Read lugbara 'Ba Filipia 'Diyi 1 Bible Online

'Ba Filipia 'Diyi 1 - lugbara bible

'Ba Filipia 'Diyi 1

¹Paulo pi Timoteo be, ovupi ati’ba Kristo Yesuni ’diyi, ’Ba alatararu dria Kristo Yesu ma alia ovupi Filipia ’diyi pi vu, ’ba kanisa andripi ’diyi pie, ’ba kanisa ma aza kopi ’diyi pie:

²’Yeta anzutiri pi ma ovu emi vu asi anzuro be engazu Mungu Ata amani pi vu Opi Yesu Kristo be.

³Ma awa’difo ’yo Mungu mani vu paleko dria mani e’yo emini egaria,

⁴zita mani ma alia dria ma adri Mungu zi emi dria ma e’yosi etuzu ayiko be,

⁵emini ti ecile ma be e’yo barini kuzu engazu o’du ndra oko ’darisi ecazu kpere o’du curu’dorisi.

⁶Te ma a’i e’yo ’diri ma asia ada kini, Mungu azi onyiru e’dopi emi aliari nga fe azi ndeni i dezu dri fuzu kilili cazu kpere o’du Yesu Kristoniria.

⁷Mani emi dria ma e’yo egazu ’dinileri eri ’yeke, a’disiku e’yo eminirini ovule ma asiarisi, azini mani de ovuria ombezaru kani mani de agata garia e’yo bari ma e’yosi azini e’yo oluria okposi, emi dria ovu ti ecizu ma be ’yeta anzutirisi.

⁸Te Mungu ovu ’ba e’yo mani ma eti nipiri, eri ni kini ava emini dria va ma tu leta i avasi Kristo Yesuniri ma alia.

⁹Te ma zi Mungu ’dini, kini, leta avasi eminiri ma zo nga drile dika dika nita pi ma alia ondua e’yo eti vazuri be dria,

¹⁰emi ma ama ani e’yo agapi onyisi ra ’diyi yi a’izu beni, emi ma ovu ani asi alaru be azini onzi kokoru kpere cazu o’du Kristoniria,

¹¹emi ma ga tre efi ’yaza e’yo kililiruni ovupi geri Yesu Kristonisiri be, diza pi fezu ani Mungu dri inzita be.

¹²Te ma le emi ma ni, ma adripi, e’yo ndra yi ’yepi ma ruaa ’diyi efu tuni e’yo barini kuzu,

¹³te geri ’disi asikari dria aku opini ma agei tepi ’diyi, ’ba azini pie dria, yi ni ra ma ovu ombezaru Kristo ma e’yosi;

¹⁴azini adripi Opi ma alia ’diyi ma esele tu tuni isu a’ita o’diru anziriku mani ma e’yosi, ovuzu ani asi tezasi e’yo Munguni oluzu uri kokoru aga ra.

¹⁵Adaru ’ba azini yi e’yo Kristoni olu ma’yalasi azini abalasi, te ’ba azini ’diyi olu asi onyirusi.

¹⁶’Ba nde ’diyi yi e’yo olu leta avasirisi yini nile Mungu ’ba ma ’doa e’yo bari ma eti nzezurisi;

¹⁷te ’ba azini ’dayi yi e’yo Kristoni olu awatasi, asi alarusi ku, yini egale candi erezu ma dri anziriku ma ombezuri ma driarisi.

¹⁸Te e’yo ngoni ya? Geri driasi, kani asi inzorusi, kani asi adarusi, yi Kristoni olu’i; e’yo ’dirisi ma ovu ayikosi, adaru ma nga ovu ani ayikosi ’dani.

¹⁹Te ma ni ra e’yo ’diri nga ofu ma dri pataru, zita eminisi azini Orindi Yesu Kristoni ovupi fezaru ma dririsi;

²⁰te ma ovu asi tezasi azini ma ega asi driasi ma ngani ovu drinzasi e’yo alunisi ku, te curu’do ekile driorile, mani e’yo olule uri kokorurisi, Kristo ma ovu inzizaru rua maniri ma alia, kani idrisi, kani dratasi.

²¹Te mani ovuzu idriruri eri Kristo’i, te drazu rari eri orodriru.

²²Te ka ovu mani ngazu ovuzu idriru ruasiri’i, ’diri nga ovu ma dri efi ’yaza azi mani ’yelerini. Ka’dini ma nini ku ma nga ngonileri pe ya.

²³Asi mani le e’yo ’diyi iri tro. Ma le dri kozu muzu ovuzu Kristo be ra ’bo, ’di onyiru aga dria.

²⁴Te agapi rari le ma ma ovu rua ma alia ’dani e’yo eminisi.

²⁵Te mani e’yo a’iria ma asia ’dinile ma ni ra ma nga ovu ’dani, ma nga ovu emi be dria emini zozu ani drile a’ita ma alia ayikosi,

²⁶emi ma enya emi tu aga ra Kristo Yesu ma alia e’yo manisi beni, mani ecale emi eselia dikarisi.,

²⁷Te di, acita emini ma ovu ekile e’yo baru Kristonirini lelerile, ka’dinile ma ka eca emi vu emi ndrezu, kani ma ka eca ku, ma ma eri e’yo emini, kini, emi so pa okporu orindi alusi, azini emi ’di a’di tualu asi alusi a’ita e’yo barinirisi;

²⁸emi ma ’ye urisi ari’ba emini ma e’yosi aluni ku. E’yo ’diri ovu yi dri ecetaru dri jaza yini ecezu, te eri vini ecetaru pata emini engapi Mungu rori ecezu indi.

²⁹Te eri ovu fezaru emi dri Kristosi, kiri eri a’izu a’dule ku, te candi nyazu eri ma e’yosi indi,

³⁰emini ovuria a’di be tro tro ekile emini ndrele ma vu, azini emini erile curu’do ovu ma vu ’indirile.