Read lugbara 1 'Ba Korintoa 'Diyi 10 Bible Online

1 'Ba Korintoa 'Diyi 10 - lugbara bible

1 'Ba Korintoa 'Diyi 10

¹Te ma leni emini ovuzu nita kokoru ku, ma adripi, kini ama a’bipi dria ovu ndra iriti nderi ma etia, te yi dria zo miri ma aliarisi,

²yi dria a’i ndra baputizi Musa vu iriti pi ma alia miri be,

³yi dria nya ndra nyaka alu orindiniri,

⁴te yi dria mvu ndra afa mvuza alu orindiniri. A’disiku yi mvu yi efupi Oni orindini yi vuti bipiri ma aliasiri ra, te Oni nderi Kristo’i.

⁵Te Mungu ovuni ayikosi ’ba azini karakarau yi eselia ’diyi ma e’yosi ku; te ja yi dri angu roko driaria.

⁶E’yo ’diyi yi ovu ecetaru ama dri, ama kazu li ’bazu e’yo onzisi yini ndra li ’balerile ku.

⁷Emi ma ovu ’ba wura toko inzipi ’diyiru, ’ba azini yi eselia ’diyile ku; erini ovule sizarurile kini, ’Ba ri va nyaka nyazu, afa mvuza mvuzu, nga enga vini avita avizu ndo.

⁸Te ama ma ’ba ali, ’ba azini yi ma eselia ’diyini o’balerile ku; yi odra ani o’du alu ma alia ’ba alifu kali iri drini na.

⁹Te ama ma o’bi vini Opini, ’ba azini yi eselia ’diyini o’bilerile ku; yi ja dri urini yi ogalerisi.

¹⁰Emi ma ono vini ekile ’ba azini yi eselia ’diyini onolerile ku; yi ja dri ani ’Ba ’ba dri Japiri dri,

¹¹E’yo ’diyi ’ye yi yi vu ecetaru, si yi ama dri ama’i ’ba ecapi o’du ewu driani dri fuzuri ma tia ’diyi imbazu.

¹²E’yo ’disi ’ba osupi kini i pa so ciri ma ovu mil i kazu ’dezu va ku.

¹³Obe a azini isuni nga emi aluni ku, pe lu adripi ’ba dria ocepiri’i. Te Munguni adaru, eri ngani ku obeta emi okpo agapi rarini emi obezu ku, te obeta nde be tualu eri nga geri emini fuzuri ede, eco emini eri agazaru asi tezasi ani.

¹⁴Ka’dini ’ba mani lele ’diyi, emi ma apa inzita wura toko inzizurisi.

¹⁵Ma ’yo ekile ’ba onduaru mal tiarile; emi ma ama e’yo mani ’yoleri emi’i.

¹⁶Okele nde asi ndrizani amani asi ndriza fele driniari ovuni ti ecita ari Kristoni beri’i ku ya? Mikate nde amani nyoleri ovuni ti ecita rua Kristoni beri’i ku ya?

¹⁷Te mikateni ovule alurisi, ama’i ovupi kakau ama rua alu, ama driani mikate alu nde ma esele ’dule nyalensi.

¹⁸Emi lu ’ba Israelini e’yo ruanisi; ’ba edeta ma afa nyapi ’diyi yi ecini ti pari edeta edezuria ku ya?

¹⁹Ka’dini ma e’yo ngonini ’yo ra? Kini afa fele wura inzile inziri driri ovu afa adam ya, kani wura nderi i ovu afaadam ya?

²⁰’Dini yo, te kini afa ’ba juruni fele edetaru ’diyi, yi fe orindi onzi ’diyi dri, feni Mungu dri ku. Te ma leni emini ti ecizu orindi onzi be ku.

²¹Econi mini okele Opini mvuzaru kele orindi onzini be ku. Econi emini afa nyazaru esa Opini pi ma tia mesa orindi onzini be ku.

²²Ama nga fe Opi ma asini dra ma’yala ’bazuni ya? Okpo amani aga eriniri ra ya?

²³Azita a’i e’yo dria ra, te e’yo dria funi dri onyiru ku. Azita a’i e’yoi dria ra ’bo, te e’yo dria feni ’bani: zozuni ku.

²⁴’Ba aluni ma ndru e’yo i ngulupi ma aza kozuri ku, te e’yo ’ba azini ma aza kozori’i.

²⁵Emi nya afa dria ’bani ozile pari za lizuria ’diyi, e’yo ziza ozizu e’yo niza emini ma e’yosi ku;

²⁶nyaku pi afa alenia ’diyi be dria yini ovule Opi ma afarisi.

²⁷’Ba a’ipi ku ’diyi ma azi alu ka emi omve omu nyazu, te emi le mu ra, emi nya afa dria erini ’bale emi drilia ’diyi, e’yo ziza ozizu e’yo niza emini ma e’yosi ku.

²⁸(Te ’ba azini ka ’yo emi tia kini, Za ’dori ovu fezaru edetaru ’bo; emi ma nya ku ’ba e’yo ecepi nderi ma e’yosi, e’yo nizasi indi-

²⁹ma ’yoni e’yo niza miniri ku, te agu ’darini.) Te e’yo truza mani ovu lizaru ’ba azini ma e’yo nizasi a’disi ya?

³⁰Ma ka nya awa’difo be, yi ma aji di afa mani awa’difo fele driniari ma e’yosi a’disi ya?

³¹Awa’dini, emi ka nya ra, ka mvu ra, kani afa ngoni ’ye ti, emi ’ye afa dria diza fezu Mungu dri.

³²Emi ma ’ba kumu ’ba Yahudini piyi dri, ’ba Yunanini pie, kanisa Munguni pie dria ku,

³³ekile ma’i indi, mani o’bile ayiko fele ’ba dria dri e’yo driasirile, ma ndani e’yo ma ngulupi ma aza kozuri ku te ’ba kakau ma aza kozu, ’dini yi ma isu ani pata beni. Emi si emi ’yetasi male, ekile mani ma sile ’yetasi Kristolerile.