Read lugbara 'Ba Rumia 'Diyi 8 Bible Online

'Ba Rumia 'Diyi 8 - lugbara bible

'Ba Rumia 'Diyi 8

¹’Dini curu’do e’yo liza ovuni ’ba ovupi Kristo Yesu alia ’diyi ma dria ku.

²Te azita Orindi idrini Kristo Yesu ma aliarini tru ma azita e’yo onziniri pi ma alia draniri be.

³Te Mungu ’ye e’yo ndra azitani ecole ’yele ku erini ovule okpo kokoru ruasirisiri, ndra erini i Mvi ma ti epele rua be ekile rua e’yo onzi be ’dorile e’yo onzi edezurisi; ’dini Mungu li ndra e’yo onzi ovupi rua ma aliari ma e’yo, nde eri ra,

⁴’dini ’yeta onyiru azitaniri ma ’ye i ama ’ba acipi e’yo ruani ma vutia ku, te Orindi ma vutia ’diyi ma alia.

⁵Te ’ba acipi e’yo ruani ma vutia ’diyi adri asisile dro e’yo ruani ma dria’i, te ’ba acipi Orindi ma vutia ’diyi adri vini asisile dro e’yo Orindini ma dria’i.

⁶Te asisile e’yo ruani ma driari eri dratani, te asisile e’yo Orindini driari eri idri pi asi anzuru be.

⁷Te asisile e’yo ruani ma driari eri Mungu be ari’boru; erini azita Munguni inzile kurisi, a’disiku eri econi inzizaru ku;

⁸’dini ’ba e’yo ruani ma vuti bipi ’diyi econi ayiko fezaru Mungu dri ku.

⁹Te Orindi Munguni ka ovu emi alia, emi ovuni e’yo ruani ma vuti bizu ku te e’yo Orindini. Te ’ba azini ka ovu Orindi Kristoni be ku, ’ba nde ovuni ’ba erini ku.

¹⁰Te Kristo ka ovu emi alia, rua ovu drazaru e’yo onzisi, te orindi ovu idriru e’yo onyinisi.

¹¹Te Mungu Yesuni engapi ’ba draza ma eseliari ma Orindi ka adri emi alia, eri’i Kristo Yesuni engapi ’ba draza ma eseliari nga idri fe rua emini ecopi drazaru ’diyi dri indi, Orindi erini ovupi emi aliarisi.

¹²’Dini, ma adripi, ama ovuni mari be rua vu ku, adrizu e’yo ruani ma vuti bizu-

¹³te emi ka adri e’yo ruani ma vuti bizu emi nga dra ra, te emi ka ’yeta ruani fu Orindisi emi nga ovu idriru.

¹⁴Te ’ba dria Orindi Mungunini yi dri celeni ’diyi yi anzi Munguni.

¹⁵Te emi a’ini ndra orindi emi ’bazu ati’boru uri fezu dika ku, te emi a’i ndra orindi emi ’bazu anziru, amani owuzu ani, Baba! Ata!

¹⁶Orindi ma ngulupi eri e’yo eti nze orindi amani be kini ama ovu anzi Munguni.

¹⁷Te di ama ka ovu anzini ama ovu vini ’ba ngapi lonyi Munguni nyapi ’diyi, ama nga eri nya tualu Kristo be, ama ka candi ni eri be tualu ka, yi nga diza fe ama dri eri be tualu ndo.

¹⁸Te ma ega ama econi candi ewu ’dorini o’bizaru diza ngapi i ecepi ama vu ndori be ku.

¹⁹Te afa dria Munguni ’bale ’diyi yi eceta anzi Mungunini ngazu yi ecezuri te avasi;

²⁰te afa dria Munguni ’bale ’diyi, Mungu ’ba yi e’yo toko dri fupi ku ’diyi ma palaa, te afa nde ’diyini lelerisi ku te Mungu yi ’bapi ’dinileri leni.

