko yini Mungu vu asi alusi, yi ’yo ra, Opi la, mi ’bu ’bapi nyaku be, miri pie, afa dria yi alia ’diyi pieri,

²⁵mi ’yo ndra ama a’bi Daudi ati’bo mini ma tisi Orindi Alatararusi, ’Ba jururu yi enga adrasi a’disi ya? Azini ’ba suru ndu nduni ’diyi yi e’yo toko otu a’disi ya?

²⁶Opi wudrikuruni yi ede yi a’di ’dizu, ’ba opiru yi oku yi tualu a’di ’dizu Yehova be azini Kristo erini be-

²⁷te adaru Herode pi oku yi tualu aku ’diri alia, Pontio Pilato pie, ’ba Jururu ’diyi pie, ’ba Israelini ’diyi pie, lezu a’di ’dizu Yesu Mvi mini alatararu mini odu osule driniari be,

²⁸e’yo dria mi drini ndra edele azini mi ma eyikizani ndra otule okokele ’diyi ’yezu.

²⁹Te curu’do, Opi, mi lu, ’ba ’diyi li ama bilendu ra, te mi fe ati’ba mini dri e’yo ’yozu uri kokoru.

³⁰Mi’i mi eju mi wu azo atizu, azini eceta tali be amboru ’diyi ’yezu Mva alatararu mini yesu ma rusi.

³¹Yi ka zi ’bo, pari yini yi okuzu tualuri ovu oyazaru; yi ga Orindi Alatararusi tre, yi ’yo e’yo Munguni uri kokoru.

³²’Ba ongulumuru a’ipi ’diyi Yi ovu dria asi alusi, orindi alusi indi, te ’ba aluni ’yoni afa ini ovu i ma ngulupini ku, te afa dria yi awa yi eselia tualu.

³³Te ’ba ti opele, ’diyi nze engata Opi Yesuni ’ba draza ma eseliari ma e’yo eti okposi i tu, azini asi ndriza amboru ovu yi ma i dria dria.

³⁴Yi ma eselia ’ba aluni ovuni afa kokoru ku, te nyaku e’ipi dria azini jo e’ipi dria yi ofe afa yini je, yi eji silingi yini isule ’diyi,

³⁵yi ’ba yi ’ba ti opele ’diyi ma palaa; yi awa ’ba alu alu dri ekile ’ba alu aluni ovule afa kokorurile.

³⁶’Dini Yusufu, ru azini ’ba ti opele ’diyini fele eri driri Baranaba’i (ru ’diri ma ojazani ’dinile, Mva asi omizani), ’ba Levini osipi ndra Kuporoari,

³⁷eri ovu amvu be, eri fe je, eri eji silingini, ’ba ’ba ti opele ’diyi ma palaa.