Read lugbara 'Ba Rumia 'Diyi 15 Bible Online

'Ba Rumia 'Diyi 15 - lugbara bible

'Ba Rumia 'Diyi 15

¹Te ama’i ovupi okpo be ’diyi ma ko ’ba okpo kokoru ma aza okpoako yinisi, ama ma ’ye amani lelerile ku;

²te ama dria alu alu ma ’ye e’yo onyiru ecopi ama agyi edrepiri.

³A’disiku Kristo indi ’yeni ndra ini lelerile ku; te ekile erini ovule sizarurile, O’data ’ba mi o’dapi ’diyini ’de ma dria.

⁴Te yi si e’yo dria ndra yini sile oko ’diyi ama imbazu, ama ma ovu e’yo teza be luzu drile ani, e’yo sizani ama dri asi teza fele asi omiza berisi.

⁵Te Mungu asi tezani asi omiza beri ma fe emi dri ovuzu asisile alu be emi eselia, ekile Kristo Yesu ma aliarile,

⁶’dini asi alusi azini ti alusi emi ma fe ani inzita Mungu Opi amani Yesu Kristoni ma Ata vu.

⁷E’yo ’disi emi ma a’i emi emi eselia ekile Kristoni emi a’lerile, diza fezu Mungu dri ani.

⁸Te ma ’yo emi tia, ’ba ndra Yesu Kristoni ’ba agele liza ’diyi ma aza kozu e’yo adaru Munguniri ma e’yosi, ’dini eri eco aziza ndra azile a’bipi ma tia ’diyi ’bazaru okporu,

⁹azini vini indi ’ba suru azini dria ma fe diza Mungu dri yiki erinirisi. Ekile erini ovule sizarurile, E’yo ’disi ma nga inzita fe mi dri suru dria ma eselia, ma nga ongo ngo ru mini inzizu;

¹⁰dika eri ’yo, Emi ’ba suru ndu ndu ’diyi la, emi ma ovu ayikosi ’ba erini ’diyi be tualu;

¹¹azini dika kini, Emi ’ba suru azini ’diyi dria, emi inzi Opini, ’ba suru dria ma inzi eri;

¹²dika Isaya ’yo, Ola Yeseni nga ovu indi, engapi opiru suru dria ma driliari’i; suru azini ’diyi nga ovu asi tezasi eri ma e’yosi.

¹³Te Mungu asi tezaniri ma fe emi ma ga tre ayiko pisi asi anzuru be dria emini a’iria, emini gazu tre ani e’yo tezasi okpo Orindi Alatararunirisi beni.

¹⁴Te ma’i, ma ngulupi indi ega ma asia adam e’yo eminisi, ma adripi, kini emi ma ngulupi ga tre e’yo onyirusi, emi ovu vini e’yo niza be dria, emi eco emi imbazaru emi eselia ceni indi.

¹⁵Te waraga ’diri ma alia ma si e’yo azini emi vu rota kokoru, fezu emini e’yo egazu emi asia dika, ’yeta anzutiri Munguni fele ma dririsi

¹⁶ma ’bazu azi Yesu Kristoni ngazu suru ndu ndu ’diyi vu, azi ngazu e’yo baru Mungunirisi, ’ba suru dra ejizu afa edetaru Munguni ecole a’ile onyirurile, ovupi ’bazaru alatararu Orindi Alatararusini,

¹⁷E’yo ’disi ma ma enya Kristo Yesu alia e’yo Munguni ’diyisi.

¹⁸Te ma ovu urisi e’yo azini ’yozu pe kiri e’yo Kristoni ’yele geri ma vurisi, e’yo ’yozasi azini azisi ’diyi, suru dria ’bazu e’yo erizu rutasi,

¹⁹okpo eceta pinisi tali be, okpo Orindi Alatararunisi, ’dini ma de e’yo bari Yesu Kristoni oluzu engazu Yerusalemua azini ageiniasi dria cazu kpere lurikoa,

²⁰Ava ovupi ma asiari eri ’di’i, e’yo bari oluzu pari yini ru Kristoni oluzu nga kuria, ’dini ma ma si jo ’ba azini vile jo nduri ma dria ku,

²¹te erini ovule sizarurile, ’Ba yini e’yo erini olule nga yi tia ku ’diyi nga ndre ra, ’ba e’yo eripi nga ku ’diyi nga va

²²E’yo ’disi pale kakau oga ma dri geri emuzu emi vu.

²³Te curu’do pari mani ovuzurini ovule angu ’doria yorisi, azini mani ovule ava be muzu emi vu eli kakausirisi,

²⁴ma te emi ne acita mani muzu Hispaniaaria, ma eco nga ovuzu emi be were raka, ava ma aliari dezu were, emi eco ma jizu geria ’dale ndo.

²⁵Te curu’do ma mu Yerusalemua ’ba alatararu ’diyi ma aza kozu.

²⁶Te eri ndra onyiru kanisa Makedoniaari pi ma milia Akayaari be afa feza okuzu fezu ’ba alioru ’ba alatararu Yerusalemua ’diyi ma eselia ’diyi ma aza kozu;

²⁷e’yo nde eri ovu onyiru yi ma milia, adaru yi ovu mari be yi vu, a’disiku ’ba suru dria lazini ’diyi yi ka ndra ti eci yi be e’yo Orindinirisi, onyiru yi ma ofe mari Inde yi aza kozu e’yo ruanisi indi.

²⁸Awa’dini ma ka e’yo ’diri de ’bo, Ima ka afa efi kazale ’diri ji ku fe yi dri ’bo, ma nga aga emi vurisi muzu Hispaniaa;

²⁹te ma ni ra mani ngaria muria emi vu ma nga ca asi ’ndriza Kristoniri be tre.

³⁰Te ma matu ’ba emi vu, ma adripi, Opi amani Yesu Kristonisi azini ale Orindinisi, emi ma ’di a’di lokporu ma dri ziza emini Mungu vurisi,

³¹eri ma pa ma ’ba e’yo ’eripi ku ovupi Yudiaa ’diyi dri ani, azini indi ’ba alatararu Yerusalemua ’diyi ma a’i azi mani ngale yi driri onyiru,

³²ma ma emu emi vu ayikosi Munguni lelerile, ma isu okpo o’diru ava lizu emi be ani.

³³Te Mungu asi anzuruniri ma ovu emi be dria. Amena.