Read lugbara 'Ba Kolosaia 'Diyi 2 Bible Online

'Ba Kolosaia 'Diyi 2 - lugbara bible

'Ba Kolosaia 'Diyi 2

¹Te ma le emi ma ni a’di mani ’dile emi ma e’yosi, ’ba Laodikiaa ’diyi pie, ’ba dria ma rua ndrepi milesi ku ’diyi pieri ovu amboru tu.

²Yi ma omi yi asi ani yini ovuria ecizaru tualu leta avasirisi, yi ma isu lonyi e’yo vaza asi adarusirini dria, yi ma ni ani e’yo vale ku zizaru Munguniri, ’di Kristo’i.

³Eri ma alia lonyi ondua pini nita be ’diyi dria ovu zizaru.

⁴Ma ’yo e’yo ’diri, ’ba aluni kazu emi icizu e’yo ’yole lokiriru ti aluzasirisi ku.

⁵Te ma ka tro ovu emi be ruasi ku ti, ma ovu emi be tualu orindisi, ovuzu ayikosi acita emini kililiruri pi ndrezu, pa soza kirikiri a’ita emini Kristoni a’izuri ma aliari be.

⁶E’yo ’disi ekile emini Kristo Yesu Opini a’ilerile, emi ma aci eri ma alia ’dinile,

⁷pa sozu kirikiri pati ola okporu berile, ovuzu eri ma alia jo sile okpo berile, ovuzu okporu a’ita nde ma alia, ekile yini emi imbalerile, ovuzu awa’difo be tre aga ra.

⁸Emi te emi agei ’ba azini kazu emi bizu ati’boru ondua ’banisi azini lokiri tokorurisi ku, imbata ’bani idrileri ma vuti bizu, azita nyakunile te e’yo Kristonile ku.

⁹A’disiku e’yo dria gapi Mungu ma alia tre erini ovuzu Mungururi oja i rua ’baniru, ovu dria Kristo ma alia;

¹⁰te eri ma alia emi ga tre e’yo ndesi ’bo indi, eri ovu opi nyaza pi ma driru okpo be dria.

¹¹Te eri ma alia yi fe emi dri agele liza ’bani lile drisi kuri, eri agele liza Kristoni e’yo ruani truzuri’i;

¹²’dini yi sa emi tualu eri be baputizi ma alia, fe vini emini engazu eri ma alia tualu 3 eri be indi, emini Mungu eri engapi ’ba draza ma eseliari ma okpo a’ilerisi.

¹³Te emini de ovuria drazaru ezata eminisi azini rua agele lizaako eminisi, eri ’ba ndra emi idriro tualu eri be, te eri wu ezata amani dria;

¹⁴eri ini e’yo siza ama ogapi azita ndu ndusi ama dri arupiri, eri ’du eri geriasi ra, eri di eri pari alaza ma ruaa.

¹⁵Eri nde opi nyaza ’diyi pi teketeke, okpo azini ’diyi be, eri fe yi e’dazu mgboru, eri isu inzita amboru erini yi ndele pari alazasirisi.

¹⁶E’yo ’dirisi ’ba aluni ma li e’yo emini nyaka ma e’yosi ku, kani afa mvuzasi, kani o’du omunisi, kani mba o’dirusi, kani o’du sabatonisi dria ku indi.

¹⁷E’yo ’diyi yi e’yo ngapi ecapi ’diyi ma endrilendri; te rua nde eri Kristoniri’i.

¹⁸’Ba aluni ma eza geri emini afa feza orodriruri isuzuri inzosi ku, lezu emi ma ovu afu kokoru tu malaika inzizu’i, pa sozu eceta erini ndreleri ma alia, i ipizu afusi toko asisile drozu e’yo ruani ma driarisi,

¹⁹te yi ecini yi Dri be ku, de drini okpo fe rua dria drini, te ruani i eciria tualu falako pisi isu be, eri zo ani Munguni eri ezolenirisi.

²⁰Ka’dini emi ka dra Kristo be azita nyakuni vu ’bo, emi ovu azita ma palaa ekile ’ba ovupi idriru e’yo nyakuni vu ’diyile a’disi ya?

²¹Kini, Mi bi ku, Mi ’bi ajini ku, Mi elo ruani ku

²²(te afa ’diyi dria nga dri ja ra ’bani ’yeria yi be ’boria), yi e’yo azile azita ’bani vusi azini imbata ’bani vusi ’diyi.

²³E’yo ’diyi ka tro yi e’da ekile onduale inzita ceniri pi ma e’yosi, asisile afu kokoruri Pie, e’yo ruani gazuri pie ada, te yi ovuni orodriru li ruani ogazu aluni ku.