Read lugbara 1 'Ba Korintoa 'Diyi 2 Bible Online

1 'Ba Korintoa 'Diyi 2 - lugbara bible

1 'Ba Korintoa 'Diyi 2

¹Te ma’i, ma adripi, mani emuria emi vu, ma ecani ndra e’yo eti nzeza Munguni oluzu emi tia e’yo ’yoza ndrizaru tu kani ondua agapi turisi, ’dini ku.

²A’disiku ma ede ndra e’yo ma asia kini ma ngani e’yo azini ni emi eselia ku pe Kristo bani yini di pati ruaari’i.

³Te ma ovu ndra emi eselia okpo kokoru, uri be, azini rua yaza be tu.

⁴E’yo mani ’yoleri pi e’yo oluza mani be, ovuni e’yo ’yoza ’ba obezu onduasiri be ku, te e’yo eceza Orindinisi azini okponisi,

⁵a’ita emini ma so pa ani ondua ’bani ma alia ku te okpo Munguni ma alia.

⁶Te ti, ama adri e’yo onduaru ’yo ba mbapi e’yosi ’bo ’diyi ma eselia, te ovuni ondua ewu ’doriniri’i ku, kani ’ba ’ba dri cepi ewu ’dosi yi ojapi tokoru ’diyiniri’i ku,

⁷te ama adri ondua Munguniri ’yo e’yo zizasi, ondua ovupi ndra zizaru Munguni pele okokele de nga ewu azini ’diyini ovuria yoria diza amani ma e’yosiri’i.

⁸’Ba ’ba dri cepi ewu ’dosi ’diyi ma azi aluni nini ondua ’diri ku; a’disiku ka ndra ni ra te’do dini ndra Opi dizaniri pati ruaa ku.

⁹Te erini ovule sizarurile, Afa mileni ndrele ku, azini bileni erile ku, azini fipi ’ba asia ku, afa nde Munguni edele ’ba eri lepi avasi ’diyi dri ’diyi,

¹⁰Mungu ece yi ama dri Orindisi ra. Orindini e’yo dria ma eti ndru, ka adri e’yo Munguni aliru ’diyi ti.

¹¹Te ’ba eselia, e’yo ’bani nipi rari a’di’i ya; eri kiri orindi ’ba ndeni ovupi eri ma aliari’i ku ya? ’Dinile indi ’ba aluni vani e’yo Munguni ku, pe kini Orindi Munguniri’i.

¹²Te ama a’ini orindi nyakuniri ku, te Orindi engapi Mungu vuri’i, ama ma ni ani afa Munguni fele ama dri avasi ’diyi beni.

¹³Ama e’yo nde ’diyi ’yo e’yo ’yoza ondua ’banini imbaleri ’diyisi ku, te Orindini imbaleri ’diyisi, e’yo orindini o’bizu e’yo orindini be.

¹⁴Te ’ba ovupi kiri orindi ’bani be’iri a’ini Orindi Munguniri ma e’yo ku, yini ovule e’yo azazaru eri ma miliarisi; te econi erini yi nizaru ku, yini ovule vazaru orindisirisi.

¹⁵Te ’ba orindiniri adri e’yo dria va ra, te ’ba aluni vani agu nderi ma e’yo ku.

¹⁶Te a’di ni asisile Opini, erini ani eri imbazuni ya? Te ama ovu asisile Kristoni be.