Read lugbara ’Yeta 8 Bible Online

’Yeta 8 - lugbara bible

’Yeta 8

¹O’du nderisi inzata amboru eca kanisa ovupi Yerusalemuari vu; yi dria ere yi nzu angu Yudiari pi ma alia, Samaria pie, kiri ’ba ti opele ’diyi aceni.

²’Ba Mungu rupi ’diyi sa Setefanoni ra, yi owu eri tu.

³Te Saulo inza ’ba kanisani ’diyi tu, erini firia jo vusi dria agupi osezu okuyi be, yi o’bezu arujoa.

⁴’Ba ’diyi yini yi ereria, yi mu e’yo bari oluzu.

⁵Filipo si aku amboru Samariaaria, eri olu yi dri Kristo’i.

⁶’Ba ongulumuru yi ka e’yo Filiponi oluleri eri ra, ka tali erini ’yele ’diyi ne ra, yi a’i e’yo erini oluleri asi alusi.

⁷A’disiku orindi onzi fu ’ba kakau ma aliasi oyuzu o’duko urusi; azini ’ba kakau azo yayaani be ’diyi, azini ’ba acozaru ’diyi be, yi ma rua ati ra.

⁸Ayiko amboru tu ovu aku nderi ma alia.

⁹Agu alu runi Simoni, eri oku ’ba andri ndripiri, eri fe ’ba Samariaa ’diyini osuzu tu, kini i ojou amboni.

¹⁰Te yi dria eri e’yo erini, engazu anzisi cazu ’ba ’wara vu, kini. Agu ’diri eri okpo Munguni omvele Ambori’i.

¹¹Te yi eri e’yo erini a’disiku ewu kakau eri fe yi osu tu andri ndriza inirisi.

¹²Te yi ka e’yo bari suru Mungunirini Filiponi olule yi tia ru Yesu Kristonisiri a’i ra, yi bi baputizi, agupi azini oku.

¹³Te Simoni’i, eri a’i alu indi, azini erini baputizi biria ’bo eri ebi i Filipo be ’dani. Erini eceta luria tali amboru ovupi ’yezaru ’diyi be, eri osu tu.

¹⁴’Ba ti opele Yerusalemua ’diyi ka eri kini ’ba Samariaa ’diyi yi a’i e’yo Munguni ra, yi nga Petero pi ma ti pe yi vu Yohana be.

¹⁵Yi ka si cazu ’dale ’bo, yi nga Mungu zi yi dri yi ma a’i Orindi Alatararu ani;

¹⁶a’disiku eri ’deni nga yi dria aluni ku, te yi bi nga kiri baputizi ru Opi Yesunisi a’dule.

¹⁷Awa’dini etu ’dasi yi ti dri yi dria, yi nga di Orindi Alatararu a’i ani.

¹⁸Te Simoni ka ndre Orindi Alatararu ovu fezaru yi dri ’ba ti opele ’diyini dri tile yi driarisi, eri le silingi fe yi dri,

¹⁹’yozu kini, Emi fe okpo ’diri ma dri alu indi, ’ba dria mani dri tile drinia ’diyi ma isu Orindi Alatararu indi beni.

²⁰Te Petero ’yo eri tia, Dahabu miniri ma ja dri mi be, mini egale mi eco feta Munguni isuzaru silingisirisi!

²¹Te e’yo mini, kani esele mini e’yo ’dori ma alia aluani yo, asi minirini ovule kililiru Mungu ma milia kurisi.

²²Mi oja di asi mini e’yo onzi mini ’dirisi, mi zi Opi tia ka eco ra eri ma wu e’yo onzi asi miniari ani.

²³Te ma ne ra, mi ovu oji drazaru be mi alia, azini mi ovu ombezaru e’yo onzi ma alia.

²⁴Simonini e’yo omviria, eri ’yo ra, Mi zi Opini ma dri indi, ’dini e’yo nde mini ’yole ’diyi aluni kazu ’dezu ma dria ku beni.

²⁵’Ba ti opele ’diyi ka e’yo eti nze, azini ka e’yo Opini olu ’bo, yi da dri vile Yerusalemua; yi olu e’yo bari wakaka aku Samariaa ’diyi ma alia.

²⁶Te malaika Opini ’yo Filipo tia kini, Mi nga, mi mu angu uruleruria, cazu geri engapi Yerusalemua sipi Gazaaria. Angu nderi rokoni.

²⁷Eri enga, eri mu ra. Mi lu, ’ba nzele ranyaru engapi Etiopiaa, azi ngapi Kandake opi okuru Etiopiaari dri lonyi erini ma ta mbazuri, eri mu Yerusalemua Mungu inzizu.

²⁸Erini emviria eri ri gari ini akanyani seleniri ma alia, buku nabi Isayani lazu.

²⁹Orindi ’yo Filipo tia, Mi si ogogo mi ecizu gari ’dari be.

³⁰’Dini Filipo nzu di eri vu, eri eri erini buku nabi Isayani laria. Eri zi tinia kini, Mi va e’yo mini laleri ra ya?

³¹Eri nga ’yo ra, ’Ba ka efini ece ma dri ku, ma eco vazu ngoni ngoni ya? Eri le Filipo ma tu ri i be.

³²Te pari e’yo sizani erini laleri eri di: Ekile kabilo ’bani jile lilerile, ekile kabilomvani ovule ndi ’ba ’bikoni lipiri ma driliarile, ’dini eri zini i tile ku.

³³’Bani drinza feria eri dri, yi nde eri e’yo lizasi ra. A’dini nga ori’ba erini ma e’yo eceni ya? Yini idri erini nzele nyakua rarisi.

³⁴Agupi ranyaru ’di nga e’yo omvi Filipo tia kini, Ma zi mi tia, nabi ’yo e’yo ’diri a’di ma dria ya, kani i ma ngulupi ma e’yoni ya, kani ’ba azini ma e’yo ya?

³⁵Te Filipo zi i tile, ’ba e’yo ece pari te erini buku lazuria, olu Yesu eri tia.

³⁶Te yini muria geria yi eca yi tia, agu ranyaru teri kini, Mi lu, yi eri indi ’do! A’di oga mani baputizi bizuni ya?

³⁷Filipo kini, Mi ka a’i asi driasi ra, mi eco baputizi bizaru ra, Eri nga e’yo omvi kini, Ma a’i Yesu Kristoni Mungu ma Mvi’i.

³⁸Eri azi gari ma so pa ci, azini yi iri tro nga esi va fi yia, Filipo pi ’ba ranyaru be, eri fe di baputizi eri dri.

³⁹Yini furia yiarisi Orindi Opini ’du Filiponi ra; agu ranyaru ’diri neni eri dika ku, te eri mu geri inia ayikosi.

⁴⁰’Ba, yi isu Filiponi Azotoa, te erini agaria ’dale eri olu e’yo bari aku dria ma alia cazu kpere Kaisariaa.