Read lugbara 2 'Ba Korintoa 'Diyi 11 Bible Online

2 'Ba Korintoa 'Diyi 11 - lugbara bible

2 'Ba Korintoa 'Diyi 11

¹Ma le te emi ma te nga asi e’yo mani azaniri erizu were. Emi te nga emi asi mani fo!

²’Dini ma ovu ma’yalasi emisi ma’yala Mungunirisi, te ma azi emi fezu agupi alu dri, mani ani emi ejizu Kristo vu aliria alarurile.

³Te ma ovu urisi, ekile urini Evani idle Lokiri onzi erinisirile, asisile emini kazu yi ezazu e’yo adaru azini e’yo alaru ovupi Kristo ma aliari kuzu ku.

⁴A’disiku ’ba azini ka eca, ka Yesu ndu amani olule kuri olu’i, kani emi a’i orindi ndu ndra emini a’ile kuri, kani e’yo baru ndu ndra emini a’ile kuri, emi adri emi asi te onyiru.

⁵Te ma ega ma ovuni ’ba ti opele ambo agapi tu tu ’diyi ma vutialeru aluni i ku.

⁶Te ma ka dri fu e’yo oluzasi were u, te nitasini ma ’dini yo; ama ece e’yo ’diri e’yo driasi emi vu, ’ba dria ma eselia.

⁷Ma ’ye ndra onzi mani ma ngulupi ’baria wereru, emini ani ovuzu amboru, mani e’yo baru Munguni olule emi tia tokorisi ya?

⁸Ma opa ndra kanisa azini ’diyi ma afa, oya a’izu, azi mani ’yele emi dririsi.

⁹Te mani ovuria emi eselia jazini ovuria afa kokoru ti, ma ovuni nzizaru ’ba aluni dri ku, te adripi engapi Makedoniaa ’diyi fe ndra afa ovupi ma be yo ’diyini. E’yo driasi ma mba ndra ma ta ma kazu ovuzu nzizaru emi dri ku, azini ma nga ma ta mba ’dini ’dani.

¹⁰Ekile e’yo adaru Kristonirini ovule ma aliarile, ’ba aluni ngani enyaza mani ma enyazu ’diri oga ma dri angu Akayaaria ku.

¹¹A’disi ya? Mani emi lele kurisi ya? Mungu ni ra!

¹²Te e’yo mani ’yeleri ma nga ’ye ’dani, ma ma oga ani geri ’ba geri ndapi yi e’dazu trotro ekile amale, e’yo yini yi enyazuri ma alia ’diyi dri beni.

¹³Te ’ba ’dinile ’diyi ovu ’ba ti opele inzoru, ’ba azi ngapi lokirisi, ’ba yi e’dapi inzosi ovuzu ’ba Kristoni ti opele ’diyiru ’diyi.

¹⁴Te ’di ovuni e’yo osutaumi ku, a’disiku Satani ma ngulupini adri i e’da inzosi malaika dizaniriru.

¹⁵E’yo ’dirisi eri ovuni e’yo amboni ku ’ba azi ngapi eri dri ’diyi ka yi e’da inzosi ’ba onyi ma azi ngapi ’diyiru. Te asiza yiniri nga ovu azi yinile,

¹⁶Ma ’yo dika, ’Ba aluni ma ega kini ma azaza ’dini ku; re emi ka ega ’dini ti, emi a’i di ma ’ba azazarule, ’dini ma nga ani ma enya were beni.

¹⁷(E’yo mani ’yoleri ma ’yoni Opini azilerisi ku, te ekile mani azale azarile, mani ma asi ’baria ceni ma enyazu ’dini ’di;

¹⁸’ba kakauni yi enyale e’yo ruanisirisi, ma’i ma nga vini ma enya indi.)

¹⁹A’disiku emi adri emi asi re ’ba azazaru ’diyi vu ayikosi, emini ovule ondua berisi!

²⁰A’disiku emi adri emi asi re ’ba azini ka emi ’ba ati’baru, ka emi afa onya, ka emi obi, ka i ngulupi ’du ’ba uru, ka emi mile osa.

²¹Ma ’yo drinza fezu, ekile ama ndra okpo kokorule. Te ’ba azini ma asi ka ovu okporu -ma ’yo ekile azazarule-ma asini vini alu ovu okporu indi.

²²Yi ’ba Ebraniani ya? Ma’i alu indi. Yi ’ba Israelini ya? Ma’i alu indi. Yi ori Iburahimuni ya? Ma’i alu indi.

²³Yi ’ba Kristo ma azi ngapi ’diyi ya? Ma ’yo ekile ’ba azazarule-ma bani drile; ma azi okporu ma alia aga ra, arujo ma alia aga ra, cota ma alia aga ra, dra ma alia pale kakau.

²⁴Pale towi, ’ba Yahudini co ma ninisi kali na drini oromi, kali na drini oromi.

²⁵Pale na co ma kalisi; pale alu o’be ma onisi. Pale na oguru nyo i ma be; ini rra, etu zu, ma ovu yi aliru ma alia ’dani;

²⁶ma ovu acita alia pale kakau, ma ovu mira dra sia ogogo yi ara ma alia, ma dra sia ’ba afa opapi ’diyi dri, ma dra sia ori’ba mani ’diyi dri, ma dra sia ’ba lururu ’diyi dri, ma dra sia aku amboru ma alia, ma dra sia asea, ma dra sia miri alia, ma dra sia adripi inzoru ’diyi dri;

²⁷azi okporu pisi rua suza be, ovuzu o’du koza kokoru pale kakau, abiri pisi yi avijo be, ovuzu nyaka kokoru pale kakau, egbe pisi ovuzu pililiruri be.

²⁸Candi amve ’diyi ma dria, candi i epapi ma asia o’du driari indi, eri asi otiza mani kanisa dria ’diyi ma e’yosiri’i.

²⁹A’dini okpo kokoruni ya? Ma vini okpo kokoru indi ku ya? Yi fe a’dini abazuni ya? Ma asi veni ani indi ku ya?

³⁰Ka le ma ma enya ma, ma nga ma enya okpoako mani ma e’yosi.

³¹Mungu Opi Yesu ma Ati, ovupi inzizaru ’dani ’daniri, ni ra ma lini inzo ku.

³²Gavena Damasikiaa ovupi opi Areta ma palaari te ndra aku Damasikiaari ma agei, lezu ma bizu,

³³te yi esi ma va acalaka alia, derisa abi ma aliari ma talasi, ’dini ma pa ma eri dri ra.