Read lugbara ’Yeta 6 Bible Online

’Yeta 6 - lugbara bible

’Yeta 6

¹Etu nde ’dayisi ’ba Yesu vuti bipi ’diyini ezuzu treria, ’ba Yahudini Giriki ti ’yopi ’diyi ga agata ’ba Yahudini ti yini ’yopi’i ’diyi be, yini oku awuziru yini onzole onzo yini afa awaria etuzurisi,

²’Ba tini opele mudri drini iri ’diyi omve ’ba Yesu vuti bipi ’diyi yi vu, yi ’yo ra kini, Econi amani ti Munguni kuzu olukokoru nyaka awaza ma e’yosi ku.

³’Dini, adripi, emi ma nda ’ba emi eselia aziri emini runi idule inzitasi, gapi Orindisi azini onduasi tre, amani ngale ’bale azi ’dori ma drilia ’diyi.

⁴Te ama’i, ama nga ama ebi Mungu zizu azini e’yo oluzu asi driasi’dani.

⁵E’yo ’di fe ayiko ’ba ongulumuru dri dria, yi pe Setefano ’ba Orindi Alatararuni gale asinia tre a’ita beri, Filipo pie, Porokoro pie, Nikanora pie, Timona pie, Paramena pie, Nikola ’ba Antiokiaa i ojapi ’ba Yahudiniru a’itasiri pie.

⁶Yi nga ’ba ’diyi ’ba ’ba ti opele ’diyi ma drilia, yi zi Mungu tia, yi ti dri yi ma dria.

⁷E’yo Munguni nga ku wakaka; ’ba Yesu vuti bipi Yerusalemua ’diyi ma kalafe nga ezu tu; ’ba kuhaniru ’diyi kakau nga a’ita ma vuti bi.

⁸Te Setefano’i erini garia ’yeta anzutirisi okpo be tre, eri ’ye tali osutaru azini eceta amboru ’ba ongulumuru ma eselia.

⁹Te ’ba azini ibipi engapi pari ’ba omvele Liberitinoru ’diyini yi okuzuri ma alia ’diyi, ’ba Kurenea ’diyi pie, ’ba Alegezandariaa ’diyi pie, ’ba Kilikiaa ’diyi pie, ’ba Asiaa ’diyi pie, yi enga agata gazu Setefano be.

¹⁰Te yi econi ondua erini azini Orindi fepi eri dri e’yo ’yozuri ogazu ku.

¹¹Yi nga di ’ba inzo lipi ’diyi ofe zizaru, yi ma ’yo ani kini, Ama eri erini e’yo ’yoria Musa pi o’dazu Mungu be.

¹²Yi fe ’ba kakau ma asi enga dria aokosi, ’ba ’wara pie, ’ba waraga sipi ’diyi pie, yi eca dria venia, yi bi eri, ji eri ’ba e’yo amapi ’diyi ma drilia,

¹³yi enga ’ba inzo lipi ’diyi urulesi, yi ’yo ra, ’Ba ’dori kuni e’yo saaru ’yozu pari alatararu ’dori ma ruaa azita be ku;

¹⁴te ama eri erini ’yoria ’dini, kini Yesu ’ba Nazaretiari nga pari ’do ma dri ja ra, indi vini eri nga e’yo ’yeza Musani ndra fele ama driri oja ra.

¹⁵Te ’ba dria ripi ti nzeria ’diyi yi nga eri ndre okposi, yi ndre mile erini ekile malaikanirile.