Read lugbara 'Ba Galatiaa 'Diyi 3 Bible Online

'Ba Galatiaa 'Diyi 3 - lugbara bible

'Ba Galatiaa 'Diyi 3

¹Emi ’ba Galatiaa ondua kokoru ’diyi la A’di oso emi bileni ya, de isu ece Yesu Kristoni dizu pati ruaari ma e’yo emi milia mgboru ’bo?

²Ma le e’yo alu ’diri ni emi dri: Emi a’i mira Orindi emini azita ’yelerisi kani e’yo erizu a’itasirisi ya?

³Emi ovu ondua kokoru ’dini ya? Emi e’do Orindisi ’bo, curu’do emi di vini ji de e’yo ruanisi ya?

⁴Emi ecandi emi e’yo kakausi oye ya?-eri kani oye ada yani,

⁵Eri’i Orindi fepi emi dri azini tali okporu ’yepi emi esejiari, eri ’ye ’dini emini ’yeta azitani ’yelerisi kani emini e’yo erile a’itasirisi ya?

⁶Ekile Iburahimuni Mungu a’ile, yini eri lazu kililiru ani rile.

⁷Emi ma ni eli ani,’ba a’ita be ’diyi yi anzi Iburahimuni.

⁸Te e’yo siza ni drio kini Munguni nga ’ba jururu la kililiru a’itasi, eri nga e’yo bari olu Iburahimu ma tia oko ani kini, ’Ba jururu ’diyi dria yi nga drileba isu misi.

⁹Awa’dini ’ba a’ita be ’diyi ovu drilebaru Iburahimu ’ba a’ita beri be.

¹⁰Te otrita ovu ’ba dria lepi yi papi ’yeta azitanisi ’diyi ma dria, a’disiku e’yo siza kini, ’Ba dria e’yo dria ovupi sizaru buku azitani ma alia ’diyi ’yepi ’dani ku ’diyi ma ovu trizaru.

¹¹’Dini e’da i mgboru kini yi ngani ’ba la kililiru azitasi Mungu ma milia aluni ku; a’disiku kini, ’Ba kililiruri nga ovu idriru a’itasi;

¹²te azita nde ovuni a’itasi ku, te ’Ba azita ’yepiri nga ovu idriru azita ndesini.

¹³Kristo je ama ama onzezu otrita azita ndeni ma alia, ’ba i otrizaru ama paria-a’disiku e’yo siza kini, ’Ba dria alu alu yini dile pati ruaari ma ovu trizaru-

¹⁴’dini drileba Iburahimuniri ma ca ’ba Jururu ’diyi vu Kristo Yesu ma alia ani, ama ma bi vini aziza Orindiniri a’itasi indi.

¹⁵Adripi, ma e’yo ’bani ’yo ka tro eri aziza ’baniri ti, ka e’yoni a’i ’bo, ’ba aluni eri ojapi toko kani e’yo azini erepi driniani yo.

¹⁶’Yo ndra aziza nde ’diyi Iburahimu pi ma tia ori’ba erini be. ’Yoni, Ori’ba ’diyi ma tia, ekile ’ba kakau ma tiarile ’dini ku; te ekile ’ba alu ma tiarile, kini, Ori’ba miniri ma tia, ’diri Kristo’i.

¹⁷E’yo mani ’yoleri ’di: azita emupi eli turu su drini kali na aziza ma vutia nderi ’bani aziza Munguni e’yoni a’ile okporu drio ’bori okpo kokoru, e’yo Munguni azi1eri ’bazu tokoru, ’dini ku.

¹⁸Awuruso ka ovu e’yo azitanisi, eri ovuni nga ’dani azizasi ku; te Mungu fe eri avasi Iburahimu dri azizasi ’bo.

¹⁹Ka’dini ’ba azita a’disi ya? O’ba eri ezata ma e’yosi ecazu kpere ori’ba nde aziza azizu tiniarini emuria; azi eri malaikasi geri ’ba pa sopi ’ba asalaa e’yo edepiri ma driasi.

²⁰Te ’ba pa sopi ’ba asalaa e’yo edepiri edeni ’ba alusi ku; te Mungu eri alu.

²¹Azita pi yi ofu yi aziza Munguni azile ’diyi be ra ya? ’Dini aluni ku; azita ecopi idri fepiri ka ndra ovu fezaru, te’do ndra e’yo ’ba lazu kililiruri ovu azitasi ada.

²²Te e’yo siza ombe afa dria e’yo onzi ma palaa ’bo, aziza ma ovu ani fezaru ’ba a’ipi ’diyi dri beni a’ita yini Yesu Kristo a’izurisi.

²³De nga a’ita nde emuni ku, mba ama ta ombezaru arujoa azita ma palaa, a’ita ngapi i ecepi vilerisiri tezu.

²⁴’Dini azita ovu ’ba ama imbapiriru ama jizu Kristo vu, ama ma ovu ani lazaru kililiru a’itasi beni.

²⁵Te a’itani ecaria ’boria ama asini di ovuzu ’ba ’ba imbapiri ma palaa ’dani ku;

²⁶a’disiku emi dria ovu anzi Munguni a’itasi Yesu Kristo ma alia.

²⁷Te emi dria baputizi bipi fizu Kristo ma alia ’diyi emi su Kristoni ’bo.

²⁸Alenia ’ba Yahudiniru kani ’ba Girikiruni yo, alenia ’ba ati’boru kani karimvaruni yo, alenia ’ba agupiru kani okuruni yo; a’disiku emi dria ovu alu Kristo Yesu ma alia.

²⁹Te emi ka ovu Kristoni, emi di ovu ori’ba Iburahimuni, awuruso nyapi azizani ’yolerile’divi.