Read lugbara 1 'Ba Korintoa 'Diyi 15 Bible Online

1 'Ba Korintoa 'Diyi 15 - lugbara bible

1 'Ba Korintoa 'Diyi 15

¹Te ma adripi, ma fe emi ma ni e’yo baru mani ndra olule emi tia, emini ndra a’ile, emini pa sozu eri alia,

²emini ovuzu pazaru erisiri’i, emi ka e’yo ’yoza mani olule emi tiari bi kirikiri-emi ka ndra awi eri a’i oye kurisi.

³Te ma idri emi dri okorisi e’yo fele ma driri, kini Kristo dra azi onzi amanisi, ekile e’yo sizani ’yolerile,

⁴sa eri ra, eri enga o’du nasi ra ekile e’yo sizani ’yolerile,

⁵eri e’da i Kefa vu, vilerisi ’ba mudri drini iri ’diyi vu indi.

⁶Vu tinia e’da i vini adripi vu tualu pari alua, yi ma kalafe aga turu towi ra, te yi ma eselia ’ba kakau ovu indi troa curu’do, te yi ma azi ’diyi, o’du o’be yi ’bo.

⁷Vutinia e’da i vini Yakobo vu, vutinia ’ba ti opele ’diyi vu dria.

⁸’Ba dria ma vutia eri e’da i ma vu indi, ekile mva osipi mba alipi agaarile.

⁹Te ma ovu ’ba werearu tu ’ba ti opele ’diyi ma eseliari’i, ma funi dri ’bani ma omvezu ’ba ti peleriru ku, mani kanisa Munguni inzalerisi.

¹⁰Te ’yeta anzutiri Mungunisi ma ovu ekile mani ovulerile, te ’yeta anzutiri erini ovupi fezaru ma driri ovuni tokoru ku. Te ma nga azi okposi aga yi dria ra, te ma’i yo, te ’yeta anzutiri Munguni ovupi ma beri nga azi nderini.

¹¹’Dini kani ma’i, kani yi’i yani, ama olu ’dinile ra, emi a’i ’dinile indi.

¹²Te e’yo oluza ka ’yo kini Kristo enga ’ba draza eselia ’bo, ’ba azini emi eselia ’diyi ’yo kini, Engata ’ba draza ma eseliari yo, ’dini ngoni ngoni ya?

¹³Te engata ’ba draza eseliari ka ovu yo, Kristo engani de ndra vini ku indi;

¹⁴te Kristo ka enga ku, oluta amani ovu di toko, a’ita; emini ovu vini toko indi.

¹⁵Azini vini isu ama ovu ’ba e’yo Munguni ma eti nzepi inzoru ’diyi, amani e’yo eti nzele Mungusi kini eri enga Kristoni ’bo, ’dinirisi, te de engani eri ku, ka ovu adaru kini ’ba draza engani ku.

¹⁶A’disiku ’ba draza ka enga ku, Kristo engani de ndra ku lindi.

¹⁷Te Kristo ka ndra enga ku, a’ita emini ovu toko, emi ovu nga azionzi emini ma alia ’dani.

¹⁸Azini vini ’ba o’duni o’bele Kristo ma alia ’diyi la dri ’bo indi.

¹⁹Ama ka ovu asi teza be Kristo ma alia kiri ewu amani ovuzu idriru ’dorisi a’dule, e’yo amani ovu candiru tu aga ’ba azini ’diyi dria ra.

²⁰Te curu’do Kristo enga ’ba draza eselia ’bo, eri anyadri kapi oko ’ba o’du kopi ’diyi ma eseliari’i.

²¹Te drani ecale ndra ’basirisi,engata ’ba draza eseliari eca ’basi indi.

²²A’disiku ekile Adamu ma alia ’ba driani odralerile, ’dinile indi Kristo ma alia ’ba dria nga ovu ’bazaru idriru.

²³Te ’ba dria alu alu yi paria ’yeke: anyadri kapi okori Kristo’i, vilerisi ’ba Kristoni ’diyi erini emviria.

²⁴Vutinia asizani, erini ngazu suru nyaza fezu Mungu Ata dri, erini opi nyaza dria pi ojazu tokoru dri ceza opini dria pie, okpo be dria ’boria,

²⁵Te eri ma ovu opiru ’dani, de nga eri ’bani juru ini dria i ma pa agelea ku.

²⁶Juru erini ngale ojale tokoru vile asizuri eri drani.

²⁷A’disiku kini, ’Ba afa dria eri pa agelea, eri ma e’yo erizu. Te eri ka ’yo ra, ’Ba afa dria e’yo erini erizu ’bo, mi nga ni ra eri kilili kini ’ba afa dria ’bapi e’yo erini erizuri ace lu ’bakokoruni.

²⁸Te afa dria ka nga ovu ’bazaru e’yo erini erizu ’bo, o’du ’dasi Mvini nga ’ba afa dria ’bapi e’yo erini erizuri ma e’yo eri indi, ’dini Mungu ma ovu dria, afa dria ma alia.

