Read lugbara 2 'Ba Korintoa 'Diyi 12 Bible Online

2 'Ba Korintoa 'Diyi 12 - lugbara bible

2 'Ba Korintoa 'Diyi 12

¹Ma ma enya ma ra, ka ’ba si ’yezaru ’dini ku ti; te ma nga ca afa ndreza piyi ma e’yo ’yozu eceta Opini be.

²Ma ni ’ba azini Kristo alia, vutinia eli mudri drini su aga curu’do ’bo, ’du ’ba ’diri, ji pi kpere ’bu nari alia-kani rua be yani, ma nini ku, kani rua kokoru yani, ma nini ku, Mungu ni ra.

³Azini ma ni ’ba ’dinile ’diri-kani rua be yani, kani rua kokoru yani, ma nini ku; Mungu ni ra-

⁴’du eri ji pi Paradisia, azini eri eri e’yo ’bani ecole ’yozaru ku, ovupi azizaru ’ba ma ’yo ku ’diyi.

⁵Ma nga ma enya ’ba ’dinileri ma e’yosi ra, te ma ngani ma enya ma ngulupi ma e’yosi ku, pe lu okpoako mani ma e’yosi a’dule.

⁶Te ma ka le ma enya ra ti, ma ngani ovu azazaru ku, mani ngale e’yo adaru ’yole’irisi. Te ma ovu urisi, ’ba azini kazu egazu ma onyiru aga e’yo erini ndrele ma alia kani erile ma vuri ra ’dini ku.

⁷Te ma kazu ovuzu afusi aga ra, eceta ’ditini ovule amboru turisi ku, fe ma dri oci ruaari, ’di ojiou Satanini ma cozuri, ma kazu ovuzu afusi aga ra ku.

⁸E’yo ’dirisi ma ’ba matu Opi vu pale na, oci nderi ma ku ma ra;

⁹te eri ’yo ma tia, ’Yeta anzutiri maniri fu dri mi dri ra, a’disiku okpo mani ca i paria ’yeke okpoako ma alia. E’yo ’disi ma bani nga ma enya okpoako mani ma e’yosi ayikosi aga ra, okpo Kristoni ma ovu ma dria ma a’buzu ani beni.

¹⁰E’yo ’dirisi ma a’i okpoako pi ayikosi, egana yini ma ’yezu onziri pie, e’yo ewaru ’diyi pie, inzata pie, candi pie, e’yo Kristonisi; a’disiku ma ka ovu okpokokoro, isu de ma okpo be.

¹¹Ma eca azazaru ’bo! Te emi omi ma emi’i, de isu onyiruni emi ndra ma inzira. A’disiku ma ovuni ’ba ti opele ambo agapi tu tu ’diyi ma vutialeru aluni ku, ma ka tro ovu ’ba tokoni ti.

¹²Te eceta ’ba ti opelerini ’ye yi ndra emi eselia asi teza dria be, eceta piyisi, tali pie, tali okporu ’diyi pie.

¹³E’yo emi ’bapi kanisa azini ma vutialeruri ngori ya? Eri kiri mani ma ’bazu emi dri nzizaru kuri’i ku ya? Emi ku onzi mani ’diri!

¹⁴Mi lu, ’di pale na mani ovuzu, ngonde muzu emi vuri. Te ma ngani ovu nzizaru emi dri ku, a’disiku ma ndruni afa emini ku, te emi’i; te le anzi ma mba afa ma ta ’ba yi tipi ’diyi dri ku, te bani ’ba yi tipi ’diyi yi ma mba afa ma ta anzi drini.

¹⁵’Dini ma nga di ma afa fe ayikosi tu, azini vini ma ngulupi fe teketeke indi, orindi emini ma e’yosi. Leta maniri ka zo drile aga ra, leta eminiri anu anu ya?

¹⁶Ma ovu di ’dini, ma ’bani ma nzizaru emi dri ku ’bo, te mani ovuria ondua onzi be ma bi emi lokirisi.

¹⁷Ma nya afa emini onzi ’ba mani tini opele emi vu ’diyi ma azisi ra ya?

¹⁸Ma azi ndra Titoni, azini ma pe adripi nderi ma ti muzu eri be. Tito nya emi afa onzi ra ya? Ama acini orindi alusi ku ya? Azini pamvu alusi ku ya?

¹⁹Emi ega ecazu kpere curu’do ama e’yo amaniri ma eti nze emi tia, e’yo ama driari truzu ya? Mungu ma milia ama ’yo Kristo alia, te ’ba mani lele ’diyi la, ama e’yo dria ’yo emi sizu uru.

²⁰Te ma ru kani mani muria ma ngani emi isu mani lelerile ku, azini emi ngani vini ma isu ekile emini lelerile ku yani; awata pi kazu ovuzu indi, ma’yala pie, adra pie, agata gaza pie, ajidimara pie, ru ndroza pie, afu ’bani yi ipizuri pie, awata ’saaruri pie ku.

²¹Ma ovu urisi mani muria dika Mungu mani Ikazu ma omvizu ele emi milia ku, ma kazu ’ba kakau ezapi ’bo ’diyi ma azi owuzu ku, yi asi ojapi ku e’yo alatara kokoruri kupi, ali ’baza pie, mile aci yini ’yeleri pie ku ’diyi.