Read lugbara 2 'Ba Korintoa 'Diyi 1 Bible Online

2 'Ba Korintoa 'Diyi 1 - lugbara bible

2 'Ba Korintoa 'Diyi 1

¹Paulo, ’ba ti pele Kristo Yesuni e’yo Munguni lelenirisiri, adripi Timoteo be, Kanisa Munguni ovupi Korintoari pi vu, ’ba alatararu dria ovupi Akaya dria ma alia ’diyi be:

²’Yeta anzutiri pi ma ovu emi vu asi anzuru be engazu Mungu Ata amani pi vu Opi Yesu Kristo be.

³Awa’difo Mungu Opi amani Yesu Kristo ma Ati vu, eri Ata yiki be azini Mungu asi omiza driani;

⁴eri ama asi omipi inzata amani ma alia driari, ’dini amani ecozu ’ba dria ovupi inzata ma alia ’diyi ma asi omizaru, asi omiza nde Munguni ama ngulupi ma asi omizurisi.

⁵Ekile candi Kristoni ’diyini gale ama ruaarile, ’dinile asi omiza amani ga tre Kristosi indi.

⁶Te yi ka ama inza ra, eri emini asi omiza pi isuzu pata be ani; yi ka ama asi omi ra, eri emini asi omiza isuzu ani, asi omiza nde emi ’bapi okporu candi trotro amani isulerile ’diyi nyazu asi tezasiri’i.

⁷Azini asi teza amani e’yo eminisiri eri pa so kiri kiri; amani niria kini ekile emini ti ecile ama be candi ma aliarile, ’dinile emi nga ti eci asi omiza ma alia indi.

⁸Te ama leni emi ma ovu nita kokoru ku, adripi, inzata amani ecapi ama ruaa Asiari ma e’yosi; te eri ovu nzizaru tu, aga okpo amani ra, ’dini ama ’bani ama asi kini ama nga ama idri pa ra, ’dini ku.

⁹Te ama’iruni, ama ovu e’yo liza dratani be ama ngulupi ma dria, ama ma ’ba ani a’ita amani ama ma ngulupi ma dria ku, te Mungu ’ba draza engapiri ma dria;

¹⁰eri ari ndra ama drata amboru ’dapiri ma alia ra, eri nga vini ama ari ra; ama ’ba ama asi eri ma dria e’yo drileri ma e’yosi ’bo, kini eri nga ama ari ’dani.

¹¹Emi indi ma ko ama aza Mungu ziza eminisi, ’ba kakau ma fe ani awa’difo Mungu dri ama ma e’yosi beni, afa feza ovupi fezaru ama dri ’ba kakauni Mungu zilerisirisi.

¹²E’yo amani ama enyazuri ’di, e’yo eti nzeza nita ama asiarini nzeleri kini acita amani nyakua, azini tuni emi vuri, ovu e’yo alatararu ma alia azini asi lokiri kokoru Mungu ma miliarisi, ondua ruani ma alia ku, te ’yeta anzutiri Munguni ma alia,

¹³Te ama sini e’yo andini emi dri ku, te kiri e’yo emini ecole lale azini vale rari’i a’dule; azini ma ’ba ma asi emi dria kini emi nga e’yoni va kpere asizaniria,

¹⁴ekile emini ama ma e’yo vale nga wererile, kini emi eco emi enyazu amasi ekile amani ama enyale emisi o’du Opi amani Yesuni ma aliarile.

¹⁵Mani ovuria a’ita ’diri be, ma ega ndra okorisi muzu emi vu emi ma isu ani asi ndriza iriri beni;

¹⁶dini ma ega ndra agazu emi vu ’disi muzu Makedoniaa, azini mani engaria Makedoniaa emvizu emi vu dika, emi ma nga ani ma ji ku geri muzu Yudiaaria beni.

¹⁷E’yo’dirisimani egaria ’dinile, ma ’ye ojaojaasi ya? Kani e’yo mani egale ma ma ’yeri ma ega e’yo ruanile, mani e’yo ’yoza ojazu E, e, azini Ku, ku, ’dinile ya?

¹⁸Te ekile Munguni ovule e’yo ada berile, e’yo ’yoza amani emi vuri ovuni E pi Ku be ’dini ku.

¹⁹’Dini Mvi Munguni, Yesu Kristo ovupi oluzaru emi eselia amasiri, ada amani olule Silivano pi Timoteo beri, ovuni E azini Ku, ’dini ku; te eri ma alia eri E-ni ’dani.

²⁰Aziza Munguni ka ovu kakau ngopi ti, eri ma alia omvizani ovu E. E’yo ’dirisi ama adri Amena ’yo erisi diza fezu Mungu dri.

²¹Te ama ’bapi okporu emi be Kristo ma alia, odu osupi ama driari, eri Mungu’i;

²²eri ’ba afa ini ecetaruri ama dria, fe vini Orindi asi amani ma alia afa toborurile.

²³Te ma omve Mungu ovuzu e’yo nzepiriru idri mani ma dria-ma ecani Korintoa ku lu mani emi kuzu asi ndrizasi.

²⁴Ovuni kini ama opiru a’ita emini ma drilia, ’dini ku, te ama ovu ’ba ayiko emini ma aza kopi ’diyiru, a’disiku emi so pa ci