²¹Mungu le afa erini ’bale ’diyi ma ovu a’itasi ani luzu drile, kini eri nga yi ma ngulupi tru indi ombeza e’yo mazani ’dirisi ’dini yi ma fi truta dizaru anzi Mungunirini ma alia beni.

²²Ama ni ra afa dria Munguni ’baleri yi dria tualu owu, yi ovu nga rua suza be okporu ekile mva azosirile, kpere curu’do;

²³kiri yi’i yo, te ama ’ba Orindi Munguni a’ipi ekile oriefi okorile ’diyi indi, ama vini indi, ama ota ama asia, e’yo Munguni ngazu ama ’bazu anzi iniru, erini ngazu ma amani onzezuri tezu.

²⁴Te ama ovu pazaru e’yo teza ’dirisi. Te e’yo ’bani nele rari tezu eri tezani yo. Te ’ba ka e’yo ne ra, eri di vini te e’yo tezasi a’disi ya?

²⁵Te ama ka afa amani nele kuri te, ama te eri asi tezasi.

²⁶Ekile be ’dirile Orindi eri okpoako amani ma aza ko; te ama nini Mungu zizu onyiru ku, te Orindi ngulupi eri zi ama dri otaza be, awu be ’bani ’yole tisi kuri.

²⁷Te Mungu asi ale ndapiri eri ni e’yo Orindini eyikileri, Orindini zile ’ba alatararu dri ekile Munguni lelerilerisi.

²⁸Te ama ni ra Mungu eri eci e’yo dria tualu onyiru ’ba eri lepi ’diyi dri, ’ba ndra erini omvele ekile erini opelerile ’diyi.

²⁹Te eri ope ’ba erini nile ndra okokele ’diyi ra, yi ma si yi ekile i Mvi ma wurale, ’dini eri eco ovuzaru mva okoriru adripi kakau ’diyi ma eselia.

³⁰Te eri omve ’ba erini opele ndra drio ’diyi indi; azini ’ba erini omvele ’diyi eri la ’ba baru indi; azini ’ba erini lale ’ba baru ’diyi eri fe ndra yi dri diza indi.

³¹Te di ama ’yo ngoni e’yo ’diyisi ya? Mungu ka ovu amaniru, a’di eco a’di ’dizu ama beni ya?

³²Eri’i i Mvi ma ngulupi kupi ku, te eri fepi ama dri driari, eri ngani afa dria fe ama dri tualu eri be indi endra kokoru ku ya?

³³A’dini nga asu su ’ba Munguni opeleni ’diyi ma ruaani ya? Te Mungu ma ngulupini yi la ’ba baruni;

³⁴a’dini nga e’yo li yi ma dria yi ndezuni ya? Te Kristo Yesu dra ra, agapiri Mungu enga eri ’ba draza eselia ra, eri’i ovupi Mungu ma dri ndiari, eri Mungu zi ama drini.

³⁵A’dini ama esele co ale Kristoniri beni ya? Kani candini ya? Kani ocokoni ya? Kani inzatani ya? Kani likini ya? Kani ovuzu pililiruri ya? Kani ovuzu ogogo dra ma siari ya? Kani omba ’ba olizu seisiri ya?

³⁶Erini ovule sizarurile, Mi ma e’yosi ’ba yi ama fu etuzu; yi ma milia ama ovu ekile be kabilo yini lele olile oli’diyile.

³⁷Yo, te adaru e’yo ’diyi ma aliasi dria ama aga ada eri’i ama lepirisi.

³⁸Te ma ni adadaru kani dra, kani idri, kani malaikani, kani e’yo angu urua ’diyi, kani e’yo andruri, kani e’yo droziri, kani okpo amboru ’diyi,

³⁹kani e’yo ovupi uru ’diyi, kani e’yo va ele ’diyi, kani afa azini dria ovupi indi ’diyi, yi econi ama esele cozaru ale Munguni Kristo Yesu Opi lamani ma aliari be ku.