Read lugbara 1 'Ba Korintoa 'Diyi 13 Bible Online

1 'Ba Korintoa 'Diyi 13 - lugbara bible

1 'Ba Korintoa 'Diyi 13

¹Te ma ece emi dri geri onyiru tu agapi rari ’di. Ma ka e’yo ’yo andre ’banisi, kani malaikanisi ra ti, te ka ovu leta avasiri be ku, ma eca ovuzu mola wupi wurile, kani emve cole corile.

²Te ma ka e’yo olu nabile, ka e’yo zizaru ’diyi va dria, nita dria be, ma ka ovu a’ita be dria ’dini mani ecozu ’ani oni amboru ’diyi onzezu yi pariasi ra ti, te ma ka ovu leta avasiri ’be ku ma ovu toko.

³Te ma ka afa ’mani fe dria nyaka awazu ’ba alioru ’diyi dri, ma ka ma rua fe evezu acisi,ti, te ma ka ovu leta avasiri be ku, orodrini ma dri yo.

⁴Leta avasiri eri asi teza be, eri ’asi ndriza be; leta avasiri ovuni ’ma’yalasi ku; leta avasiri ’yoni e’yo afusi ku, ipini i afusi ku indi,

⁵eri ’yeni e’yo dri fupi ’ba milia kuri ku, ndruni e’yo i vileri ku, omvini e’yo aokosi ku, egani e’yo ’onzi ku;

⁶ovuni ayikosi e’yo onzisi ku, te ovu ayikosi e’yo adaru’risi;

⁷eri candi a’i dria asi tezasi, leri e’yo dria a’i a’itasi, eri asi ’baza be e’yo dria tezu, eri ovu asi e’yere be e’yo dria ma alia andekokoro.

⁸Leta avasiri deni i ku; te e’yo oluza nabiru ’diyi nga yi de ra; e’yo ’yoza ti ndu ndusi ’diyi nga asi ra; nitani nga i de ra.

⁹Te ama kiri e’yo ma esele ni’i a’dule, azini ama kiri e’yo nabiruri ma esele olu’i;

¹⁰te e’yo ecapi i paria tre ’bori ka eca ra, e’yo eseleruri nga i de ra.

¹¹Mani ndra ovuria mvaru ma adri ndra e’yo ’yo mvale, ma adri ndra e’yo ega mvale, ma adri ndra asisile dro mvale; te mani zoria agupiru ’boria ma ku e’yo mvaniri ja.

¹²Awa’dini, curu’do ama wura amani ndre mandara ma alia ndi ndi ku, te o’du ’dasi ama nga ama ndre milia milia. Curu’do ma ni kiri e’yo ma eseleni’i a’dule; te o’du ’dasi ma nga e’yo ni ekile yini ma nile ’borile.

¹³Te di e’yo na ’diyi indi, yi adri ’dani: a’tani, e’yo tezani, leta avasiri; te agapi yi ma eselia ambori eri leta avasiri’i.