Read lugbara 1 'Ba Korintoa 'Diyi 12 Bible Online

1 'Ba Korintoa 'Diyi 12 - lugbara bible

1 'Ba Korintoa 'Diyi 12

¹Afa feza Orindini fele ’diyi ma e’yosi, ma adripi, ma leni emi ma ovu e’yo niza kokoru ku.

²Emi ni ra, emi ka ovu ndra jururu, ’yi ce ndra emi dri wura inzile inzi ecopi e’yo ’yopi ku ’diyi ma vuti bizu, yini emi dri cele saarurile.

³E’yo ’disi ma fe emi ma ni kini, ’ba azini e’yo ’yopi Orindi Munguni ma aliari ’yoni kini, Yesu ovu trizaru, ’dini ku, azini vini ’ba azini ’yoni kini, Yesu eri Opi’i, ’dini ku, pe lu Orindi Alatararurisi a’dule.

⁴Te afa feza ma suruti yi ndu ndu, te Orindi eri alu ’da’i;

⁵te azi ’ba aza kozu ’diyi ma suruti ndu ndu, te Opi eri alu ’da’i;

⁶te okpo azi ngazu ’diyi ma suruti yi ndu ndu indi, te Mungu afa dria ’yepi okposi e’yo dria ma aliari alu ’da’i.

⁷Te fe e’daza Orindini i e’dazuri ’ba dria alu alu dri, ’ba aza kozu ani beni.

⁸’Ba aluri dri fe e’yo ’yoza onduaniri Orindi ndesi, ’ba aziniri dri fe e’yo ’yoza nitaniri Orindi nde vusi,

⁹’ba aziniri dri a’itani Orindi nderi ma alia, ’ba aziniri dri feta ’ba ma rua atizu ’diyi Orindi nde aluri ma alia,

¹⁰’ba aziniri dri okpo tali ’yezu diyi, ’ba aziniri dri e’yo oluzu’i, ba aziniri dri e’yo orindi ’diyini amazuri’i ’ba aziniri dri e’yo ’yozu ti ndu ndusiri ojazuri’i.

¹¹Te ’ye e’yo diyi dria Orindi nde alu ’dari ma okposi, erini e’yo ndu ndu awaria ’ba dria alu alu dri ekile erini lelerile

¹²Ekile ruani ovule alu, te esele be kakaurile, azini esele ruani dria ovupi kakau ’diyini yi ecile rua alururile, Kristo ovu ’dinile indi.

¹³A’disiku Orindi alu ma alia ama dria a’i baputizi amani fizu rua alu ma alia, kani ’ba Yahudini kani ’ba Girikini, kani ati’baru kani karianziru, fe ama driani Orindi alu mvuzu’i.

¹⁴A’disiku rua ovuni lu esele alu ku, te kakau.

¹⁵Pa ka ’yo ra kini, Mani ovule gi’i kurisi, ma ovuni rua ma eseleru ku; te e’yo ’disi ovuni kini eri ovuni rua ma eseleru ku, ’dini ku.

¹⁶Te bi ka ’yo ra kini, Mani ovule mile’i kurisi ma ovuni rua ma eseleru ku; te e’yo ’disi ovuni kini eri ovuni rua ma eseleru ku, ’dini ku.

¹⁷Rua dria ka ovu mile efi’i, e’yo erizuri ngoa ya? Rua dria ka ovu e’yo erizuri’i, afa aji nguzuri ngoa ya?

¹⁸Te di Mungu ’ba rua ma esele ’diyi dria alu alu rua ma alia ekile erini lelerile.

¹⁹Te esele dria ka ovu esele alu, rua nde ma piruri ngoa ya?

²⁰’Dini esele ovu kakau, te ruani alu.

²¹Te econi mileni e’yo ’yozaru gi tia kini, E’yo mani lele ’yele misini yo, ’dini ku; dri econi vini ’yozaru pa tia kini, E’yo mani de ’yele emisini yo, ’dini ku.

²²Te rua ma esele amani egale yi okpo be were ’diyi ma e’yo ovu amboru tu aga ra,

²³te rua ma esele amani egale kini inzita yini were ’diyi, ama yi osu inzitasi aga ra, te rua amani ma esele e’dapi onyiru ku ’diyi ovu rua ma onyi be aga ra,

²⁴te rua amani ’ma esele e’dapi onyiru ’diyi leni onyi azini drinia ku. Te Mungu eci rua nde dria tualu, inzita agapiri fezu esele inzita kokoruri dri,

²⁵esele coza ma ovu ani rua ma alia ku beni, te rua ma esele dria ma ’ba yi asi yi aza kozu yi eselia dria tro tro.

²⁶’Dini esele alu ka ovu candi be, esele dria ovu candiru eri be; kani esele alu ka ovu inzizaru, esele dria ovu ayikosi eri be.

²⁷Te emi ovu rua Kristoni, emi alu alu ovu rua nde ma eseleni.

²⁸Te Mungu ope ’ba azini kanisa alia ’dini, okorisi ’ba ti opele ’diyi, iririsi ’ba e’yo nabiru olupi ’diyi, narisi ’ba ’ba imbapi ’diyi, vutinia ’ba tali ’yepi ’diyi pi, vutinia ’ba afa feza ’ba rua atizuri be ’diyi pie, ’ba ’ba aza kopi ’diyi pie, ’ba ’ba dri cepi ’diyi pie, ’ba e’yo ’yopi ti ndu ndusi ’diyi pie dria.

²⁹’Ba dria yi ’ba ti opele ’diyiru ya? ’Ba dria yi ’ba e’yo olupi ’diyiru ya? ’Ba dria yi ’ba ’ba imbapi ’diyiru ya? ’Ba dria yi ’ba tali ’yepi ’diyiru ya?

³⁰’Ba,dria yi afa feza ’ba atizuri be ya? ’Ba dria yi e’yo ’yo ti ndu ndusi ya? ’Ba dria yi ti oja ra ya?

³¹Te emi lima le ovuzu afa feza agapi ra ’diyi be avasi.