Read lugbara 'Ba Galatiaa 'Diyi 6 Bible Online

'Ba Galatiaa 'Diyi 6 - lugbara bible

'Ba Galatiaa 'Diyi 6

¹Adripi, ’ba azini ka e’de ezata ma alia, emi ovupi Orindi be ’diyi ma omvi ’ba ’dinile ’diri kililiru asi afu kokorurisi. Mi ma ngulupi ma ovu vini mile be, kazu muzu mi obezu indi ku.

²Emi o’du emi agyi ma e’yo nzizaru ’diyi emi eselia, ’dini, emi nga azita Kristoni ’ye ’yeke ani.

³’Ba azini ka ega i ’ba amboni, de eri ’ba tokoni, eri i ma ngulupi ici’i.

⁴’Ba dria alu alu ma o’bi ’yeta i ma ngulupiniri oko, ’dini eri nga ovu e’yo i ipizuri be i ma ngulupisi a’dule, te ’ba azi ma e’yosi ku.

⁵A’disiku ’ba dria alu aluni nga e’yo nziza i ma ngulupiniri ’du i’i ceni.

⁶’Ba imbale e’yo Mungunisiri ma eci ti ’ba i imbapiri be afa onyiru ma fezasi dria.

⁷Emi ici emi ku; ’ba econi Mungu ’bazaru aparakaru ku, afa ngoni ngori aguni rileri, ’di afa erini ngale loleri’i.

⁸’Ba afa ripi i ma ruasiri nga ruasi dri jaza lo’i; te ’ba afa ripi Orindisiri nga Orindisi idri ’dani ’daniri lo’i.

⁹Ama ma ande azi onyiru ma ’yezasi ku, a’disiku ewuni ka eca ra ama nga afa lo ra, ama ka ande kuria.

¹⁰’Dini amani pari isuria, ama ma ’ye onyiru ’ba dria vu, agapiri ori’ba a’ita be ’diyi vu.

¹¹Emi ndre ma si waraga emi vu nukuta ’wara ’wara ’diyisi ma ngulupi ma drisi ma’i.

¹²’Ba dria lepi e’dapi onyiru ruasi ’diyi, yi omi emi agele lizu, te lu yi kazu inzata isuzu pati alaza Kristonisi ku beni.

¹³Te ’ba agele lile ra ’diyi mbani azita ma ta yi’ini ku, te yi le emi ma li agele yi ma ipi yi afusi rua eminisi ani.

¹⁴Te ma ma ipi ma afusi aluni ku pe lu pati alaza Opi amani Yesu Kristonirisi a’dule, pati alaza nderisi ma vurisini di nyaku ’bo, nyaku vurisini di ma indi.

¹⁵Te agele lizuri pi agele lizu kuri be yi iri tro afa toko, te lu ’ba ’bazu o’diruri’i.

¹⁶’Ba dria acipi azita ’di vusi ’diyi, asi anzuru pi ma ovu yi vu yiki be, azini ’ba Israelini Mungu vile ’diyi vu.

¹⁷Engazu curu’do ’ba aluni ma ecandi ma ku; a’disiku mani acile nyibeleko Yesuni be ma ruaarisi.

¹⁸’Yeta anzutiri Opi amani Yesu Kristoni ma ovu orindi emini be, adripi. Amena.