Read lugbara 1 'Ba Korintoa 'Diyi 6 Bible Online

1 'Ba Korintoa 'Diyi 6 - lugbara bible

1 'Ba Korintoa 'Diyi 6

¹’Ba alu emi eseliari ka ovu e’yo be i agyi vu, eri ovu asi mbazasi e’yo nde jizu tozu ’ba onzi ’diyi ma milia, te ’ba alatararu ’diyi ma milia ku a’disi ya?

²Emi nini ku kini ’ba alatararu ’diyi nga wudrikuru ma e’yo lini ya? Te emi ka ovu wudrikuru ma e’yo lipiriru emi’i, emi funi dri e’yo werea ’diyi lizaru ku ya?

³Emi nini ama nga malaika ma e’yo li ama’i ku ya? Ka’dini e’yo idri, dirini ama ngani li aga ra ku ya?

⁴Ka’dini emi ka ovu idri ’dori ma e’yo be lizaru, emi ’ba toko kanisani inzile ku ’diyi ’ba e’yo lizu’i ya?

⁵Ma ’yo e’yo ’diri drinza fezu emi dri. Eri ovu ’dini, kini ’ba onduaru aluni emi eselia ecopi i adripi ma e’yo lizuni yo ya?

⁶Te adripini i adrini to kpere ’ba a’ipi ku ’diyi ma milia.

⁷Te emini ovuzu e’yo toza be emi eseliari ofu emi ma ezataru di ’bo Emi a’ini bani ’bani emi ’yezu onziri ku a’disi ya? Emi a’ini bani ’ba azinini emi afa opazuri ku a’disi ya?

⁸Te emi ngulupi e’yo onzi ’ye, emi ’ba ma afa opa, ada emi ’ye ’dini kpere emi adripi vu indi.

⁹Kani emi nini ku kini, ’ba e’yo onzi ’yepi ’diyi ngani suru Munguni a’i yi ma afaru ku ya? ’Ba ma ici emi ku; ’ba ali o’bapi ’diyi pi, ’ba wura inzile inziri inzipi ’diyi pie, ’ba acipi saaru ’diyi pie, agupi i ojapi okule ’diyi pie, ’ba lapi agupi agyisi ’diyi pie,

¹⁰oguou pie, ’ba li ’bapi ’ba azi ma afasi ’diyi pie, ’ba ewani ’bele ’diyi pie, ’ba ’ba o’dapi ’diyi pie, ’ba ’ba azini ma afa pamvu ripi nyapi okposi ’diyi pie, ’ba ’diyi dria ngani suru Munguni a’i yi ma afaru ku.

¹¹’Ba azini emi eselia ’diyi ndra ’dinile. Te oji emi ’bo, ’ba emi alatararu ra, la emi ’ba kililiru Opi Yesu Kristo ma rusi, Mungu amaniri ma Orindi ma alia indi.

¹²Azita a’i afa dria ma dri ra ’bo, te afa dria ’yezu funi dri onyiru ku. Azita a’i afa dria ma dri ra ’bo, te ma leni afa aluni ma okpo ma nde ma ku.

¹³Nyakari ’ba ma aleni, ’ba ma aleri nyakani-te Munguni nga yi oja iri tro toko. Te rua ’bani ovuni ali ’bazani ku, te Opini, azini Opi eri ruani.

¹⁴Te Mungu enga Opini ’bo, azini eri nga ama enga indi okpo i inisi,

¹⁵Emi nini kini rua emini ovu rua esele Kristoni ku ya? Ma nga vini Kristo ma rua esele ’du ojazu oku saaru ma rua eseleru ya? ’Dini ku!

¹⁶Kani emi nini kini i ’ba i ecipi oku saaru beri ofu rua aluru eri be ku ya? A’disiku eri kini, Yi iri tro nga ofu rua aluru.

¹⁷Te ’ba i ecipi Opi beri ofu orindi aluru.

¹⁸Emi apa ali ’bazasi apa apa. Ezata azini cina ’bani ezale ’diyi ovuni yi ma ruaa ku, yi amveleru; te ’ba ali ’bapiri i ma ngulupi ma rua eza.

¹⁹Kani emi nini kini rua emini ovu hekalu Orindi Alatararu ovupi emi alia, emini a’ile Mungu dririni ku ya? Emi ovuni afa emi ngulupiniru ku;

²⁰a’disiku je emi ajesi. Emi ma ’ba di ani Mungu dizaru rua emini ma alia.