Read lugbara 'Ba Rumia 'Diyi 1 Bible Online

'Ba Rumia 'Diyi 1 - lugbara bible

'Ba Rumia 'Diyi 1

¹Ma’i Paulo, ati’bo jeza Yesu Kristoni. Omve ndra ma ovuzu ’ba ti peleriru, pe ndra ma ndu e’yo bari Munguni oluzu.

²Mungu azi ndra oko e’yo ba nderi geri nabi ini vurisi, e’yo siza alatararuri ma alia,

³Mvi ini ma e’yo ecezu, osipi ndra ruasi Daudi ma oriru

⁴te ovupi ecezaru Mvi Munguniru okpo be Orindi e’yo alatararunirisi, erini engale ’ba draza ma eseliarisiri. Eri Yesu Kristo, Opi amaniri’i.

⁵Erisi ama isu asi ndriza pi azi ’ba ti pelerini be, fezu ’bani e’yo a’itani erizu rutasi suru dria ma eselia, ru erinisi.

⁶Te emi ovu ’ba ’diyi ma aziru indi, Yesu Kristoni emi omvele ovuzu ’ba inirurisi.

⁷’Ba dria Munguni le1e Rumia, Munguni omvele ovuzu alatararu ’diyi vu: ’Yeta anzutiri pi ma ovu emi vu asi anzuru be engazu Mungu Ata amani pi vu Opi Yesu Kristo be.

⁸Okorisi ma awa’difo ’yo Mungu mani vu Yesu Kristosi emisi dria, a’ita emini ma e’yoni kule wudrikuru dria ma aliarisi,

⁹Mungu mani azi ngazu vunia orindi manisi e’yo baru Mvi inirini ma aliari eri e’yo mani ma eti nzeni, kini ma zi i tia emisi ’dani ’dani.

¹⁰Zita mani ma alia ma zi o’du dria, ka adri ba, Mungu ka le ra, eri ma zi curu’do geri,onyiru ma dri muzu emi vu, ewuni ’agale izu ’borisi.

¹¹Te ma le emi ndre avasi, afa feza orindiniri fezu, emi dri emi ’bazu okporu ani, i

¹²’dini ama ma omi ama asi ama eselia emi be, a’ita amanisi amani lamani.

¹³Ma le emi ma ni, ma adripi, pale kakau ma adri ega ma asia muzu emi vu (te e’yo azini oga ma muko si ecazu kpere andru), ma ma isu Kristo ma ori emi eselia indi, ekile mani isule suru azi ’diyi ma eseliarile.

¹⁴Ma mari be ’ba Girikiru ’diyi vu azini ’ba jururu ’diyi vu, ’ba ondua be ’diyi vu azini ’ba ondua kokoru ’diyi vu ci:

¹⁵’dini ekile mani ecolerile, ma le avasi e’yo bari oluzu emi ’ba Rumia ’diyi vu indi.

¹⁶Te ma ovuni drinza be e’yo barisi ku: erini ovule okpo Munguni pata fezu ’ba alu alu a’ipiri dririsi, okoni ’ba Yahudini dri, te ’ba Girikini dri indi.

¹⁷E’yo bari nde ma alia e’yo kililiru Munguniri e’da i ’ba a’ipi ’diyi ma milia yini a’ile a’irisi; ekile erini ovule sizarurile, ’Ba kililiruri nga ovu idriru a’itasi.

¹⁸Te adra Munguni engapi ’buari e’da i ’ba ambo be Mungu inzipi ku ’diyi vu, ’ba e’yo onzi ’yepi ’diyi vu indi, yini e’yo adaruri ogale e’yo onzi yinisirisi.

¹⁹Te e’yo Munguni ’bani ecole nileri e’da i ce yi ma milia, Munguni e’yo nderi ecele yi milia ’borisi.

²⁰A’disiku e’dozu ewu Munguni nyaku ’bazurisi, okpo erini i depi kuri pi e’yo erini ovuzu Mungururi be, yi e’yo erini ’bani ecole nele ku ’diyi, e’da yi ra, fezu yi vazu afa erini o’bale ’diyisi. E’yo ’disi ’ba nde ’diyi econi e’yo omvizaru Mungu vu ku;

²¹a’disiku yini Mungu nile rari ti, yi inzini eri Mungule ku, feni vini awa’difo eri dri ku indi, te yi aba yini asisile drole saarurisi azini asi yini ondua kokoruri bi i iniciciru.

²²Yini ’yoria yi ’ba onduaruni de di yi aza aza,

²³te yi oja Mungu ecopi drapi kuri ma diza ekile wura ’ba ecopi drazarurinile, azini arianile, azini anyapa pa be su ’diyinile, azini afa acipi agatisi ’diyinile indi.

²⁴E’yo ’disi Mungu ku yi ava onzi yi asini lele ’yeleri ’yezu, e’yo drinzaru ’yezu yi ma ruaa yi eselia,

²⁵a’disiku yi oja e’yo adaru inzoru, yi inzi tu afa ’bale ’ba ’diyi, azi ngazu yi dri Mungu afa dria ’bapiniri ma paria, eri’i ovupi inzizaru ’dani ’daniri! Amena.

²⁶E’yo ’disi Mungu ku yi ava onzikanya drinzaruri ma alia. Oku yini yi oja e’yo okuni adrile ’yele yi ruaari, yi ’ye e’yo ecopi oku ruaa kuri.

²⁷’Dinile agupi indi yi ku lazu oku be ekile ’bani adrile lalerile, yi rua ve ava onzikanyarusi agupi ma eselia agupi azi ’diyi be e’yo onzikanya drinzaru ’yezu, azini yi a’i panga ’yekeri yi ma ngulupi ma ruaa ekile yini e’yo onzikanyaru ’yelerile.

²⁸Te erini ovule yi milia onyiru Mungu ma ovu yi ma eyikiza alia kurisi, Mungu ku yi asisile onyi kokori be e’yo onzi drinzaruri ’yezu.

²⁹Yi ga tre e’yo onzikanyaru driasi, e’yo onzi pie, li ’bazu ’ba azini ma afasiri pie, asi onzi pie. Gazaru ma’yalasi, ’ba ’diza pie, awata pie, lokiri pie, ’ba nguza pie, yi ovu ’ba ’ba ndropi ’diyi,

³⁰’ba ’ba esupi ’diyi, ’ba Mungu ngupi onzi ’diyi, ’ba asi oka be ’diyi, ’ba asi afu be ’diyi, ’ba yi enyapi tu ’diyi, ’ba e’yo onzi o’diru ndrupi ’diyi, ’ba yi tipi ’diyi ma ti eripi ku ’diyi,

³¹’ba ovupi ondua kokoru ’diyi, ’ba e’yo aziza yini ojapi ’diyi, ’ba ale kokoru ’diyi, ’ba yiki kokoru ’diyi.

³²Yi’i yini azita kililiru Munguni, kini ’ba e’yo onzi ’diyi ’yepi ’diyi ma isu dratari nile rari ti, yi ma ngulupi ’yeni kiri ’dini a’duleni ku, te yi a’i vini ’ba ’yepi ’dinile ’diyi baru indi.