Read lugbara 'Ba Rumia 'Diyi 11 Bible Online

'Ba Rumia 'Diyi 11 - lugbara bible

'Ba Rumia 'Diyi 11

¹Ka’dini ma ’yo, Mungu eri ’be suru eriniri ra ya? Aluni yo! Te ma’i indi ma ovu ’ba Israelini, Iburahimu ovu a’bi mani, suruti mani eri Benyaminini.

²Mungu ’beni suru erini, ndra erini nile okori ku. Emi nini e’yo sizani ’yole Elia ma e’yosiri ku ya, e’yo erini asu suzu ’ba Israelini ma ruaa Mungu vuri ya?

³Opi, yi ofu nabi mini ’bo, yi asu pari edeta edezu mi dri ’diyi va ’bo, ace kiri ma’i a’dule, te yi ndru ma fuzu indi.

⁴Te Mungu omvi e’yo eri tia ngoni ya? Ma ku ’ba alifu aziri ma ngulupiniru, kumuti osipi Baali drilia ku ’diyi.

⁵Eri ovu ’dini indi o’du ’dorisi, ’ba jolokoru erini pele ’yeta anzutirisi ’diyi indi.

⁶Te eri ka yi ope ’yeta anzutirisi, eri ovuni azisi ku; eri ka ovu azisi, ’yeta anzutiri ovuni di ’yeta anzutiri ku.

⁷Ka’dini ngoni ya? E’yo ndra ’ba Israelini ndruleri, yi isuni ku. Te ’ba opele ’diyi isuni, te acepi ’diyi ma asi ovu mbazaru,

⁸ekile e’yo sizani ’yolerile, Mungu fe ndra yi dri orindi o’du kozaniri, mile ecopi nepi kuri, azini bile ecopi eripi kuri, ecazu kpere andru.

⁹Daudi ’yo vini indi, Mi ’ba mesa yini ma ovu gbagbale, azini vuluvulule, ekile kumu pa sizurile, ekile panga ofezu yi vurile;

¹⁰mi obi yi mile ci yi kazu ndrezuku, te mi fe nguku yini ma avuva ’dani.

¹¹’Dini ma ’yo, pa yini aba ra ’dini yi ma ’de va ya? Aluni yo! Te e’deza yinisi pata eca suru dria vu, ma’yala ’bazu Israeli ma alia.

¹²Te e’deza yini ka lonyi fe ’ba wudrikuruni dri, azini omviza yini wereri ka lonyi fe suru dria dri, agapi turi, zota yini zozu tre treri nga lonyi amboru eji ngopi ya!

¹³Te ma ’yo emi ’ba suru azini ’diyi vu. Mani ovule ’ba tini pele suru azini ’diyi vuri’irisi, ma inzi azi mani ma’i,

¹⁴kani geri awa’disi ma eco ani ma’yala ’bazu ma adripi ruasi ’diyi ma asia, ’dini ma eco yi azini ’diyi opazaru.

¹⁵Te ’beza yini ka fe ’ba wudrikuruni ti ecizu Mungu beni, Munguni ngazu yi a’izu i vuri nga ovu ngoni ya? Eri ovuni idri dra ma vutiari’i ku ya?

¹⁶Te anya kapi okori eri ka ovu alatararu, anya dria eri ovu ’dinile indi; te pati ola ka ovu alatararu, pati arakala eri ovu ’dinile indi.

¹⁷Te Mungu ka ndra pati arakala azini ’diyi onyo ra, ka mi mizeitu pati aseari su mizeitu pati ngaari ma ruaa, ’dini mi mvu su azini odu ola mizeituniari’i,

¹⁸te mi ma ovu asi afu be pati arakala azini ’diyi ’bazu tokoru ku. Mi ka ovu asi afusi ti, mi ma avi ku mi edreni pati olani ku, te pati ola eri mi edreni.

¹⁹Kani mi nga ’yo, Onyo ndra pati arakala azini ’diyi ma suzu ani parinia beni.

²⁰Tandi! Onyo yi a’itaakosi, te mi pa so a’itasi. Mi ma ovu egata asi afusiri be ku, te mi ovu urisi.

²¹Te Mungu ka ndra arakala adari ku ku, eri ngani mi ku ku indi.

²²’Dini emi ndre asi ndriza Munguni pi asi oka erini be: ’ba e’depi va ’diyi vu asi okani, te mi vu asi ndrizani mi ka te ’dani asi ndriza nderi ma alia; te ka ’dini yo eri nga mi li va indi.

²³Te yi indi, yi ka te a’itaako yini ma alia ’dani ku, eri nga yi su dika, te Mungu eri ovu okpo be yi osuzu dika ra.

²⁴Te eri ka ndra mi li va mi vile mizeitu pati esele aseari ma aliarisi, mi suzu esele onyiru mi sipi kuri ma ruaa; te eri ngani vini yi osu mizeitu pati esele yi vileri ma alia indi aga ra ku ya?

²⁵Te ma leni emi ovu e’yo niza kokoru ku, ma adripi, e’yo zizaru ’dirisi, ’dini emi kazu ovuzu onduaru emi ngulupi ma milia ku; emi ma ni kini ’ba Israelini ma esele azini ma asi eca mbazaru ’bo, eri nga ovu ’dini ’dani de nga ewu pele ’ba suru dria azini ’diyi driri gani tre ku,

²⁶te, dini Israeli dria yi nga yi pa ra; ekile erini ovule sizarurile, ’Ba ’ba Aripiri nga enga Zionia, eri nga asi Mungu inzizu kuri nze suru Yakoboni ma aliarisi;

²⁷te ’diri eri e’yo aziza mani ngale azile yi vu o’du mani ngazu e’yo onzi yini wuzurisiri’i.

²⁸E’yo barisi, yi ovu ari’baru emi ma e’yosi; te e’yo pezasi yi ovu lezaru a’bi yini ma e’yosi.

²⁹Te afa feza Munguni fele ’yeta anzutirisi ’diyi ojani yi ku.

³⁰Te ekile emini ndra Mungu inzile ku, te curu’do emini yiki isule inzitaako ’ba nde ’diyini ma e’yosirile,

³¹te ’dinile indi curu’do ama isu ’ba ’diyi inzini ndra ku yiki emini ma e’yosi, ’dini yi’i vini indi ma isu yiki curu’do ra.

³²Te Mungu ombe ’ba dria inzitaako alia, ’dini eri eco ani yiki fezaru ’ba dria dri beni.

³³’A ’a, ondua Munguni ma lonyi e’yo niza beri ma alini zo ’doni ya! ’Ba econi e’yo erini lile ’diyi vazaru ku, azini ’ba econi leti erini ’diyi ma pamvu bizaru ku!

³⁴A’dini adri asisile Opini nini ya? A’dini adri e’yo ama eri drini ya?

³⁵A’dini adri afa fe Mungu dri oko eri ma nga arotini ofe eri dri ani ndonini ya?

³⁶Te afa dria efu erisi, afa dria so pa erisi, afa dria yi ovu eri vu. Diza ma ovu eri vu ’dani ’dani. Amena.