Read lugbara 'Ba Rumia 'Diyi 10 Bible Online

'Ba Rumia 'Diyi 10 - lugbara bible

'Ba Rumia 'Diyi 10

¹Ma adripi, ava ma asiari azini ziza mani Mungu vu ’ba Israelinisiri eri ’di’i, yi ma pa yi ra,

²Te ma e’yo ada ’yo yisi, yi ovu ava amboru be Mungu vu, te nita kokoru.

³Te yini onyi Munguni niria ku, te yi ndru geri yi ngulupi ma onyi ’bazu yi’i ceni, yi ga onyi Munguni si.

⁴Te azita ma kalati asizuri eri Kristo’i, ’dini eri ma la ’ba dria eri a’ipi ’diyi baru ani.

⁵Te Musa si kini ’ba onyi azita ndeni ’yepiri eri nga ovu idriru erini ’yelerisi.

⁶Te onyi ’bani isule a’itasiri ’yo ’dini, Mi ’yo mi asia ku, A’dini nga tu ’buani ya? (Kristoni ejizu va ’doa)

⁷kani, A’dini nga si va ’bile aliru aliani ya? (Kristoni engazu dra ma alia).

⁸Te eri ’yo ngoni ya? E’yo nde ovu mi vu inyia, azini mi tilia, mi asia indi (’di e’yo a’itani amani oluleri’i);

⁹kini mi ka Yesuni e’da Opi’i mi tisi, azini mi ka a’i mi asia indi kini Mungu enga eri ’ba draza eselia ’bo, mi nga mi pa ra.

¹⁰Te asisi ’ba yi a’i ra e’yo ’ba lazu baruri isuzu, te tisi ’ba yi e’yo e’da pata Isuzu.

¹¹Te e’yo siza ’yo ra, ’Ba dria eri a’ipiri ngani ovu drinzasi ku.

¹²Te ’ba Yahudini ’ba Giriki be yi ovuni ndu ndu ku; Opi eri alu ’ba driani, eri ovu lonyi be fezu ’ba dria eri omvepi ’diyi dri.

¹³Te, ’Ba dria alu alu Opi ma ru omvepi ’diyi nga yi pa ra.

¹⁴Te yi nga ’ba yini a’ile nga kuri omve ngoni ngoni ya? Te yi nga ’ba yini e’yoni erile nga kuri a’i ngoni ngoni ya? Te yi nga e’yo eri, ’ba e’yo olupiri kokoru ngoni ngoni ya?

¹⁵Te yi nga e’yo olu ngoni ngoni ya, ka yi ti pe ku? Ekile erini ovule sizarurile, Adaru ’ba emupi e’yo bari olupi e’vo onyiru ejipi ’diyi ma pa ndri tu ’uoni ya!

¹⁶Te yi dria inzini e’yo bari su; te Isaya eri ’yo ra, Opi, a’di a’i e’yo yini erile ama vurini ya?

¹⁷’Dini a’ita eca ’bani e’yo erilerisi, te eriza eca ’bani e’yo Kristoni olulerisi.

¹⁸Te ma ’yo, yi erini ndra ku ya? Adadaru yi eri ndra ra; ’dini O’duko yini ere yi angu dri dria, e’yo yini olule ’diyi yi ku oro drisi dria.

¹⁹Te ma ’yo, Israeli yi vani ndra ku ya? Okorisi Musa ’yo, Ma nga fe a’yani engazu emi asia ’ba ovupi sururu ku ’diyi ma e’yosi; ma nga adra fe aokoni emi nyazu suru ondua kokoruri ma e’yosi.

²⁰Te Isaya ’yo uri kokoru, ’Ba ndra ma ndrupi ku ’diyi, yi’i yi isu ma ra; ma ece ma ’ba ndra ma zipi ku ’diyi dri ra.

²¹Te Israeli ma e’yosi eri ’yo, O’du dria ma aja ma dri suru e’yo a’ipi ku, e’yo omvipi ambosi ’diyi vu.