Read lugbara 'Ba Rumia 'Diyi 4 Bible Online

'Ba Rumia 'Diyi 4 - lugbara bible

'Ba Rumia 'Diyi 4

¹Ama nga di Iburahimu a’bi amani e’yo ruasiri ma e’yo ’yo ngoni ya?

²Ka Iburahimuni la ’ba baru ’yeta erinisi, eri eco ovuzaru asi afuru be ra, te Mungu ma milia ku.

³Te e’yo siza ’yo ngoni ya? Iburahimu a’i ndra Mungu ra, e’yo ’disi Mungu la eri ’ba baru.

⁴’Ba azi ngapiri eri ka oya isu, yi feni eri dri alesi toko ku, te odu erini ofezu.

⁵Te ’ba ka azi nga ku, te ka ’ba ’ba onyi koko ’diyi lapi ’ba baruri a’i, la ’ba ’diri baru a’ita erinirisi.

⁶’Dinile indi Daudi ’yo ’ba Munguni lale ’ba bari azi ’yeza kokoruri ma drileba ma e’yo, kini:

⁷’Ba Munguni ezata yini wule, e’yo onzi yini zile ra ’diyi, yi drilebaru;

⁸’ba Opini ngale e’yo onzini lale dika kuri eri drilebaru.

⁹Drileba ’diri eri ovu kiri ’ba agele liza ’diyi vu, kani ’ba likokoru ’diyi vu indi ya? Ama ’yo ra, la ndra Iburahimuni ’ba baru a’ita ma e’yosi.

¹⁰La ndra eri ’ba baru de eri ngoniru? De li agele ’bo ya, kani lini ku? Lini nga ku, te eri agele liza kokoru.

¹¹Te eri isu agele liza ecetaru onyi lale eri dri a’itasi de erini nga liza a’izu kuriari ecezu. ’Dini eri ma ovu ani ’ba dria a’ipi ’diyi ma a’biru, yi ka ovu likokoru ti, ma la yi ’ba baru indi beni;

¹²eri ma ovu ’ba lile ra ’diyi ma a’biru indi, yi ka yi li’i a’dule ku, te yi ka aci indi a’ita Iburahimuni a’ile ewu erini ovuzu lizaru kuriari ma pamvusi indi.

¹³Te aziza ndra azile Iburahimu pi vu ori erini be, kini wudrikuru dria nga ovu erini ’diniri, ovuni geri azitanirisi ku te Munguni eri lale ’ba baru a’itasirisi.

¹⁴Te ’ba azita ’yepi ’diyi ka nga lonyi Munguni feleri nyani, a’ita eca toko, azini aziza nde oja i tokoru indi.

¹⁵Te azitani adra eji, te azita ka ovu yo ezata azita nde ezazuri yo indi.

¹⁶E’yo ’disi eri geri a’itanirisi, ’dini eri ma ovu ’yeta anzutirisi ani, ’dini aziza nde ma ovu okporu ori erini vu dria-kiri ’ba ovupi azita palaa ’diyi vu a’dule ku te ’ba ovupi a’ita be Iburahimule ’diyi vu indi, te,eri ovu ama dria ma a’bini,

¹⁷erini ovule sizarurile, Ma ’ba mi suru kakau ma a’biru ’bo-Mungu erini a’ileri ma milia, Mungu nde idri fepi ’ba drazaru dri, afa ovupi yo ’diyi omvepi ekile yi indirileri.

¹⁸Iburahimu a’i ndra asi tezasi ’dani, dini eri eco ecazaru suru kakau ma a’biru ani; ekile erini ovule ’yozarurile, Mi orini nga ovu ’dini.

¹⁹Te eri ovuni okpo kokoru a’ita ma alia ku, te eri ka tro ega i ma asia i rua dra ’bo eli erinini ovule ekile turu alurisi, azini Sara ma opojo de ’bo indi ti;

²⁰erini luria aziza Munguni vu ’dani asi erini yani a’itaakosi ku, te eri zo okporu a’itasi ’dani erini diza fezu Mungu dri,

²¹te eri a’i okporu i ma asia kini Mungu eco aziza ndra erini azileri ma e’yo ’yezaru ra.

²²E’yo ’disi, la eri ’ba baru.

²³E’yo nde, la eri ’diniri, ovuni sizaru kiri eri ma e’yosi a’dule ku,

²⁴te ama ma e’yosi indi. Yi nga ama la ’ba baru ama ka Mungu Yesu Opi amani engapi ’ba draza ma eseliari a’i ra;

²⁵fe ndra eri drazu e’yo onzi amanisi, te enga eri dika ama lazu ’ba baruni.