Read lugbara 2 'Ba Korintoa 'Diyi 7 Bible Online

2 'Ba Korintoa 'Diyi 7 - lugbara bible

2 'Ba Korintoa 'Diyi 7

¹Amani ovule aziza ’diyi berisi, ’ba mani lele ’diyi, ama ma oji ama ngulupi ondi rua pini orindi berisi dria, e’yo alatararu ’yezu dria fu dri ci ruta Mungu ruzuri ma alia.

²Emi fe pari ama dri emi asia; ama ’yeni ’ba aluni onzi ku, ama ezani ’ba aluni ku, ama nyani ’ba aluni ma afa lokirisi ku.

³Ma ’yoni e’yo ’diri emi ma e’yo lizu onzi ku, te ma ’yo ndra emi tia okorisi ’bo kini emi ova ama asia, amani drazu emi be azini ovuzu idriru emi be tualu.

⁴M olu emi tia mgboru, ma enya ma e’yo eminisi tu; ma ga tre asi omizasi, Inzata amani ma alia dria, ayiko ga ma asia tre tre.

⁵Te ama ka eca Makedoniaa ti, i ama rua lini ava ku, inza ama pari dri dria-amve omba indi, alenia uri indi.

⁶Te Mungu ’ba e’yere ’diyi ma asi omipiri omi ama asi Titoni ecalerisi;

⁷te erini ecalerisi a’dule ku, te omi vini ama asi indi asi omiza nde emini eri ma asi omizurisi, eri ka ava eminiri pi ma e’yo olu ama tia, candi emini pie, asi avaru emini masiri be, ’dini ma ovu ani ayikosi aga ra.

⁸Ma ka ndra candi fe emi dri waraga manisi, ma ojani di ani ma asi e’yo ’dirisi ku, ma ka mira ovu candi be okorisi ti, a’disiku ma ndre waraga nde ’dari fe ndra candi emi dri, ka tro o’du were a’dule ti.

⁹Te curu’do ma ovu ayikosi, emini ovule candi berisi ku, te candi eminini emi jile kpere cazu asi ojaza vurisi; a’disiku candi emini ovu candi Munguni feleniri’i, ka’dini ama ’yeri emi onzi aluni ku.

¹⁰’Dini candi Munguni feleniri ’ba asi oja pata ’bani ani yi asi ojazu vile dika kuri vu; te candi nyakuni feleniri eri dra fe.

¹¹’Dini mi lu, e’yo nde candi emini Munguni feleniri, eri ’ye emi asia ava amboru ’dopi ’doni ya, e’yo e’daza pie, asi veza pie, uri pie, asi ’baza avasiri pie, ava e’yo ’yezuri pie, e’yo liza pie dria Geri driasi emi o’bi ndra emi ecezu ovuzu a1aru e’yo ’diri ma alia.

¹²’Dini ma si ndra waraga emi vu ra ’bo, te ma sini e’yo nde ’ba onzi ’yepiri ma e’yosi ku, kani ’ba yini e’yo onzi ’yele vuniari ma e’yosi ku indi, te leta emini ama vuri ma ovu ecezaru emi vu Mungu ma milia ani beni.

¹³E’yo ’disi ama isu asi omiza ra. Azini asi omiza amani ma alia, ayiko Titoniri fe vini ayikoni ama fuzu aga ra indi, a’disiku eri ma orindini okpo o’diru isule emi dri driarisi.

¹⁴’Dini ma ka ndra ma enya eri ma milia emi ma e’yosi, ma ovuni ani drinzasi ku; te ekile ndra amani e’yo dria ’yole emi tia adarurile, ’dinile enyaza amani ama enyazu Tito ma miliari eca adaru indi.

¹⁵Azini leta avasi eriniri aga tu emi vu, erini e’yo eriza emi driani emini eri a’izu urisi azini rua yaza beri ma e’yo egaria.

¹⁶Ma ovu ayikosi a’disiku e’yo dria ma alia ma asi otini emi e’yosi ku.