Read lugbara 1 'Ba Korintoa 'Diyi 9 Bible Online

1 'Ba Korintoa 'Diyi 9 - lugbara bible

1 'Ba Korintoa 'Diyi 9

¹Ma ovuni ’ba ti peleriru ku ya? Ma ndreni Yesu Opi amani ma’i ku ya? Emi ovuni azi pamvu mani Opi ma alia ku ya?

²Ma ka tro ovu ’ba ti peleriru ’ba azini vu ku ti, ma ovu ’ba ti peleriru emi vu ra; a’disiku e,yo mani ovuzu ’ba ti pele Opi ma aliariruri, ecetani bani emi’i.

³E’yo mani omvile ’ba ma e’yo ozipi ’diyi ma tiari eri ’di.

⁴Feni ama dri okpo nyaka nyazu azini afa omvuza mvuzurini ku ya?

⁵Feni ama dri okpo acizu oku amani amvipi e’yo a’ipiruri be, ekile ’ba ti opele azini ’diyile, adripi Opini ’diyi pie, Kefa be ku ya?

⁶Kani kiri ama’i Baranaba be, feni okpo ama dri azi ngale drisiri kuzu ja ku ya?

⁷Asikari ngori mu ombaa i ma ngulupi ma afasini ya? ’Ba ngori ka zabibu pati esi amvua, ngani efini nya ku ya? ’Ba ngori ka ndri oce, ngani lesuni mbe ku ya?

⁸E’yo mani ’yole ’diri eri ’bani ’yoleniri’i ya? Azita ’yoni trotro ’dinile indi ku ya?

⁹A’disiku eri ovu sizaru azita Musani ma alia kini, Mi ma ombe ranya ma ti, erini anya oturia ku. Mungu ega e’yo ranyani ra ya?

¹⁰Eri ’yoni bani e’yo amanisi ku ya? Ada, si e’yo amanisi, a’disiku onyiru ’ba amvu ’yapiri ma ’ya asi tezasi, azini ’ba anya copiri ma co asi tezasi, kini, i nga efiniri nya ra.

¹¹Ama ka afa orindini ri emi vu, ka’dini eri e’yo amboru ama ka afa loza rua ma aza kozuri isu emi vu ya?

¹²’Ba azini ka ovu okpo be ’yezu ’dinile emi vu, agapiri ama’i ku ya? Te ti, ama ’yeni okpo ’dirisi ku, te ama a’i candi dria, ama kazu e’yo baru Kristoniri ogazu ku.

¹³Emi nini kini ’ba azi alatararu ngapi hekalua ’diyi, yi adri afa hekaluni nya ra ku ya? ’Ba azi ’yepi pari edeta edezuria ’diyi adrini afa pari iedeta edezuria ’diyi ma azi nya ra ku ya?

¹⁴’Dini Opi azi kini ’ba e’yo bari olupi ’diyi ma isu afa yi ma idri ma aza kozuri e’yo barisi.

¹⁵Te ma ’yeni ani afa ’diyi ma azi aluni ku, azini vini ma sini e’yo ’diri eri ma ovu ani ’yezaru ma vu ’dini ku. Te mani drazuri onyiru aga ’bani e’yo mani ma enyazuri ’bazu tokoruri ra.

¹⁶Te ma ka e’yo bari olu, ’di ovuni e’yo mani ma enyazuri ku; mi ma mi mi; ada, candi ma dri ma ka e’yo bari olu ku!

¹⁷Te ma ka ’diri ’ye avasi ceni, orodri mani indi; te ma ka ’ye avasi ceni ku ti, ku azi e’yo bari oluzuri ma dri ’bo.

¹⁸Ka’dini orodri maniri ngoni ya? Eri ’di: mani e’yo bari oluria, ma ma ’ba e’yo bari ovuzu aje kokoru, ma ma ’ye okpo mani e’yo bari ma aliarisi ma ma ngulupi ma aza kozu ku.

¹⁹Ma ka tro ovu ati’boru ’ba aluni dri ku ti, ma fe ma ovuzu ati’boru ceni ’ba dria dri, ma ma isu ani ’ba kakau aga ra beni.

²⁰’Ba Yahudini vu ma eca ovu ’ba Yahudiniru, ma ma isu ’ba Yahudini ani; ’ba azita ma palaa ’diyi vu ma eca ovuzu ’ba azita palaariru-ma ma ngulupini ovuria ’ba azita ma palaari’i ku-te ma ma isu ’ba azita palaa ’diyi ani.

²¹’Ba azita kokoru ’diyi vu ma eca ovu ekile ’ba azita kokoruriru-mani ovuria azita kokoru Mungu vu ku, te azita be Kristo vu -ma ma isu ’ba azita kokoru ’diyi ani.

²²’Ba okpo koko ’diyi vu ma eca ovu okpo kokoru, ma ma isu ’ba okpo kokoru ’diyi ani. Ma eca afa driale ’ba dria vu, ’dini geri driasi ma ma opa ’ba azini ’diyi ani beni.

²³Te ma ’ye afa dria e’yo barisi, ma ma isu ti ecita e’yo bari ma aliari yi be tualu ani.

²⁴Emi nini ’ba ongu nzupi avita ma alia ’diyi nzu dria, te kiri ’ba alu a’i afa nde azilerini ku ya? Emi ma nzu ’dini, emini afa a’izu ani.

²⁵Te ’ba o’bipi asi driasi abala ma alia ’diyi dria alu alu adri i ma agei te e’yo driasi. Te yi e’yo ’diri ’ye ekilaza ecopi mapi rari a’izu, te ama’i ekilaza ecopi mapi kuri’i.

²⁶Ka, dini ma nzu ani ’dini saaru ku, ma ’ba si drisi ’dini oli sizu toko ku;

²⁷te ma rua mani odi okposi eri ’bazu ati’boru, yi kazu ma gazu ku, mani e’yo oluzu ’ba azini tia ’bori ti.