Read lugbara 'Ba Efesoa 'Diyi 6 Bible Online

'Ba Efesoa 'Diyi 6 - lugbara bible

'Ba Efesoa 'Diyi 6

¹Emi anzi, emi inzi ’ba emi tipi ’diyi ma e’yo Opi ma alia, te ’diniri kilili.

²Mi inzi mi ati pi mi andri be (’di azita oko e’yo azile fezaruri beri’i),

³mi ma ovu ani drilebaru, ovuzu nyakua eli be kakau beni.

⁴Emi ata, emi enya anzi emini ma asi aokoni engazu yi ma asia ku, te emi ma te yi agei imbatasi azini asi omiza Opinisi,

⁵Emi ati’ba, emi inzi ’ba ovupi emi ma drilia opiru nyakua ’diyi ma e’yo urisi azini ma yazasi asi alusi, ekile Kristo vurile;

⁶kiri lu azi ngazu ’ba ma milia ekile ’ba ayiko fepi ’ba dri ’diyile ku, te ekile ati’ba i Kristoni e’yo Munguni leleri ’yepi asisi ’diyile,

⁷au ngazu asisile onyirusi ekile Opi dririle, te ’ba dririle ku,

⁸a’disiku emi ni ra ’ba dria alu aluni nga e’yo onyiru erini ’yeleri ma andeso isu Opi vu, eri ka teo ovu ati’boni kani kari’bani ti.

⁹Te emi opi, emi ’ye yi vu ’dinile indi, emi ma ku uri fezu yi dri e’yo ’yozasi a, a’disiku emi ni ra Opi yini emi beri ovu ’bua, te eri openi ’ba ku.

¹⁰Te e’yo acepiri ’di, emi ma ovu okporu Opi ma alia, okpo erini amboru terisi.

¹¹Emi ma su afa ombani Munguni ’diyi dria, emini ecozu ani pa sozu lokiri Satanini ogazu beni.

¹²A’disiku afu amani fuleri ovuni ’ba rua ari be ’diyi be ku, te opi be, okpo pie, ’ba wudrikuru ma dri cepi ini ’dorini ’diyi pie, orindi onzi ongulumuru angu ’buaria ’diyi pie.

¹³E’yo ’disi emi ma o’du afa ’Ombani Munguni ’diyi dria ra, emi ma eco ani ari’ba ma dri aruzu o’du onzirisi, azini emi ka e’yo dria ’ye ’bo emi ma so di pa ci.

¹⁴Te emi ma so pa ’dini, emi anzu emi opile enyiriko e’yo adanirisi, emi su gombere e’yo kililirurini emi agatia,

¹⁵emi su enyiriko edele e’yo baru asi anzururinisiri emi paa;

¹⁶agapini emi ma ’du gombere a’itani emi dria, emini ecozu ani ’ye aciru ’ba onzini ’diyi inyuzaru beni.

¹⁷Emi ’du vini biri pataniri pi, sei Orindiniri be, ’di e’yo Munguniri’i.

¹⁸Emi ma zi Mungu etu dria Orindi ma alia, Mungu ziza pisi ma ’baza be dria. Emi ma ovu mile be ’dani asi driasi, Mungu zizu ’ba alatararu ’diyi ma e’yosi dria,

¹⁹azini masi indi, e’yo ma ovu fezaru ma dri oluzu, mani ma ti azizu asi uri kokorurisi, fezu ani ’bani e’yo baru ma e’yo vale ku zizaruri nizu,

²⁰e’yo baru ’dirisi ma di ojiou arururi; ma ma olu ani e’yo ’diri asi uri kokorurisi, ekile onyiruni ma ma olu eri rarile.

²¹ Te Tukiko adripi mani lele, azi ma aza kopi asi adaru be Opi ma aliari nga e’yo mani dria ece emi dri, emini e’yo mani ’yeleri nizu ani.

²²Ma pe eri ma ti bani e’yo alu ’di ma vusi, emi ma ni ani e’yo amani, azini eri ma omi emi asi beni.

²³Asi anzuru ma ovu adripi vu, leta pi a’ita be, engazu Mungu Ata vu azini Opi Yesu Kristo vu.

²⁴’Yeta anzutiri ma ovu ’ba dria Opi amani Yesu Kristoni lepi leta i depi kurisi ’diyi be.