Read lugbara 'Ba Efesoa 'Diyi 1 Bible Online

'Ba Efesoa 'Diyi 1 - lugbara bible

'Ba Efesoa 'Diyi 1

¹Paulo ’ba Kristo Yesuni tini pele e’yo Mu nguni lelenirisiri, ’Ba alatararu Efesoa ovupi asi ada be Kristo Yesu ma alia ’diyi vu:

²’Yeta anzutiri pi ma ovu emi vu asi anzuru be engazu Mungu Ata amani pi vu Opi Yesu Kristo be.

³Mungu Opi amani Yesu Kristo ma Ata ma ru ma ovu inzizaru, eri’i asi ndriza orindini ’diyi dria fepi ama dri Kristo ma alia angu ’buariari’i;

⁴eri ope ama eri ma alia de nga eri ’bani nyaku ma eti ku, ama ma ovu ani alatararu azini e’yo kokoru eri ma milia letasi.

⁵Eri ’ba mira ama ndu ovuzu anzi i ma ngulupiniru Yesu Kristosi, ekile e’yo ovupi onyiru eri ma milia erini lelenirile,

⁶amani ngazu ani inzita fezu ’yeta anzutiri erini dizaru, erini fele ama dri avasi ’Ba Leleri ma aliari dri.

⁷Eri ma alia ama ovu onzeza amani eri ma arisiri be, ezata amani wuzu, ekile ’yeta anzutiri erini ma lonyini ovule amborurile;

⁸eri fe ’yeta anzutiri nderini ezuzu ama vu tu, ondua driasi e’yo vaza be,

⁹fezu amani e’yo erini leleniri ma e’yo vale ku zizaruri nizu, ekile e’yo ovupi onyiru eri ma milia, erini egale drio Kristo ma alia ’yezurile,

¹⁰ewunini ngaria caria ’yekeria eri ma oku afa dria tualu Kristo ma alia, afa ’bua ’diyi pi afa nyakua ’diyi be dria eri ma alia.

¹¹Te eri ma alia indi ama ofu ovuzu eri ma yilaru ’bo, erini ama opele drio ekile eri’i e’yo dria ’yepi mi egale onyirurilerini lelerile,

¹²’dini ama ’ba asi ’bapi a’itasi Kristo dria oko ’diyi ma fe ani ’bani inzita fezu diza eriniri dri beni.

¹³Eri ma alia, emi alu indi, yi ebi eceta emi ’ba e’yo adaniri-’di bani e’yo baru emi pazu ’diri-eripi Kristo a’ipi ra ’diyi ma ruaa, Orindi Alatararu erini azile fezurisi.

¹⁴Orindi nderi eri ekile afa kule toboru awuruso amani ma e’yosi de nga onzeni afa nde ma ada kurile, inzita fezu diza eriniri dri.

¹⁵E’yo ’disi ma’i indi, ma ka a’ita emini Opi Yesu ma aliari pi ma e’yo eri, leta emini ’ba alatararu ’diyi vu driari be ’bo,

¹⁶ma kuni awa’difo ’yozu emisi ku, mani e’yo emini egaria zita mani ma alia,

¹⁷Mungu Opi amani Yesu Kristoni, Ata dizaruri, ma fe emi dri orindi onduani azini e’yo e’dazani, nita eri nizuri ma alia,

¹⁸te de eri fe diza mile emi asia ’diyi dri ’bo, emini ani e’yo teza omveta eriniri pi ma e’yo nizu, awuruso erini dizaru ’ba alatararu, diyi ma aliari ma lonyi pie,

¹⁹okpo erini amboru tu agapi dria ra ’ba eri a’ipi ’diyi vuri pie, ekile okpo erini e’yo ’yezurini ’yele okporu,

²⁰erini ’yele ani okposi Kristo ma alia, erini eri engaria ’ba draza ma eselia, eri fezu rizu va i ma dri ndiria angu ’buariarile.

²¹Te eri fe eri ma ri va dri ceza opiruri pi ma drilia dria, ecoza pie, okpo pie, opi nyaza pie, azini ru dria ’dale ewu ’dorisi ’diyi pie a’dule ku, te ru ngale,’dale ewu ecapirisi ’diyi pie indi;

²²eri o’ba afa dria eri ma palaa va, eri fe erini ovuzu afa dria ma drilia kanisa ma driru;

²³kanisa nde ovu eri ma rua, gaza tre eri’i afa dria gapi tre e’yo driasiriniri’i.