Read lugbara 'Ba Galatiaa 'Diyi 5 Bible Online

'Ba Galatiaa 'Diyi 5 - lugbara bible

'Ba Galatiaa 'Diyi 5

¹Truzaruni, Kristo tru ama ’bo; emi so pa okporu ani, emi fe yi ma ombe emi kulumbu e’yo ati’bonirisi dika ku.

²Mi ndre, ma’i Paulo, ma ’yo ’lemi tia kini emi ka agele li ra, Kristo ngani ovu emi dri azakomaru ku.

³Ma nze e’yo eti dika ’ba dria alu alu agele lile ra ’diyi ma tia, kini yi mari be azita dria ’yezu.

⁴Emi lepi ’ba ma la emi kililiru azitasi ’diyi, lemi co esele Kristo be ’bo; emi e’de ra, emi ku ’yeta anzutiri ’bo.

⁵Te lama’i, Orindisi ama asi ’baza ma driari ma mile ga a’itasi.

⁶A’disiku Kristo Yesu ma alia agele liza ’yeni afa ku, ovuzu agele liza ’kokoruri ’yeni vini afa ku indi, te a’ita azi ’yepi letasiri’i.

⁷Emi nzo Indra onyiru; a’di oga emi dri geri, emini ani e’yo adaru kuzu inzikokoruni ya?

⁸Imbata emi bile imbazu I’diri engani ’ba emi omvepiri vu ku.

⁹Akufi wereni fe mikate yini etile etirini pizu dria.

¹⁰Te ma imba ma asi emisi Opi ma alia ’bo, kini emi,ngani e’yo andini ega aluni ku; te ’ba fepi emi asini otizuri nga e’yo lile driari isu ra, ka tro ’ba ngonini ti.

¹¹Te ma’i, adripi, ma ka e’yo agele lizaniri olu ’dani’i, yi ma inza nga ikiri ’dani a’disi ya? Ka ovu ’dini kumu pati alazaniri nze di i ’bo.

¹²Ma le te adani ’ba fepi emi asini otizu ’diyi ma oli yi kai kai!

¹³Adripi, omve emi emi otruzu; te truni emi geri fezu emi dri ava Iruani ’yezu ku, te emi ma nga azi emi eselia ati’bale leta avasirisi.

¹⁴A’disiku azita dria alu alu de yi yi ’yezu ’yeke e’yo alu ’di ma alia, kini, Mi le mi agyini mini mi ngulupi lelerile.

¹⁵Te emi ka emi oci, emi ka emi nya sisi, emi ne emi ba emi kazu emi dri jazu ceni ceni ku.

¹⁶Te ma ’yo ra, Emi ma aci Orindisi, emi ma ’ye li ruani’i aluni ku.

¹⁷Te rua eri li be omba ’bazu Orindi be, Orindi pi rua be; a’disiku afa ’diyi ovu ari’baro, dri aruzu yi eselia, emi econi ani e’yo ’yezaru emini lelerile ku.

¹⁸Te Orindi ka emi dri ceni, emi ovuni di azita ma palaa ku.

¹⁹’Yeta ruani e’da yi ’di: e’yo awururi pi, onzikanyaruri pi, ava ruani pi,

²⁰inzita siri’ba inzizuri pi, ole pi, nguta pi, omba pi, ma ’yala pi, adra pi, awata pi, esele coza pi, imbata inzoruri pi,

²¹a’ya pi, atizu ewasiri pi, e’yo saaru ’yezuri pi, e’yo yi sipi ’diyile ’diyi pie dria. Ma e’yoni a’da emi tia oko ’di, ekile ndra mani a’dale oko ’borile, kini ’ba dria e’yo ’dinile ’diyi ’yepi ’diyi ngani suru Munguni a’i awurusoru aluani ku.

²²Te efi: Orindini ’yaleri eri leta avasiri pi, ayiko pi, asi anzuru pi, asi teza e’yereri pi, asi ndriza pi, onyi pi, a’ita pi,

²³asi e’yereri pi, asi teza e’yo ruani gazuri pie; e’yo ’dinile ’diyi ma dria azita aluni yo.

²⁴’Ba Kristo Yesuni ’diyi di e’yo ruani pari alaza ma ruaa ’bo, tualu rua nde ma ava onziri pi, lini pie dria.

²⁵Ama ka ovu idriru Orindisi, ama ma aci vini Orindisi indi.

²⁶Ama ma ovu afu be toko, ama agyi ma asi engazu, ovuzu ma’yalasi ama agyi vu indi ’dini ku.