Read lugbara 'Ba Efesoa 'Diyi 3 Bible Online

'Ba Efesoa 'Diyi 3 - lugbara bible

'Ba Efesoa 'Diyi 3

¹E’yo ’dirisi ma’i Paulo, ’ba aruru Kristo Yesuni emi ’ba Jururu ’diyi ma e’yosiri-

²emi ka azi ’yeta anzutirini Munguni fele ma dri emi e’yosiri ma e’yo eri ’bo,

³kini ece e’yo vale ku zizaruri ma dri ece ece, ekile mani sile e’yo weresi oko ’borile.

⁴’Dini emini e’yo ’diri laria, emi ma eco e’yo vaza mani e’yo vale ku zizaru Kristoniri vazuri amazaru beni.

⁵’Ba ma ori nini ndra e’yo zizaru ’diri ewu driorisi ku ekile Orindini e’yoni ecele ewu curu, dorisi ’ba ti opele alatararu erini ’diyi pi vu nabiyi berile, kini,

⁶’ba Jururu ’diyi ovu ’ba awuruso nyapi yi be tualu, yi ecipi rua aluru yi be, aziza Kristo Yesu ma aliari a’izu yi be tualu e’yo barisi ’diyi.

⁷’Ba ndra ma ’ba e’yo baru ’diri ma azi aza kopiriru, ekile ’yeta anzutiri Munguni fele ma dri okpo erini e’yo ’yezu okposirisirile.

⁸Te fe ’yeta anzutiri ’diri ma dri, ma ka tro ovu ’ba alatararu ’diyi ma eselia ’ba wereru turi’i, ma ma olu ’ba Jururu ’diyi ma eselia lonyi Kristoni ’bani ecole etini vale dria kuri ma e’yo bare,

⁹e’yo vale ku ovupi zizaru Mungu afa dria ’bapiri ma alia engazu driori ma e’yo edeza ecezu ’ba dria dri;

¹⁰eri ma fe ani geri kanisanirisi ’ba ’ba dri cepi ’diyi azini ’ba okpo be angu ’buaria ’diyi ma ni ondua Munguni ovupi esele be, kakauri;

¹¹ekile erini edele gbudrio Kristo Yesu Opi amani ma aliarile.

¹²Eri ma alia ama ovu asi okporu be azini ama isu geri esizu Mungu vu ogogori asi tezasi, amani Kristoni a’ile rarisi.

¹³E’yo ’disi i emi ava ma nze i candi mani isule emi e’yosirisi ku; eri bani e’yo emini emi enyazu aniri’i.

¹⁴E’yo ’dirisi ma osi kumuti va Ata ma drilia,

¹⁵te omve e’yo ’bani ovuzu ataruri ’bua kani nyakua dria eri ma e’yosi,

¹⁶zizu kini eri ma fe, diza eriniri ma lonyi vusi, emini okpo isuzu Orindi erinisi agu emini alealeruri ma alia,

¹⁷Kristo ma adri asi emini ma alia a’itasi; emini ola suria va patile emi ma so pa kirikiri leta ma alia,

¹⁸emi ma ovu okporu ’ba alatararu ’diyi be dria, wala pi ma e’yo vazu, oconi pie, izu uruleruri pie, izu valeru eleri pie,

¹⁹emini ani leta Kristoni e’yo niza ’bani dria ndepi rari nizu, emi ma ga ani tre Mungu ma gaza trerile dria.

²⁰Eri’i ecopi e’yo dria ’yepi tu aga e’yo dria amani zile kani egale ’diyi ra, okpo erini azi ’yezu ama alia okposirisiri

²¹ma ru ma ovu inzizaru kanisa alia, azini Kristo Yesu ma alia, a’bianzi vusi dria, ewule ewule. Amena.