Read lugbara 2 'Ba Korintoa 'Diyi 6 Bible Online

2 'Ba Korintoa 'Diyi 6 - lugbara bible

2 'Ba Korintoa 'Diyi 6

¹’Dini amani azi ngaria eri be tualu, ama matu ’ba emi vu kini emi ma a’i ’yeta anzutiri Munguni tokoru ku.

²Te eri ’yo ra, Ma eri mi etu ’yekerisi, ma ko mi aza o’du patinirisi ra. Mi lu, etu ’yekeri ’di; mi lu, o’du pataniri ’di.

³Ama ’bani afa kumuru ’ba ma geria e’yo aluni ma alia ku, ’ba kazu asu suzu ama ruaa azi amani ma e’yosi ku,

⁴te e’yo dria ma alia ama ece ama onyiru, ’ba azi Munguni ma aza kopi ’diyile ovuzu asi teza be tu, inzata piyi ma alia, ocoko pie, pari ewaru ’diyi pie,

⁵cota pie, lazu arururi pie, otrena ombasiri pie, azi okporu ’diyi pie, ovuzu o’du koza kokoru ini be rrari pie, ovuzu abirisiri pie;

⁶e’yo alatararuri pisi, nita pie, asi teza e’yereri pie, asi onyiru pie, Orindi Alatararuri pie, leta lokiri kokoruri ’pie,

⁷e’yo adaruri pie, okpo Munguni pie; afa ombani e’yo kililirurini ’diyi ’duzu dri ndiria azini dri ejiria;

⁸’ba ka ama inzi ra kani ka drinza fe, ka ama ru ’yo onzi kani onyiru ti. Yi ama o’da ekile ’ba ’ba icipi ’diyile, de ama ’ba adani;

⁹ekile ’ba nile ku ’diyile, de ’ba ni ama tu; ekile ’ba drapi dra ’diyile, te mi lu, ama de idriru; ekile ’ba cole co imbatasi ’diyile, te lini dra ama dria ku;

¹⁰ekile ’ba candi be ’diyile, de ama ayiko be o’du driasi;ekile’ba aliorule, te lonyi fezu ’ba kakau dri; ekile ’ba afa kokorule, de ama afa dria ma e’ipini.

¹¹Ama zi tile amani mgboru e’yo ’yozu emi tia, emi ’ba Korintoa ’diyi la; asi amani ovu walaru.

¹²Emi isuni pari wereru dri fupi kuri ama asia ku, te emi isu pari wereruri bani ava emi ngulupi ma asiari ma alia.

¹³Curu’do emi ma ofe arotini tro tro-ma ’yo emi tia ekile anzi ma tiarile-emi ma zi vini emi asi walaru indi fo!

¹⁴Emi ma eci emi ovuzu ’ba a’ipi ku ’diyi ma aziru ku. Te onyi pi i emu tualu onzi be ngoni ngoni ya? Diza pi i eci ini be ngoni ngoni ya?

¹⁵Kristo pi Beliali be yi e’yo a’i alu ngoni ngoni ya? ’Ba a’ipiri ma esele ovu ’ba a’ipi kuri be tualu ngoni ngoni ya?

¹⁶Hekalu Munguni pi i eci wura inzile inzi ’diyi be ngoni ngoni ya? A’disiku ama ovu hekalu; Mungu idrirurini; ekile Munguni ’yolerile, Ma nga ovu yi ma alia, azini ma nga aci yi ma eselia, ma nga ovu Mungu yini, yi nga ovu ’ba mani.

¹⁷E’yo ’dirisi emi efu yi eseliasi, emi co emi esele yi be re, Opi ’yo emi ma elo afa alatara kokoruri ku; re ma nga emi a’i ra,

¹⁸ma nga ovu emi ma Ataru, emi nga ovu ma anzipiru azini ma ezopiru, Opi Okpo dria beri ’yo ra.