Read lugbara 'Ba Rumia 'Diyi 7 Bible Online

'Ba Rumia 'Diyi 7 - lugbara bible

'Ba Rumia 'Diyi 7

¹Emi nini ku, ma adripi-te ma ’yo ’ba azita nipi ra ’diyi ma tiaazita ovu opiru ’ba drilia kiri de ’bani ovuzu idri beria ya?

²Te oku eri ka ovu agupi be, azita ombe eri ci agupi erini vu de agupi indi; te agupi ka dra ra, tru eri azita agupi nderimasi.

³Te eri ka mu agupi azinia de agupi erini ovu idriru, ’ba nga eri omve oku ali ’bapiriru. Te agupi ka dra ra, tru eri azita nderiasi ra, ’dini leri ka mu agupi azinia ti, eri ovuni oku ali ’bapiriru ku.

⁴Ekile ’dirile, ma adripi, emi indi emi dra ndra azita vusi geri rua Kristonisi, ’dini emi eco ovuzu azinini, eri Kristo Munguni engale ’ba draza eseliari’i, ’dini emi eco ori tizaru Mungu dri ani.

⁵Te amani mira ovuria e’yo ruani ma alia, ava; e’yo onzini ovupi azitasi ’diyi ’ye ndra azi okposi ama rua ma esele ndu ndu ’diyi ma alia, fezu amani ori tizu dratani.

⁶Te curu’do onze ama azita ma aliasi ’bo, ama dra e’yo ndra ama ombepiri vusi ’bo, ama ma nga di azi ati’baru e’yo o’diru orindirisi, e’yo oku azita sizarurisi ku.

⁷Ka’dini ama a’di ’yo ya? Azita eri e’yo onzini ya? Yo, aluni yo! Te ma nini ndra e’yo onzi ku, azita ka ndra eri ece ku. Te ma nini ndra li ku, azita ka ’yo kuria, Mi ’ba li ku.

⁸Te e’yo onzi isu geri azita alia ma bizu, eri fe ava onzi dria enga ma alia. Azita ka ovu yo, e’yo onzi ovu avuru.

⁹Andra ma ovu idriro azitani ovuzu yoria, te azita ka eca ra e’yo onzi enga di ra, te ma’i ma dra ra;

¹⁰te azita nde idri ejipiri, ma vuni eji dratani.

¹¹Te e’yo onzi eri isu geri azita nderisi, eri ici ma ra, fu ma ani erisi.

¹²Awa’dini, azita eri ovu alatararu, dika e’yo dria alu alu azitani ’yole ’diyi yi alaru, azini kililiru, azini onyiru.

¹³Ngoni ya? E’yo onyiru eca ma dri draru ya? Aluni yo Te e’yo onzi e’da i ngulupi ovuzu onzi erini dra fele ma alia e’yo onyirusirisi, ’dini azitasi e’yo onzi eco ecazaru onzi aga ra.

¹⁴Te ama ni ra azita eri ovu e’yo orindini; te ma’i, ma ovu ’ba ruani, ovuzu ati’bo jezaru e’yo onzini.

¹⁵Te e’yo mani ’yeleri ma nini ku. Te e’yo mani lele ’yeleri ma ’yeni ku, te e’yo mani ngule onziri ma ’ye’i.

¹⁶Te ma ka e’yo mani lele kuri ’ye, ma a’i de ’di, azitari onyiru.

¹⁷’Dini curu’do ma ngulupi ’yeni e’yo nderini ku, te e’yo onzi ovupi ma aliari ’yeni.

¹⁸Te ma ni ma asia, ma rua ma ngulupi ma alia e’yo onyiru aluni yo. Te lezaruni, ma le ra, te okpo mani e’yo onyiru ’yezuni yo.

¹⁹Te ma ’yeni e’yo onyiru mani lele ’yeleri ku, te e’yo onzi mani lele ’yele kuri ma vini eri ’ye’i.

²⁰Te ma ka e’yo mani lele ’yele kuri ’ye, ma ngulupi ’yeni e’yo nderi ma’ini ku, te e’yo onzi ovupi ma aliari ’yeni.

²¹’Dini ma isu azita ’diri, mani leria e’yo onyiru ’yeria, e’yo onzi ovu de ma be ci.

²²Te ma ovu ayikosi azita nde Mungunisi asi mani alia,

²³te ma ne ma rua esele alia azita nduri omba ’bazu azita asisileni be, ma agazu ma ’bazu ati’bo azita e’yo onzini ovupi ma rua eseliari vu.

²⁴Eyawaye! Ma ovu ’ba candiru tu A’dini nga ma pa rua dra be ’dorisiri ya?

²⁵Awa’difo Mungu vu Yesu Kristo Opi amanirisi! Ka’dinile, asisilesini ma ngulupi ovu ati’boru azita Munguni vu ada, te ruasini azita e’yo onziniri vu.