²⁹Ka ’dini ku, ’ba baputizi bipi ’ba draza ma e’yosi ’diyi nga a’di ’ye ya? ’Ba draza ka enga aluni ku, yi di baputizi bi yi ma e’yosi a’disi ya?

³⁰Ama vini ama fe dra dri eru vusi dria a’disi ya?

³¹Ma dra zuzu ada; ma ’yo ’dini, ma adripi, oyo sozu asi afu mani ma enyazu e’yo eminisi Kristo Yesu Opi amani ma aliarisi!

³²Ma ka ndra omba ’ba Efesoa nguru be, ’bani adrile ’yolerile, ma nga a’di orodri isu ya? ’Ba draza ka enga ku, ama ma nya, ama ma mvu, a’disiku ama odra dru.

³³’Ba ma ici emi ku: Ti ecizu ’ba onzi beri adriza onyiruri eza eza.

³⁴Emi enga, onyi ma fu kani emini, emi ma ’ye e’yo onzi dika ku. A’disiku ’ba azini nini nga Mungu ku. Ma ’yo e’yo ’diri drinza fezu emi dri.

³⁵Te ’ba azini nga ’yo ra kini, ’Ba draza enga ngoni ngoni ya? Azini, Yi emu rua ngonile be ya?

³⁶Mi ’ba ondua kokoruni! Afa mini sale mi’iri engani idriru ku, ka dra kuria,

³⁷Te afa mini saleri, mi sani ruani ngapi ovupiri’i ku, te oriefi a’dule, kani ondu, kani ori ma suruti aziniri.

³⁸Te Munguni rua fe eri dri ini lelerile, te ori dria alu alu dri eri rua yi vileri fe’i.

³⁹Za dria ovuni trotro ku, te ’ba ma za ndu, anyapa za ndu, aria za ndu, e’bi za vini ndu.

⁴⁰Rua ’bua ’diyi yi indi, azini rua nyakua ’diyi vini indi; te afa ’bua ’diyi ma diza eri ndu, afa nyakua ’diyi ma diza eri ndu indi.

⁴¹Diza etuni eri ndu, diza mbaniri ndu, diza ’bi’bioniri vini ndu indi; te ’bi’bio alu ma diza ovu ndu ’bi’bio aziniri ma diza be.

⁴²Engaza ’ba draza ma eseliari eri ’dini indi. Sa eri mazaru, enga eri makokoru.

⁴³Sa eri inzikokoru, enga eri diza be. Sa eri okpo kokoru, enga eri okpo be.

⁴⁴Sa eri rua ’baniru, enga eri rua orindiniru. Rua ’bani ka ovu indi, rua orindiniri alu vini indi.

⁴⁵Te eri ovu ndra sizaru ’dini kini, Agu oko Adamururi ofu ori idri beriru; te Adamu vileri eri orindi idri fepiri’i.

⁴⁶Te afa orindiruri ovuni okori’i ku, te afa ’baniri’i; afa orindiruri nga efu vilerisi ndo.

⁴⁷’Ba okori ibi enga nyakua, eri irifurani; ’ba iriri ibi enga ’bua.

⁴⁸’Ba irifurani ’diyi ovu ekile ’ba irifuranirini ndra ovulerile; ’ba ’bua ’diyi ovu ekile ’ba ’buarini ovulerile,

⁴⁹Ekile amani ’ba irifuraniri ma wura ejilerile, ’dinile ama nga ’ba ’buari ma wura eji indi.

⁵⁰Te ma ’yo ’dini, ma adripi, kini, rua ari beri econi suru Munguni nyazaru i ma afaru ku, te afa mapi mari econi vini afa mapi kuri nyazaru i ma afaru ku indi.

⁵¹Mi ndre! Ma emi dri e’yo zizaruri ece ’di. Ama dria ngani o’du ko ku, te yi nga ama dria ma wura oja nduru,

⁵²coti mbelekocici, ’bani yi mile colerile, guka asizuri ka nga wu raria. Te gukani nga wu ra, ’ba draza yi nga enga makokoru, azini yi nga ama wura oja nduru.

⁵³Rua ecopi mapi ra ’diri ma su rua ecopi mapi kuri, azini rua ecopi drapi ra ’diri ma su rua ecopi drapi dika kuri.

⁵⁴Te rua ecopi mapi ra ’diri ka nga rua ecopi mapi dika kuri su ’bo, azini rua ecopi drapi ra ’diri ka nga rua ecopi drapi dika kuri su ’bo, ’dini e’yo yini sile ’bori nga eca i paria ’yeke, kini: Ki dratani e’yo agaza ma alia ’bo.

⁵⁵Dra la, e’yo agaza miniri ngoa ya? Dra la, iri mini ’ba duzuri ngoa ya?

⁵⁶Iri drani ’ba duzuri eri e’yo onzini, azini okpo e’yo onzini eri azitani,

⁵⁷Te awa’difo Mungu vu, erini e’yo agaza fele ama dri Opi amani Yesu Kristosirisi.

⁵⁸E’yo ’disi, adripi mani lele ’diyi, emi so pa kirikiri, yakokoru, ovuzu azi Opini be tre o’du dria, emini nile kini emi ecandini emi oye Opi ma alia kurisi.