Read lugbara 1 'Ba Korintoa 'Diyi 11 Bible Online

1 'Ba Korintoa 'Diyi 11 - lugbara bible

1 'Ba Korintoa 'Diyi 11

¹Emi si emi ’yetasi male,ekile mani ma sile yetasi Kristolerile

²Te ma inzi emi emini ma egale e’yo driasirisi, azini emini imbata ta mbale ekile mani yi fele erru dririlerisi.

³Te ma le emi ma ni ra kini ’ba dria alu alu ma driru Kristo’i, oku ma driru agupi’i, Kristo ma driru Mungu’i.

⁴’Ba dria alu alu Mungu zipi kani e’yo olupi dri a’buzaru beri eri drinza fe dri ini dri ra,

⁵te oku dria alu alu Mungu zipi kani e’yo olupi dri a’bu kokoruri eri drinza fe dri ini dri-te eri dri tro tro ekile eri fazarurile.

⁶A’disiku oku azini ka i dri a’bu ku, ma li i dribi va; te dribi lizu va kani fazu fari ka ovu drinzaru oku vu, ma a’bu i ma dri ci.

⁷Te agupi ma a’bu i dri ku ada, erini ovule wura azini diza Mungunirisi; te oku ovu diza agupini.

⁸(Te agupi engani oku vu ku, te oku enga agupi vu.

⁹’Bani vini agupi oku ma e’yosi ku, te ’ba oku agupi ma e’yosi.)

¹⁰E’yo’disi oku ma ovu eceta okpo eri ma driliari ma e’yo ecezuri be i ma dria, malaika ma e’yosi.

¹¹(Te e’yo yo,oku soni pa agupi kokoru ku, azini vini agupi soni pa oku kokoru ku, Opi ma alia;

¹²te okuni engale agupi vurile, ’dinile agupi indi yi di efu oku ma alia. Te afa dria enga Mungu vu.)

¹³Emi ma ama e’yoni emi ngulupisi ceni; eri onyiru oku ma zi Mungu tia dri be a’bu kokoru ya?

¹⁴Adriza ’bani imbani emi ceni ku, agupi ma dribi ka du izuru, ’diri ovu drinzaru eri dri, ’dini ku ya?

¹⁵Te oku ma dribi ka du izuru, ’diri diza eriniri’i; fe dribi eri dri bongo ’beza ma paria.

¹⁶Te ’ba azini ka le agata ga e’yonisi, ama ovuni adriza ’dinileri be ku, azini kanisa Munguni yi adrini ’ye ’dinile ku indi.

¹⁷Te mani e’yo ’diri aziria emi tia, ma inzini emi ku, a’disiku emi adri emi oku tualu emini zozu onyisi ku, te onzisi.

¹⁸E’yo okori ’di, ma eri kini emini emi okuria kanisa ma alia, esele coza emi eselia indi; te ekile ma a’i e’yo ’diyi rale,

¹⁹Te imbata inzoru ma ovu emi eselia indi, ’ba o’bile ’bo ’ba adaru ’diyi ma nga yi e’da ani emi eselia beni.

²⁰E’yo ’dirisi emini emi okuria tualu, emi okuni emi nyaka Opini nyazu’i ku.

²¹A’disiku emini nyaria ’ba dria alu alu nga ji nyaka i vileri nya so oko, ’dini ’ba azini ovu abiri be, aziniri ati afa mvuzasi.

²²Ha ! Jo emini nyaka nyazu azini afa mvuza mvuzuni yo ya? Kani emi kanisa Munguni ede afa tokole, emi vini drinza fe ’ba afa kokoru ’diyi dri ya? Ma nga emi tia a’di e’yo ’yo ya? Ma nga emi inzi ra ya? Te ma inzini emi e’yo ’dirisi ku.

²³Te e’yo mani fele emi driri, ma a’i ndra Opi vu, kini, Opi Yesu ’du mikate ini yini eri ma o’di nyazu ’darisi;

²⁴te eri ka awa’difo fe ’bo, eri anyo aleni ra, ’yo ra kini, ’Diri rua mani, mani fele emisiri’i. Emi ’ye e’yo ’diri e’yo mani egazu,

²⁵Nyaka ma vutia eri ’du okele ’dinile indi, kini, Okele ’diri eri aziza 0’diru ari mani ma aliari’i. Emi ’ye, ’e’yo ’diri paleko dria emini mvuria, e’yo mani egazu.

²⁶Te paleko dria emini mikate ’diri nyaria, azini okele ’diri mvuria, emi drata Opini ece, de nga eri ecani ku.

²⁷E’yo ’disi ’ba azini ka mikate nde nya, kani ka okele Opini mvu, de adriza erini funi dri ku, e’yo erini rua Opini pi ezazu arini beri nga ovu eri ma dria,

²⁸Te ’ba ma o’bi e’yo i vileri oko, ’dinile ma nya mikate nde ma azi, ma mvu okele nde ma alia ndo.

²⁹Te ’ba ka nya ra, ka mvu ra, rua ma e’yo vakokoru, eri e’yo liza nya azini mvu i ngulupi ma ruaa ceni,

³⁰E’yo ’dirisi ’ba kakau emi eselia ovu okpo kokoru, azini adazaru, azini vini ’ba fudri ci ko o’du ’bo.

³¹Te ama ka e’yo amaniri va ra, yi ngani te e’yo amani li ku.

³²Te ka e’yo amani li ra de Opini ama co imbataruni, kazu e’yo amani lizu onzi wudrikuru be ku.

³³E’yo ’disi, adripi mani, emini emi okuria tualu nyaka nyazu, emi te emi azini,

³⁴’Ba azini ka ovu abiri be, eri ma nya i vile joa; emi kazu emi okuzu e’yo liza isuzu’i ku. Te ma nga e’yo acepi ’diyi ede mani ngaria ecaria.