Read lugbara 'Ba Rumia 'Diyi 3 Bible Online

'Ba Rumia 'Diyi 3 - lugbara bible

'Ba Rumia 'Diyi 3

¹Ka’dini ’ba Yahudini aga e’yo ngorisi ya? Agele liza ma orodri ngoni ya?

²Yi aga tu, geri driasi. Okorisi, Mungu a’i yi dri kini yi ma mba e’yo erini eceleri ma tao

³Te ngoni ya? ’ba azini yi eselia ka ovu a’ita kokoru, a’itaako yini nga e’yo Munguni ovuzu asi ada beri oja tokoru ya?

⁴’Dini yo, aluni yo! Mungu ma ovu adaru, te ’ba dria alu alu yi ’ba inzo lipi ’diyi; ekile erini ovule sizarurile, Yi ma isu e’yo mini ma ovu kililiru e’yomini ’yole ’diyisi, azini o’du yini mi ma e’yo lizurisi mi ma aga ra.

⁵Te e’yo onzi amani ka e’yo kililiru Munguniri ece, ama nga ’yo ngoni ya? Mungu eri e’yo onzi be erini adra ’bale ama vurisi ya? (Ma ’yo ekile ’bale.)

⁶’Dini yo, aluni yo! Ka’dini eco Munguni ’ba nyakua ’diyi ma e’yo lizaru ngoni ngoni ya?

⁷Te inzo mani ka e’yo ada Munguniri ece, erini ani diza isuzu aga ra, eri li ma ma e’yo ekile ma ovu ’ba onzile a’di e’yosi ya?

⁸Azini ama ’yeni onzi onyini efuzu ani ku a’di e’yosi ya?-ekile ’ba azinini ’yole inzosi ama ’yo ’dinirile. Te ’ba e’yo onzi ’yepi ’dinile ’diyi, e’yo lile yi driari ovu kililiru.

⁹Te ngoni ya? Ama aga ’ba azini ra ya? Aluni yo; ekile amani asu sule oko ’borile, ’ba Yahudini azini ’ba Girikini yi iri tro ovu e’yo onzi ma palaa;

¹⁰erini ovule sizarurile: ’Ba baruni yo, aluni ’de ku;

¹¹’ba e’yo vapiri yo, ’ba Mungu ndrupiri yo.

¹²Yi dria oja yi kalaa, yi dria tualu funi dri ku; ’ba e’yo onyiru ’yepini yo, yo, aluni ’de ku.

¹³Oliko yini ovu nyadri mgboru, andre yinisi yi ’yo e’yo lokiriru. ’Boroa ma ’yu ovu yi ma tilia ci.

¹⁴Yi ma tia otria ga tre asi draza be.

¹⁵Yi ma pani nzu ongusi ’ba ma ari adazu,

¹⁶dri jaza pi ovu yi ma geria candi be,

¹⁷te andra drio ti yi nini geri asi anzuniri ku.

¹⁸Ruta yini Mungu ruzuri yi ma milia aluni yo.

¹⁹Te ama ni ra e’yo dria azitani ’yole ’diyi eri ’yo ’ba ovupi azita ma palaa ’diyi ma tia, ’ba dria ma bi ani ti ci, azini ’ba wudrikuru dria ma e’yo ma ovu e’yo liza Munguniri ma palaa.

²⁰A’disiku yi ngani ’ba aluni ma e’yo la kililiru Mungu ma milia azita ’yezasi ku, a’disiku azitasi ’ba yi e’yo onzi ni ra.

²¹Te curu’do e’yo Munguni ’ba lazu baru azita ’yezasi kuri ece i ’bo buku azitanirini e’yo etini nzele ’ba nabiru ’diyi pieri,

²²eri e’yo Munguni ’ba lazu baru yini Yesu Kristoni a’ilerisi, ’ba dria eri a’ipi ’diyi vuri’i. Te ’ba ovuni ndu ndu ku;

²³te ’ba dria yi ’ye onzi ’bo, cani diza Munguni vu ku;

²⁴te eri ’ba la ’ba baru ’yeta anzutiri erinirisi, eri ovu afa erini fele avasiri, Yesu Kristoni ’ba onzelenirisi,

²⁵eri’i Munguni ’bale ’ba milia edeta e’yo onzi ma adi cozuriru, a’itasi, ari erinisi. ’Dini Mungu ma ece i baru erini e’yo onzi ’bani ’yele drio ’diyi wule asi e’yere inisirisi;

²⁶eri ma ece ewu cucuru’dorisi eri ma ngulupini ovuzu baru, azini erini ’ba Yesu a’ipi ’diyi lazu ’ba baru indi.

²⁷Ka’dini pari asi afuruniri ngoa ya? Li tini ku amve ’bo. A’di azitasi ya? Azita ’yetanisi ya? Yo, te azita a’ita nderisi.

²⁸E’yo ’disi ama ega yi ’ba la ’ba baru a’itasi, ’yeta azitani kokoru.

²⁹Mungu eri kiri Mungu ’ba Yahudini a’dule ya? Eri ovuni Mungu ’ba suru dria azini ’diyini indi ku ya? ’Dini, eri ovu Mungu ’ba suru dria azinini indi,

³⁰a’disiku Mungu eri alu; eri nga ’ba agele liza ’diyi la ’ba baru a’itasi, azini eri nga ’ba agele lile ku ’diyi la ’ba baru a’itasi indi.

³¹E’yo ’disi ama oja ani azita toko a’ita ma e’yosi ya? Aluni yo! Ama azita edre.