Read lugbara 2 'Ba Korintoa 'Diyi 8 Bible Online

2 'Ba Korintoa 'Diyi 8 - lugbara bible

2 'Ba Korintoa 'Diyi 8

¹Te adripi, ama fe emini ’yeta anzutiri Munguni ovupi fezaru kanisa Makedoniaa ’diyi ma aliari ma e’yo nizu,

²kini yini mira ovuria o’bizaru inzata kakausi, ayiko yini agapi turi pi alio yini nyanyari be ere i drile cazu kpere yini afa feza lonyiru tu feria asi alusi.

³Ma ’ba e’yo yini ma eti nzepiri, yi fe afa feza yini ceni yini ecolerile, azini aga yini ecole feleri ra indi,

⁴ama zizu matusi tu ’yeta anzutiri ’diri pi ma e’yosi, ti ecita ’ba alatararu ’diyi ma aza kozuri be-

⁵te yi ’ye ’dini ekile amani ndra egalerile ku, te okorisi yi fe yi ngulupi Opi dri azini ama dri Munguni lelerile.

⁶Ka’dini ama azi e’yo Tito tia kini ekile erini e’yo ’diri e’dole okorisirile, ’dini eri ma fe vini ’yeta anzutiri ’dirini i ’yezu i paria ’yeke emi alia indi.

⁷Te ekile e-nini agale drile, e’yo driasirile-a’ita pisi, e’yo ’yoza pie, nita pie, asi avaru dria pie, leta avasi emini ama vuri pie--emi ne onyiru emi ma aga drile ’yeta arizutiri ’dirisi indi.

⁸Ma ’yoni azitasi ku, re ’ba azini ma ava ma e’yosi ma le leta emini, o’bi, kani eri adaru yani.

⁹Te emi ni ’yeta anzutiri Opi amani Yesu Kristoniri, erini ovuria afa e’iruri ti, e’yo eminisi eri eca ndra alioru, ’dini alio erinisi emi ma eca afa e’ipiru beni.

¹⁰Te e’yo ’diri ma alia ma fe egata mani ’di: e’yo ’diri si emi onyiru, te emi e’do oko eli ajerisi e’yo ’diri ’yezu a’dule ku, te lezu ’yezu indi.

¹¹Te curu’do emi ma de e’yo nde ’yezu ra, ’dini ekile emini ovule ava be e’yo ’diri lezurile, ’dinile emi ma de ’yezaniri ra, ekile afani ovule emi vu cirile.

¹²A’disiku ava ka ovu ’ba asia indi, eri ovu a’izaru ekile afani ovule ’ba nde vu indirile, te ekile afani ovule eri vu yorile ku.

¹³Ovuni kini ’ba azini ma li yini ava, de emi emini emi ecandiria, ’dini ku;

¹⁴te afani ovuzu tro tro, afa emini ovuzu yi be tre ’diyi ma ko alio yini ma aza ewu curu’dorisi, ’dini afa yini ovuzu yi be tre ’diyi ma nga di alio emini ma aza ko beni, e’yo ma ovu ani tro tro.

¹⁵Ekile erini ovule sizarurile, ’Ba afa okupi amboruri kuni jolokoni ku, te ’ba afa okupi wereri, afa erini eceni ku.

¹⁶Te awa’difo Mungu vu erini ava nde alu e’yo eminisi ’diri ’bale Tito ma asiarisi.

¹⁷’Dini eri a’i e’yo aziza amani ra, te erini ovule ava be tu aga rarisi, eri fu mu emi vu ceni.

¹⁸Ama pe adripi ’bani inzile e’yo bari ma alia kanisa dria vusiri ma ti eri be indi;

¹⁹te ’disi a’dule ku, te kanisa pe eri acizu ama be tualu ’yeta anzutiri amani azini ngale inzita fezu Opi dri, azini ava ama asiari ecezu ’diri ma alia.

²⁰E’yo amani lele kuri ’di, ’ba azini ma su ani asu ama ruaa afa feza fele alesi amani azini ngalerisi ku,

²¹te ’dini ama le e’yo ovupi kililiru ’diyi ’ye Opi ma milia a’dule ku, te ’ba ma milia indi.

²²Azini ama pe vini adripi amani, amani isule ava be pale kakau e’yo kakau ma aliari ma ti yi be tualu, te curu’do eri ovu avaru tu aga dria a’disiku erini ovule a’ita be amboru emi vurisi.

²³’Ba alu ka e’yo Titoni zi, eri ovu ’ba ti ecipi ma beri, azini ’ba azi ngapi ma be tualu emi driri; ’ba ka e’yo adripi amani ’diyini zi, yi ovu ’ba kanisani tinii opeleni ’diyiru, yi diza Kristoni.

²⁴E’yo ’dirisi emi ma fe yi dri eceta leta avasi eminiri pi ecezu, enyaza amani ama enyazu e’yo eminisiri be, kanisa ’diyi ma milia.